Emyatsi y’Emighulu y’Akabiri 18:1-34
18 Yehoshafati mwabya muteke n’abandu mubamusikya kutsibu, aliwe mwatahirya omo kihanda kya Ahabu.
2 Habere habilaba emyaka milebe, mwayasungana na Ahabu e Samaria. Neryo Ahabu mwaherera esyombuli nene n’esyonde nene busana naye, na busana n’abandu ababya na Yehoshafati. Enyuma sy’aho, mwamulemba-lemba ati amutwale bakayalwa n’omuyi we Ramoti-gileadi.
3 Neryo omwami Ahabu we Israeli mwabwira Yehoshafati omwami we Yuda ati: “Unemwendighenda naghe e Ramoti-gileadi?” Yehoshafati mwamusubirya ati: “Ingye naghu tuli baghuma. Abasuda baghu n’abaghe ni baghuma. Tukendikuwatikya erilwa.”
4 Aliwe Yehoshafati mwabwira omwami we Israeli ati: “Kisi, utsuke wabulya Yehova y’obusondoli.”
5 Neryo omwami we Israeli mwahindania abaminyereri, babya balume 400. Mwababulya ati: “Twanganayalwa n’omuyi we Ramoti-gileadi, kutse nileke?” Mubamusubirya bati: “Uyayo! Mwami wetu, oMungu w’ekwenene akendikuwatikya erisinga omuyi oyo.”
6 Aliwe Yehoshafati mwabugha ati: “Omo kihugho kino, simuli abandi baminyereri ba Yehova? Bamabya ibanemo, tubulaye obusondoli bw’oMungu erilabira ibo.”
7 Omwami we Israeli mwasubirya Yehoshafati ati: “Hakine omulume mughuma oyo wangatuwatikya eribulya Yehova y’obusondoli; aliwe nimuponire, kundi ingye syalyatanibughako obuminyereri obuwene, obutuwene busa-busa bwakananibughako. Ni Mikaya mughala wa Imla.” Aliwe Yehoshafati mwabugha ati: “Mwami, isiwabugha ekiri ng’ekyo.”
8 Neryo omwami we Israeli mwabirikira omukulu mughuma oyukakolera oko bwikalo bw’omwami, amamubwira ati: “Ghenda, uyende Mikaya mughala wa Imla. Yira luba.”
9 Omwami we Israeli n’omwami Yehoshafati we Yuda babya ibanikere obuli mundu oko kitumbi kiwe ky’obwami, ibanambite esyongyimba syabo sy’obwami. Babya bikere ahali ekihumbiro, hakuhi n’omulango we Samaria. Abaminyereri bosi babya bakabugha obuminyereri embere syabo.
10 Neryo Zedekia mughala wa Kenaana mwayikokoterya amahembe w’ekyuma, neryo amabugha ati: “Yehova ati, ‘Ukendikuna* Abasiria omo mahembe ano erihika omughulu ukendibabughaho.’”
11 Abandi baminyereri bosi babya bakabugha obuminyereri bughumerera. Babya bakabugha bati: “Ghenda, uyalwe n’omuyi we Ramoti-gileadi, ukendisingagho. Mwami wetu, Yehova akendikuwatikya erisinga omuyi oyo.”
12 Neryo omundu oyo batuma bati ayende Mikaya mwabwira Mikaya ati: “Hulikirira. Abandi baminyereri bosi babiribugha bati emyatsi yikendighendera omwami yo ndeke. Kisi, naghu ko ubughe utya. Ubughe uti emyatsi yikendimughendera ndeke.”
13 Aliwe Mikaya mwamubwira ati: “Oko kwenene-kwenene ngoko Yehova aliho, ngendibugha ebyo Mungu waghe akendimbwira.”
14 Enyuma sy’aho, mwayahika embere sy’omwami, neryo omwami amamubulya ati: “Mikaya, twanganayalwa n’omuyi we Ramoti-gileadi, kutse nileke?” Mikaya mwalw’iniamusubirya ati: “Uyayo! Ukendisinga. Bakendihirwa omo byala byaghu.”
15 Aliwe omwami mwamubwira ati: “Ngendisyakulapisya kangahi niti ubye ukanibwira ekwenene nyisa-nyisa omo rina rya Yehova?”
16 Neryo Mikaya mwamusubirya ati: “Namalangira Abaisraeli bosi ibabiripanza-panzirwa oko bitwa, ng’esyombuli esitawite mulisya. Yehova ati: ‘Sibakiwite mukama. Obuli mundu asube ewiwe yo buholo.’”
17 Neryo omwami we Israeli mwabwira Yehoshafati ati: “Si mungakubwira niti oyo syendibugha ati emyatsi yikendinighendera ndeke, aliwe akendibugha ati emyatsi mibi misa yo yikendinihikira.”
18 Enyuma sy’aho, Mikaya mwabugha ati: “Hulikirira ebinywa bya Yehova: Mungalangira Yehova inianikere oko kitumbi kiwe ky’obwami, n’abamalaika bosi b’elubula balue ibanimene oko luhande lwiwe lw’amali n’oko luhande lwiwe lw’amalembe.
19 Neryo Yehova mwakabulaya ati: ‘Nindi yukenditeba omwami we Israeli, atoke eriyalwa n’omuyi we Ramoti-gileadi n’eriholerayo?’ Omumalaika mughuma mwabya akabugha eki, n’oghundi mumalaika iniabugha kirya.
20 Oko mwiso, omumalaika* mughuma mwaseghera hakuhi na Yehova, amamubwira ati, ‘Ingye ngendimuteba.’ Yehova mwamubulya ati, ‘Ukendimuteba ghuti?’
21 Omumalaika oyo mwamusubirya ati, ‘Ngendiyayo, neryo inabughisya abaminyereri biwe bosi b’amabehi.’* Neryo oMungu mwamubwira ati, ‘Ukenditoka erimuteba. Ughende, uyakole ekyo wamabugha.’
22 Neryo Yehova abiribughisya abaminyereri baghu aba b’amabehi,* aliwe Yehova abiribugha ati obuhanya bukendikuhikira.”
23 Neryo Zedekia mughala wa Kenaana mwaseghera hakuhi na Mikaya, amamuha erikofi, n’erimubwira ati: “Ukasonda eribugha uti ekirimu kya Yehova mukikaniluako, kyamayakania naghu? Kiryalabahi kikayakuhikako?”
24 Mikaya mwamusubirya ati: “Ukendisyaminya nga kiryalabahi omughulu ukendisyabisama omo kyumba ky’emwisi-mwisi.”
25 Neryo omwami we Israeli mwabugha ati: “Mulete Mikaya, mumutwale eyiri Amoni, omukulu w’omuyi, n’eyiri Yoashi, omughala w’omwami.
26 Mubabwire muti, ‘Omwami ati: “Muhire omundu ono y’omo muliki. Mubye mukamuha akalyo kake n’amaghetse make erihika omughulu ngendisyasubula buholo.”’”
27 Aliwe Mikaya mwamubwira ati: “Wabya wamasyalua eyo yo buholo, Yehova imwatetakania naghe.” Kandi Mikaya mwabugha ati: “Inywe bosi, si mwamowa!”
28 Neryo owami we Israeli na Yehoshafati omwami we Yuda mubaya e Ramoti-gileadi.
29 Omwami we Israeli mwabwira Yehoshafati ati: “Ngendiya omo malwa inabiriyihindula, bakasyaniminya. Aliwe iwe, wambale esyongyimba syaghu sy’obwami.” Neryo omwami we Israeli mwayihindula, bamaya omo malwa.
30 Aliwe omwami we Siria abya iniabiribwira abakomanda abimanire emitoka ati: “Isimwalwa n’abasuda kutse n’abakulu b’abasuda, omwami we Israeli musa yo mulwe naye.”
31 Abakomanda abimanire emitoka babere babilangira Yehoshafati, mubayibwira bati: “Y’omwami we Israeli.” Neryo mubaya hakuhi naye batoke erilwa naye; Yehoshafati mwasaba obuwatikya, na Yehova mwamuwatikya, oMungu mwalw’iniamulusya boko.
32 Abakomanda abimanire emitoka babere babilangira ngoko si y’omwami we Israeli, mubalw’ibaleka erimukwamirira.
33 Aliwe omusuda mughuma mwalasa omusali isyasi ng’akendiyahikira okundi, n’omusali oyo mwayahika oko mwami we Israeli, amingira omo mwanya owali omo kati-kati k’omwanya oho ebihande bibiri by’erikoti riwe ry’ekyuma bisonere. Neryo omwami mwabwira oyukaghendaya omutoka wiwe ati: “Bindukaya omutoka, unilusaye omo malwa,* kundi nabirihutala kutsibu.”
34 Amalwa mwakala kutsibu ekiro ekyo. Kyabya kitolere abasuda ibahambirira omwami we Israeli atoke erisighala inianimene omo mutoka bakalwa n’Abasiria erihika omw’igholo. Eryuba ryabere ryabilenga, omwami amahola.
Amaelezo awehikwa
^ Kinywa kwa kinywa, “Ukenditula.”
^ Kinywa kwa kinywa, “ekirimu.”
^ Kinywa kwa kinywa, “Ngendibya kirimu ekikateba omo buno bw’abaminyereri biwe bosi.”
^ Kinywa kwa kinywa, “abirihira kirimu ekikateba omo buno bw’abaminyereri baghu.”
^ Kinywa kwa kinywa, “kambi.”