Emyatsi y’Emighulu y’Akabiri 19:1-11
19 Neryo Yehoshafati, omwami we Yuda, mwasuba ewiwe e Yerusalema isyetahutala.*
2 Yehu mughala w’omulangiri Hanani mwayasungana na Yehoshafati, amamubwira ati: “Omubi yukawatikaya? N’abaponire Yehova bo wanzire? Busana n’ekyo, Yehova abirikuhitanako kutsibu.
3 Aliwe, oMungu mwakakulangiramo ebibuya, kundi muwalusya omo kihugho mw’emiti mibuyirire,* kandi muwateghekania omutima waghu utoke* erisondya-sondya oMungu w’ekwenene.”
4 Yehoshafati mwaendelea erikala e Yerusalema. Mwalenderera abandu eritsuka e Beeri-sheba erihika omo kiharo ky’ebitwa kye Efraimu atoke eribasubya oko Yehova, oMungu w’abotata-kulu wabo.
5 Kandi mwahira abatsweri omo kihugho, omo miyi yosi eyiwatire ye Yuda, omo buli muyi.
6 Mwabwira abatsweri ati: “Mubye mukalebya ndeke ebyo mukakola, kundi simuli batsweri b’abandu, aliwe muli batsweri ba Yehova, kandi akabya iniane haghuma nenyu omughulu mukatswera.
7 Neryo musaghe Yehova. Mulebaye ndeke ebyo mukakola, kundi Yehova oMungu wetu syalitswera omo ritatunganene, syalimo kasololo, kandi syaliligha ekyutuliro.”
8 N’omo muyi we Yerusalema, mwahiramo Abalawi balebe, abahereri balebe, n’abakulu balebe b’ebitunga bye Israeli batoke eribya bakatswera omo rina rya Yehova, n’erisoha esyombanza sy’abikalani be Yerusalema.
9 Kandi mwababwira ati: “Kino kyo litolere imwakola mutoke erikangania ngoko musaghire Yehova omo butaleghula kandi n’omutima wosi:*
10 Omughulu abaghala benyu abikere omo miyi yabo bakendibya bakabaletera olubanza lw’oyulyuta omusasi, kutse ibababulya omwatsi owalebirye emighambo, ebyalayiro, ebihano, kutse ebighenderwako, litolere imwabakunga bakasyabyako lubanza embere sya Yehova. Bite bitya, oMungu iniakendibahitanako kutsibu, inywe n’abaghala benyu. Ekyo kyo litolere imwakola mukasyabyako lubanza.
11 Amaria y’oyu, ni mukulu w’abahereri. Akendibya akabasondola omo myatsi yosi eyilebirye Yehova. Zebadia mughala wa Ismaeli yukendisondola ekihanda kya Yuda omo myatsi yosi eyilebirye omwami. N’Abalawi bakendibya bawatikya benyu. Musike, kandi mukole omubiiri, na Yehova abye haghuma n’abakakola ebyuwene.”*
Amaelezo awehikwa
^ Kutse “iniane buholo.”
^ Ulebaye Amaana w’ebinywa.
^ Kutse “omutima waghu mwayisogha.”
^ Kutse “owataghabene.”
^ Kutse “n’ebyuwene.”
