Emyatsi y’Emighulu y’Akabiri 20:1-37
20 Enyuma sy’aho, Abamoabu, Abaamoni, n’Abaamonimu* balebe mubasyalwa na Yehoshafati.
2 Neryo mubasyabwira Yehoshafati ambu: “Abandu banene banemwasira omo kiharo ky’engetse,* e Edomu, banemusyalwa naghu. Lino bane e Hazazoni-tamari, ni bugha ambu, e En-gedi.”
3 Neryo Yehoshafati mwasagha kutsibu, mwayisogha* erisondya-sondya Yehova. Mwabugha ati abandu bosi be Yuda bakole amafungo.
4 Neryo abandu be Yuda mubahindana batoke eribulya Yehova nga bayire bati; mubalua omo miyi yosi ye Yuda bakasyabulya Yehova y’obusondoli.
5 Neryo Yehoshafati mwimana embere sy’abandu ababya bahindene abe Yuda n’abe Yerusalema omo hekalu ya Yehova embere sy’ekibugha kihya-kihya.
6 Mwabugha ati:
“Yehova, oMungu w’abotata-kulu wetu, si n’iwe Mungu oyuli elubula, kandi si n’iwe ukatabala amami wosi w’ebihanda. Omo byala byaghu muli obutoki n’akaghala. Sihali oyo wangayihanda okw’iwe.
7 Mungu wetu, si n’iwe watibita oko bikalani b’ekihugho kino omughulu abandu baghu Abaisraeli bingira mukyo, neryo wamahakyo abana b’omwira waghu Abrahamu mo mwandu wa kera na kera.
8 Mubikala mukyo, mubakuhimbiramo n’ehekalu itoke eribyako erina ryaghu. Mubabugha bati:
9 ‘Obuhanya bwamabituhikira, bubye ibukaletawa n’omuyali, amalipizi, ekihunzo, kutse enzala, neryo itukendimana embere sy’ehekalu eyi n’embere syaghu (kundi erina ryaghu riri oko nyumba eno). Omughulu tuli omo maligho, tukendibya tukakusaba tuti utuwatikaye. Neryo ubye ukatuhulikirira n’eritusabula.’
10 Lino Abaamoni, Abamoabu, n’abandu abikere omo kiharo ky’ebitwa kye Seiri banemwasa, abandu abo utalighira Abaisraeli erilwa nabo omughulu babya bakalua e Misri. N’Abaisraeli mubatalaba hakuhi nabo, kandi mubatababughaho.
11 Neryo ibwa nabo bati bakasyatutibitako omo kihugho ekyo watuha mo mwandu.
12 Mungu wetu, ubahe amalipizi. Kundi itwe situwite akaghala embere sy’abandu banene aba abanemusyalwa netu, kandi twabiribula nga tuyire tuti, aliwe ameso wetu ali okw’iwe.”
13 Oko mughulu oyo, abandu bosi be Yuda babya ibanimene embere sya Yehova, babya n’abakali babo, abana* babo, n’abana babo balere.
14 Omo bandu ababya bahindene aho, ekirimu kya Yehova mukyasa oko Yahazieli mughala wa Zekaria, mughala wa Benaya, mughala wa Yeieli, mughala wa Matania, Omulawi w’omo kihanda kya Asafu.
15 Yahazieli mwabugha ati: “Inywe bikalani bosi be Yuda n’abe Yerusalema, n’omwami Yehoshafati, inywe bosi muhulikirire. Yehova akababwira ati: ‘Isimwasagha kutse erititimana busana n’abandu banene aba, kundi amalwa si wenyu, aliwe ni w’oMungu.’
16 Omungya undaghale ukayalwa nabo. Bakendisyabya ibanemweruka omo nzira ye Zizi, ukendisyahindanabo oko mwiso w’omusya* owahererenie n’embwarara ye Yerueli.
17 Simwendisyalwa nabo. Mukendisyimana aho, imwasighala aho imunimene n’erilangira ngoko Yehova akendibasabula.* Inywe bandu be Yuda ne Yerusalema, isimwasagha kutse erititimana. Musyayalwa nabo omungya, na Yehova akendisyabya haghuma nenyu.’”
18 Aho n’aho Yehoshafati mwakukama n’erihira obusu bwiwe b’oko kitaka, n’abandu bosi be Yuda n’abe Yerusalema mubakukama embere sya Yehova busana n’eriramya Yehova.
19 Enyuma sy’aho, Abalawi ababya baghala ba Kohati n’Abakorahi mubahangana, bamapipa Yehova oMungu we Israeli omo mulenge muli.
20 Ekiro ekikwamire, mubabuka omo tututu, bamaya omo mbwarara ye Tekoa. Babere ibanemughenda, Yehoshafati mwimamana, amabugha ati: “Munihulikirire, inywe bandu be Yuda n’abe Yerusalema! Mwikiriraye Yehova oMungu wenyu mo mukenditoka erisika.* Mwikiriraye abaminyereri biwe, emyatsi yosi ikendibaghandera ndeke.”
21 Mwabya abibugha erikania n’abandu, amasombola abandu abakendibya embere sy’abasuda batoke erimbira Yehova n’erimupipa ibanambite esyongyimba nyibuyirire, ibanemubugha bati: “Musime Yehova, kundi olwanzo lwiwe oluteleghula ni lwa kera na kera.”
22 Omughulu batsuka erimba n’obutseme esyonyimbo sy’eripipa oMungu, Yehova mwasisirya Abaamoni, Abamoabu, n’abandu ababya bikere omo kiharo ky’ebitwa kye Seiri omo malwa, abandu abasonda erilwa n’abandu be Yuda. Mubatsuka eriitana.
23 Abaamoni n’Abamoabu mubalwa n’abandu ababya bikere omo kiharo ky’ebitwa kye Seiri, bamababughaho, n’eritoghotyabo. Mubabya babibughaho abikalani be Seiri, nabo bamitana.
24 Omughulu abasuda be Yuda bahika ahali akaleberyo k’omuteya k’omo mbwarara, mubasamalira eyiri abandu banene, neryo mubalangira ebinda byabo ibyabiriyighalika ahisi; sihabya n’omughuma oyo wasaka.
25 Neryo Yehoshafati n’abandu biwe mubayaheka ebindu by’abasuda abo abalyahola. Mubabalusyako ebindu binene kutsibu, esyongyimba, n’ebindu binene by’obughuli. Mubahekabyo erihika oko kika bamataluka kubyo. Mukyabasaba biro bisatu erihekabyo kundi byabya binene.
26 Ekiro ky’akani, mubahindana omo Musya* we Beraka. Mubapipa* Yehova ibane eyo. Kyo kikaleka ibahula omusya oyo mo Musya we Beraka.* Akinahulawa atya erihika na munabwire.
27 Neryo abandu bosi be Yuda n’abe Yerusalema ababya bakasondolwa na Yehoshafati mubasuba e Yerusalema ibanemuyisyandira, kundi Yehova mwaleka ibatsema omw’ibawatikya erisinga esyonzighu syabo.
28 Neryo mubingira e Yerusalema ibane n’ebyombo by’omuziki by’esyosinga, esyonanga, esyongunga, bamaya omo hekalu ya Yehova.
29 Abandu b’omo mami wosi w’omo bindi bihugho mubasagha oMungu babyowa ngoko Yehova mwakasinga esyonzighu sy’Abaisraeli.
30 Neryo obutabali bwa Yehoshafati mubwatabyamo buna-buna, n’oMungu wiwe mwamuha obuholo oko syombande syosi.
31 Yehoshafati mwaendelea eritabala e Yuda. Abya n’emyaka 35 omughulu abya mwami. Mwatabala oko myaka 25 iniane e Yerusalema. Mama wiwe abya iniakahulawa mo Azuba; abya mwali wa Shili.
32 Yehoshafati mwakola nga baba wiwe Asa. Mwakwama ndeke-ndeke emibere yiwe, mwakola ebyuwene omo meso wa Yehova.
33 Aliwe, emyanya y’endata muyatalusibwa omo kihugho. N’omutima w’abandu abya isyali tayari erisondya-sondya oMungu w’abotata-kulu wabo.
34 Eyindi myatsi eyilebirye Yehoshafati, eritsuka oko mwanzo erihika oko mwiso, yinahandikire omo bitabu bya Yehu mughala wa Hanani, ebyahirawa omo Kitabu ky’abami be Israeli.
35 Enyuma sy’aho, omwami Yehoshafati we Yuda mwakola endaghane n’omwami Ahazia we Israeli, oyo wabya akakola emyatsi mibi.
36 Neryo mwayighunga naye, bamabya bakakokotya amato awakaya e Tarshishi. Mubabya bakakokoteryagho e Ezioni-geberi.
37 Aliwe, Eliezeri mughala wa Dodavahu owe Maresha mwabugha obuminyereri obu oko Yehoshafati: “Kundi wabirikola endaghane na Ahazia, Yehova akenditoghotya emibiiri yaghu.” Neryo amato ayo mwatsutsangika, mwatatoka erihika ne Tarshishi.
Amaelezo awehikwa
^ Kutse alinga, “n’Abameuni.”
^ Kitokekene y’Engetse Eyiholire.
^ Kinywa kwa kinywa, “mwabindula obusu bwiwe.”
^ Kinywa kwa kinywa, “abaghala.”
^ Kutse “w’omusya owakumamo amaghetse.”
^ Kutse “akendisyabalamya.”
^ Kutse “erihanda omutima.”
^ Kutse “Ribanda.’
^ Kinywa kwa kinywa, “Mubatsumula.”
^ Ni bugha ambu “omuyisa.”
