Emyatsi y’Emighulu y’Akabiri 21:1-20
21 Enyuma sy’aho, Yehoshafati mwahola ngoko abotata-kulu wiwe bahola, mubamuta omo Muyi wa Daudi, oho bata abotata-kulu wiwe. Enyuma sy’aho, mughala wiwe Yehoramu mwabya mwami omo mwanya wiwe.
2 Abaghala babo Yehoramu, ni bugha ambu, abaghala ba Yehoshafati babya: Azaria, Yehieli, Zekaria, Azaria, Mikaeli, na Shefatia; abosi babya baghala b’omwami Yehoshafati we Israeli.
3 Baba wabo mwabaha ebihembo bingyi by’efeza* n’eby’ehoro, mwabaha ebindu by’obughuli, mwabaha n’emiyi eyiwatire omo Yuda. Aliwe obwami, mwahabo Yehoramu kundi yo wabya kambere.
4 Yehoramu mwabya abitsuka eritabala omo mwanya wa baba wiwe, mwawatya obwami bwiwe omw’ita abaghala babo bosi omo muyali, mwita n’abakulu balebe be Israeli.
5 Yehoramu abya n’emyaka 32 omughulu abya mwami. Mwatabala oko myaka 8 iniane e Yerusalema.
6 Mwakola amalolo agho abami be Israeli bakola, ng’aw’abomo kihanda kya Ahabu bakola, kundi mwatahya mwali wa Ahabu; mwabya akakola ebituwene omo meso wa Yehova.
7 Aliwe Yehova mwatanza eribughaho ekihanda kya Daudi ekyangabere kikaluamo abami.* Mwatakola atya busana n’erisikya endaghane eyo akola haghuma na Daudi, kundi mwamulagha ati akendisyamuha etala ya kera na kera, iye n’abana biwe.
8 Oko mughulu wa Yehoramu, abandu be Edomu mubaghana erikwama obusondoli bwe Yuda, neryo mubayihiriraho omwami wabo-wabo.
9 Yehoramu n’abakomanda biwe mubaya e Edomu n’emitoka yiwe yosi. Neryo oko mughulu mulebe, Abaedomu n’abakomanda abimanire emitoka mubamutimbako. Aliwe mwahangana omo kiro, amasingabo.
10 Nomo byanabya bitya, abandu be Edomu mubataleka erighana obusondoli bwe Yuda erihika na munabwire. Oko mughulu oyo, abandu be Libna nabo mubaghana erikwama obusondoli bwa Yehoramu, kundi Yehoramu abya iniabirileka erikwama Yehova, oMungu w’abotata-kulu wiwe.
11 Kandi abya iniabirihimba emyanya y’endata oko bitwa bye Yuda atoke eringirya abikalani be Yerusalema omo bumbalaka bw’obunya-kirimu. Neryo Yehoramu mwaherya abandu be Yuda.
12 Oko mwiso, mubaletera Yehoramu y’ebaruha eyo omuminyereri Eliya amuhandikira. Mwamuhandikira ati: “Yehova, oMungu wa tata-kulu waghu Daudi ati, ‘Mughutitakwama emibere ya baba waghu Yehoshafati kutse y’omwami Asa we Yuda.
13 Aliwe mughukakwama emibere mibi y’abami be Israeli, kandi mughukaleka abandu be Yerusalema ibakola obumbalaka bw’obunya-kirimu obuli ng’obo ekihanda kya Ahabu kyakola, nibya mughukahika n’oko kika ky’eriita abaghala benyu, abana ba baba waghu ababya ibakulengire.
14 Busana n’ekyo, Yehova akendiha abandu baghu, abaghala baghu, n’abakali baghu b’amalipizi, kandi akenditoghotya n’ebindu byaghu byosi.
15 Naghu, ukendikwa amakoni manene, n’amala waghu akendyasako obukoni; obukoni obo bukendikwaghalya kiro kwa kiro erihika oko kika amala waghu akendisyahuluka.’”
16 Enyuma sy’aho, Yehova mwahira omo Bafilistini n’omo Baarabu ababya bikere hakuhi n’Abaetiopia m’omutima w’erilwa na Yehoramu.
17 Neryo mubasyalwa ne Yuda, bamingira kinyanganga omo kiharo kye Yuda. Mubaheka ebindu byosi ebyo basunga omo nyumba y’omwami; mubaheka abana biwe b’obulume, abakali biwe. Yehoahazi,* omughala wiwe mulere, iye musa yo bamusighira.
18 Enyuma sy’emyatsi yosi eyo, Yehova mwaleta oko mala wiwe k’obukoni obutelama.
19 Habere habilaba mughulu mulebe, emyaka ibiri yabilaba, amala wiwe mwalua omo nda busana n’obukoni bwiwe, neryo mwahola akasimba busana n’obukoni obo. Abandu biwe mubatamwakirya omuliro* ng’ogho bakiraya abotata-kulu wiwe.
20 Yehoramu abya n’emyaka 32 omughulu abya mwami, kandi mwatabala oko myaka 8 iniane e Yerusalema. Sihali oyo wabya omo bulighe abihola. Mubamuta omo Muyi wa Daudi, aliwe mubatamuta aho babya bakata abami.
Amaelezo awehikwa
^ Ni kindu ky’obughuli ekikalua omo kitaka.
^ Kinywa kwa kinywa, “enyumba ya Daudi.”
^ Kandi akahulawa mo Ahazia.
^ Kutse “ekiriko.”
