Emyatsi y’Emighulu y’Akabiri 22:1-12
22 Neryo abikalani be Yerusalema mubayira Ahazia, mughala wa Yehoramu oyo wabya iniakine mulere, mo mwami omo mwanya wa Yehoramu. Ababandi abasa ahali ekambi haghuma n’Abaarabu babya ibabiriita abakulu biwe bosi. Neryo Ahazia mughala wa Yehoramu mwatsuka eritabala abandu be Yuda.
2 Ahazia abya n’emyaka 22 omughulu abya mwami, mwatabala oko mwaka mughuma iniane e Yerusalema. Mama wiwe abya iniakahulawa mo Atalia, abya mwitsikulu* wa Omri.
3 Ahazia naye mwakola amalolo maghumerera ng’owo ekihanda kya Ahabu kyakola, kundi mama wiwe yo wabya akamuhana muhanda.
4 Mwabya akakola ebituwene omo meso wa Yehova ng’ab’omo kihanda kya Ahabu, kundi abo bo babya bakamuhana baba wiwe abihola. Neryo mubaleka iniatsanda.
5 Mwakwama amahano wabo, amaghenda na Yehoramu mughala wa Ahabu omwami we Israeli bakayalwa na Hazaeli omwami we Siria e Ramoti-gileadi. Mubabya babihika eyo, abakaghusa emisali bamahutalya Yehoramu.
6 Yehoramu mwasuba e Yezreeli atoke eriyahira edawa oko bironda ebyo ahutalira e Rama omughulu abya akalwa n’omwami Hazaeli we Siria.
Ahazia* mughala wa Yehoramu omwami we Yuda mwaya e Yezreeli akayabana Yehoramu mughala wa Ahabu, kundi abya iniabirihutala.*
7 Omughulu Ahazia ahika ewa Yehoramu, oMungu mwakolesya olughendo olo eriletera Ahazia y’oluholo, kundi Ahazia mwabya abihika, iye na Yehoramu mubayakokya Yehu, mwitsikulu* wa Nimshi, oyo Yehova ahirako amaghuta atoke eribughagho* ekihanda kya Ahabu.
8 Yehu mwabya abitsuka eriha ekihanda kya Ahabu ky’amalipizi ogho kyabya kitolere erihabwa, mwahindana n’abakulu be Yuda n’abana b’obulume b’abaghala babo Ahazia, ababya baghombe ba Ahazia, neryo mwitabo.
9 Enyuma sy’aho, mwasondya Ahazia, mubamuhambira aho abya iniabiseme e Samaria. Mubamuleta embere sya Yehu, amamwita. Enyuma sy’aho, mubamuta, kundi babya bakabugha bati: “Ni mwitsikulu wa Yehoshafati, oyo wasonda-sondaya Yehova n’omutima wosi.” Omo kihanda kya Ahazia simwabya omundu n’omughuma oyo wabya n’obutoki bw’eribya mwami.
10 Atalia, mama wa Ahazia, mwabya abyowa ngoko mughala wiwe abihirhola, mwabugha ati bite abana bosi b’omo kihanda kya Yuda abangabere bami.*
11 Aliwe, Yehoshabeati mwali w’omwami mwalusya Yehoashi mughala wa Ahazia omo bubiso-biso omo kati-kati k’abandi baghala b’omwami ababya batolere eritibwa, mwamubisa haghuma n’omulemberi wiwe omo kyumba ky’emwisi ky’erighotseramo. Yehoshabeati abya mwali w’omwami Yehoramu; abya mukali w’omuhereri Yehoyada, kandi abya mwali wabo Ahazia. Mwatoka eribisa Yehoashi, neryo Atalia mwatita Yehoashi.
12 Yehoashi mwasighala haghuma nabo omo myaka 6, abya inianabisire omo hekalu y’oMungu w’ekwenene omughulu Atalia abya akatabala ekihugho.
Amaelezo awehikwa
^ Kinywa kwa kinywa, “mwali.”
^ Omo bitabu bilebe bya kera by’Ekiebrania, akahulawa mo Azaria.
^ Kutse “inialwere.’
^ Kinywa kwa kinywa, “mughala.”
^ Kinywa kwa kinywa, “eritwa.”
^ Kinywa kwa kinywa, “batsandaye embuto yosi y’obwami.”
