Emyatsi y’Emighulu y’Akabiri 23:1-21
23 Omo mwaka we 7, Yehoyada mwakola n’obutubaha, neryo mwakola endaghane haghuma n’abakulu b’amamia, ni bugha ambu, Azaria mughala wa Yehoramu, Ismaeli mughala wa Yehohanani, Azaria mughala wa Obedi, Maaseya mughala wa Adaya, na Elishafati mughala wa Zikri.
2 Neryo mubatimba-timba omo kiharo kyosi kye Yuda, bamahindania Abalawi b’omo miyi yosi ye Yuda n’abakulu b’ebitunga bye Israeli. Mubabya babihika e Yerusalema,
3 Abaisraeli bosi ababya bahindene mubakola endaghane haghuma n’omwami omo hekalu y’oMungu w’ekwenene. Enyuma sy’aho, Yehoyada mwababwira ati:
“Omughala w’omwami akenditabala, ngoko Yehova anabugha oko baghala ba Daudi.
4 Ekyo litolere imwakola kya kino: Abahereri n’Abalawi abakendisyabya bakakola omubiiri ekiro ky’Esabato, mukendisyabya mukaghababo mo bikuto bisatu. Ekikuto kighuma kikendisyabya kikatsunga emilango,
5 ekikuto ky’akabiri kikendisyabya kikimana ahali enyumba y’omwami, n’ekikuto ky’akasatu kikendisyabya kikimana ahali Olukyo lw’Efondasyo, n’abandu bosi bakendisyabya omo bibugha by’ehekalu ya Yehova.
6 Isimwalighira omundu wosi-wosi akingira omo hekalu ya Yehova, erilusyako abahereri n’Abalawi abakakola omubiiri. Ibo banganingira kundi ni bandu babuyirire, n’abandu bosi bakendisyabya bakasikya ebyo Yehova akabasaba.
7 Litolere Abalawi ibatimba oko mwami oko syombande syosi, obuli mundu inianawite oko bindu biwe by’amalwa omo byala. Litolere imwita omundu wosi-wosi oyukasonda eringira omo hekalu. Mubye mukabya imune n’omwami ehosi-hosi eyo akaya.”*
8 Abalawi n’abandu bosi be Yuda mubakola ngoko omuhereri Yehoyada ababwira. Obuli mundu mwimya abandu biwe ababya bakakola omubiiri ekiro ky’Esabato, mwimya n’abatabya bakakola omubiiri ekiro ky’Esabato, kundi omuhereri Yehoyada mwatalighira ekikuto n’ekighuma eritendikola omubiiri.
9 Neryo omuhereri Yehoyada mwaha abakulu b’amamia b’amatumo, esyongabo ngengenge,* n’esyongabo sy’omuviringo esyabya sy’omwami Daudi, esyabya omo hekalu y’oMungu w’ekwenene.
10 Enyuma sy’aho, mwabwira obuli mundu ati aye omo mwanya wiwe w’erikoleramo mubiiri. Obuli mundu abya inianawite oko kindu kiwe ky’amalwa k’omo byala. Mupayipanga eritsuka oko luhande lw’amali lw’ehekalu eriyahika oko luhande lw’amalembe lw’ehekalu, hakuhi n’ekiherero kandi hakuhi n’ehekalu, bamatimba oko mwami.
11 Enyuma sy’aho, mubahulukya omughala w’omwami, bamamwambalya embita, n’erihira oko mutwe wiwe kw’Emighambo.* Ko bamuyira batya mo mwami. Yehoyada n’abaghala biwe mubamuhirako amaghuta; enyuma sy’aho, mubabugha bati: “Omwami akote!”
12 Atalia mwabya abyowa ebikindo by’abandu ababya bakatibita n’eripirpa omwami, mwalw’iniaya eyiri abandu abo oko hekalu ya Yehova.
13 Neryo mwalangira omwami inianimene hakuhi n’enduyi eyiri oko mulango w’ehekalu. Abakulu n’ababya bakabuha omo syongunga babya ibane haghuma n’omwami. Abandu bosi omo kihugho babya bakatsema n’eribuha omo syongunga, n’abimbi ababya bakimba ibanemuwata ebyombo by’omuziki babya bakasondola esyonyimbo sy’eripipa oMungu. Neryo Atalia mwalw’iniatulanga esyongyimba siwe n’eribugha ati: “Babirinihotera! Babirinihotera!”
14 Aliwe omuhereri Yehoyada mwabwira abakulu b’amamia ababya bakasondola abasuda ati bahuluke. Neryo mwababwira ati: “Mulusaye omukali oyo y’omo bandu. N’omundu amabimukwama, imwamwita omo muyali.” Embere sy’aho, omuhereri Yehoyada abya iniabiribabwira ati: “Isimwamwitira omo hekalu ya Yehova.”
15 Neryo mubamuhamba, bamamutwala ahali Olukyo lw’Esyosabayiri* lw’enyumba y’omwami. Mubabya babimuhikya aho, bamalw’ibamwitira aho.
16 Neryo Yehoyada mwakola endaghane haghuma n’abandu bosi kandi haghuma n’omwami. Abosi mubalagha bati mughulu wosi bakendibya bandu ba Yehova.
17 Enyuma sy’aho, abandu bosi mubaya eyiri ehekalu ya Baali, bamahimbulayo. Mubasambula ebiherero biwe n’esyosanamu siwe. Mubita Matani, omuhereri wa Baali, embere sy’ebiherero.
18 Enyuma sy’aho, Yehoyada mwaha abahereri omubiiri w’eriteya ehakalu ya Yehova. Ibo bo Daudi aghaba mo bikuto-bikuto batoke eribya bakasugha ehekalu ya Yehova n’eriherera Yehova amahera w’eryokererya erikwamana n’ebihandikire omo Mighambo ya Musa, ibanemutsema n’erimba esyonyimbo, ngoko Daudi abugha ati babye bakakola.*
19 Yehoyada mwahira n’abateya oko milango y’ehekalu ya Yehova, kusudi omundu oyuterire busana n’omwatsi wosi-wosi isyingiramo.
20 Neryo mwaghenda n’abakulu b’amamia, esyoseghu-seghu, abasondoli b’abandu, n’abandu bosi b’omo kihugho, bamakwamanisya omwami erilua omo hekalu ya Yehova eriyahika oko nyumba y’omwami. Mubalaba omo mulango w’endata. Mubya bahihika, bamikalya omwami oko kitumbi ky’obwami.
21 Neryo abandu bosi b’omo kihugho mubatsema. Omuyi mwabyamo embolere, kundi Atalia abya iniabiritibwa omo muyali.
Amaelezo awehikwa
^ Kinywa kwa kinywa, “omughulu akahuluka n’omughulu akingira.”
^ Kangyi-kangyi abakaghusa emisali bo babya bakahekasyo.
^ Kitokekene kyabya kitabu ky’erilinga ekyabyamo Emighambo y’oMungu.
^ Kutse “lw’Esyofarasi; lw’Esyoshevale.”
^ Kinywa kwa kinywa, “erilabira ebyala bya Daudi.”
