Emyatsi y’Emighulu y’Akabiri 24:1-27
24 Yehoashi abya n’emyaka 7 omughulu abya mwami. Mwatabala oko myaka 40 iniane e Yerusalema. Mama wiwe abya iniakahulawa mo Zibia, abya we Beeri-sheba.
2 Yehoashi mwabya akakola ebyuwene omo meso wa Yehova omo biro byosi ebyo muhereri Yehoyada abya iniakineho.
3 Yehoyada mwamusombolera abakali babiri, n’abakali abo mubamubutira abana b’obulume n’abana b’obukali.
4 Enyuma sy’aho, Yehoashi mwanza eritasyakokotya enyumba ya Yehova.
5 Neryo mwahindania abahereri n’Abalawi, amababwira ati: “Mughende omo miyi ye Yuda, muyasongaye esyofranga omo Baisraeli bosi esikendibya sikawatikya erikokotya enyumba y’oMungu wenyu obuli mwaka; muyire luba-uba.” Aliwe Abalawi mubatayira luba-luba.
6 Neryo omwami mwabirikira Yehoyada, omukulu w’abahereri, amamubwira ati: “Ekitasi* kibuyirire ekyo Musa, omughombe wa Yehova, abugha ati bandu babye bakateka, ni bugha ambu, ekitasi ekyo Baisraeli bosi batolere ibateka busana n’ehema y’erihindanamo, busanaki siwetabwira Abalawi uti balusayekyo e Yuda ne Yerusalema n’erikileta?
7 Kundi abaghala ba Atalia, omukali mubi oyu, mubakingira kinyanganga omo nyumba y’oMungu w’ekwenene, n’ebindu byosi bibuyirire by’omo nyumba ya Yehova, mubakakolesayabyo omw’iramya Esyobaali.”
8 Enyuma sy’aho, omwami mwabugha ati bakokotaye akasanduku. Neryo mubakokotyako, bamakahira ehihya, ahali omulango w’ehekalu ya Yehova.
9 Enyuma sy’aho, mubatuma omulaghe oko bandu b’osi b’omo kiharo kye Yuda ne Yerusalema bati baletere Yehova y’ekitasi* kibuyirire ekyo Musa, omughombe w’oMungu w’ekwenene, abwira Abaisraeli omo mbwarara ati babye bakateka.
10 Abakulu bosi n’abandu bosi mubatsema, mubabya bakaleta ebihembo n’erihirabyo omo kasanduku ako erihika oko kika kamusula.*
11 Abalawi ibakabya babileta akasanduku batoke erihako omwami, neryo ibalangira ngoko muswire esyofranga, omusekretere w’omwami n’omutumwa w’omukulu w’abahereri ibakasa, ibalusya esyofranga syosi sy’omo kasanduku, kandi ibatasyasubya akasanduku aho kalue. Ibakakola batya buli kiro, kandi ibakakuma-kuma esyofranga nene.
12 Neryo omwami na Yehoyada ibakahasyo ababya bakimanira omubiiri w’erikokotya ehekalu ya Yehova. Neryo nabo ibakaliha ababya bakatwa amabwe n’abafundi ababya bakakokotya enyumba ya Yehova. Ibakaliha n’ababya bakahimba omo kyuma n’omo kwivre* batoke erikokotya enyumba ya Yehova.
13 Ababya bakimanira omubiiri mubatsukisyagho, n’omubiiri oyo ow’erikokotya ehekalu mwalola embere bakasondolagho. Mubakokotya ehekalu y’oMungu w’ekwenene n’eriwatyayo.
14 Mubabya babinabugha, mubaletera omwami na Yehoyada esyofranga esyasaka. Neryo esyofranga esyo musyakolesibwa erikokotya ebindu by’erikolesya omo nyumba ya Yehova, ni bugha ambu, ebindu by’erikolesya omw’ikola omubiiri n’eriherera ebihembo, ebikombe, n’ebindu by’ehoro n’eby’efeza.* Neryo buli kiro, abandu mubabya bakaherera amahere w’eryokererya oko hekalu ya Yehova omo biro byosi ebyo Yehoyada abya iniakineho.
15 Yehoyada mwabya abibugha emyaka mingyi, mwahola. Mwahola iniawite oko myaka 130.
16 Mubamuta omo Muyi wa Daudi aho bakata abami, busana n’emyatsi yosi eyuwene eyo akolera Abaisraeli, oMungu w’ekwenene, n’ehekalu yiwe.
17 Yehoyada mwabya abihola, abakulu be Yuda mubasyakukama embere sy’omwami, n’omwami mwabahulikirira.
18 Mubalekerania ehekalu ya Yehova, oMungu w’abotata-kulu wabo, kandi mubatsuka eriramya emiti mibuyirire* n’esyosanamu, n’ekyo mukyaleka oMungu iniahitana oko bandu be Yuda n’abe Yerusalema busana n’ekosa yabo.
19 Na Yehova mwabya akatuma abaminyereri batoke eribawatikya erimusubira. Abaminyereri abo mubabya bakabakunga, aliwe mubabya bakaghana eribahulikirira.
20 Ekirimu ky’oMungu mukyasa oko* Zekaria mughala w’omuhereri Yehoyada. Neryo Zekaria mwimana ahayisumbire, amabwira abandu ati: “OMungu w’ekwenene ati, ‘Busanaki mukaghana erikwama emighambo ya Yehova? Simwenditoka mwatsi! Mwabirileka Yehova, neryo naye akendibaleka.’”
21 Aliwe mubamuhotera, bamamwita omo mabwe omo kibugha ky’ehekalu ya Yehova. Omwami yo wabugha ati bamwite.
22 Omw’ikola atya, omwami Yehoashi mwatibuka olwanzo oluteleghula olo baba wiwe Yehoyada, baba wa Zekaria, amukanganaya; mwita mughala wiwe, mughala wiwe oyo mwahola inianemubugha ati: “Yehova akutswere n’erikuliha.”
23 Oko mwanzo w’omwaka, abasuda Abasiria mubasyalwa na Yehoashi; mubatimba oko Yuda ne Yerusalema. Abasiria mubita abakulu bosi b’abandu, n’ebindu byosi ebyo banyegha, mubatumirabyo omwami we Damasko.
24 Nomo bine bitya, abasuda Basiria abasyalwa n’Abaisraeli babya bake kutsibu, aliwe Yehova mwawatikya Abasiria abo erisinga abasuda banene kutsibu, kundi abandu babya ibabirileka Yehova, oMungu w’abotata-kulu wabo; neryo Abasiria mubaha Yehoashi y’amalipizi agho Mungu abugha ati akendisyahabwa.
25 Omughulu Abasiria basubula (kundi mubamusigha iniabirihutala kutsibu),* abaghombe biwe-biwe mubamuhotera kundi muta omusasi w’abaghala* b’omuhereri Yehoyada. Mubamwitira oko ngyingo yiwe. Neryo kw’ahola atya. Neryo mubamuta omo Muyi wa Daudi, aliwe mubatamuta aho bakata abami.
26 Aya w’amena w’abandu abamuhotera: Zabadi, mughala wa Shimeati Omuamoni-mukali, na Yehozabadi mughala wa Shimriti, Omumoabu-mukali.
27 Eyindi myatsi eyilebirye abaghala biwe, ebinywa binene ebyo bamubwira bakamukunga, n’omubiiri w’eritasyakokotya* ehekalu y’oMungu w’ekwenene, ebyosi ebyo binahandikire omo masako awali omo Kitabu ky’abami. Enyuma sy’aho, mughala wiwe Amazia mwabya mwami omo mwanya wiwe.
Amaelezo awehikwa
^ Kutse “Omusolo.”
^ Kutse “y’omusolo.”
^ Kutse alinga, “erihika omughulu abosi babugha eriteka.”
^ Kutse “mulinga.”
^ Ni kindu ky’obughuli ekikalua omo kitaka.
^ Ulebaye Amaana w’ebinywa.
^ Kinywa kwa kinywa, “mukyambala.”
^ Kutse “iniakwire amakoni mangyi.”
^ Kutse “w’omughala.” Kitokekene hano, omundu mughuma amahulwa mo banene busana n’erimusikya.
^ Kinywa kwa kinywa, “n’efondasyo.”
