Emyatsi y’Emighulu y’Akabiri 25:1-28
25 Amazia abya n’emyaka 25 omughulu abya mwami, kandi mwatabala oko myaka 29 iniane e Yerusalema. Mama wiwe abya akahulwa mo Yehoadani, abya we Yerusalema.
2 Amazia mwabya akakola ebyuwene omo meso wa Yehova, aliwe mwatakolabyo n’omutima wosi.
3 Mwabya abiwatya obwami bwiwe, mwita abakulu abita baba wiwe, oyo wabya mwami.
4 Aliwe mwatita abaghala b’abakulu abo, kundi mwakwama ebihandikire omo Mighambo, omo kitabu kya Musa, omo Yehova akabugha ati: “Abobaba sibangitibwa busana n’ebyo bana babo balyakola, n’abana sibangitibwa busana n’ebyo abobaba wabo balyakola. Omundu akendisyabya akakwa busana n’erilolo riwe-riwe.”
5 Neryo Amazia mwahindania abandu be Yuda, amabimania erikwamana n’ebitunga byabo, erikwamana n’abakulu b’amaelfu, kandi erikwamana n’abakulu b’amamia. Mwakolera atya abandu bosi be Yuda ne Benyamini. Mwahandika abalume b’eritsuka oko myaka 20. Mwaghanzabo, bamabya balume abasi erilwa* 300 000 abakendibya basuda. Babya ibasi erikolesya eritumo n’engabo nene.
6 Kandi mwaliha esyotalanta* 100 sy’efeza* sy’abasuda 100 000 be Israeli batoke erimuwatikya erilwa.
7 Aliwe omundu w’oMungu w’ekwenene mwayasungana naye, amamubwira ati: “Mwami, isiwaghenda n’abasuda be Israeli, kundi Yehova syali haghuma n’abasuda be Israeli, syali haghuma n’Omuefraimu wosi-wosi.
8 Ughende ighuwene, ukole, kandi ulwe n’obutubaha. Wamaghenda nabo, oMungu w’ekwenene inianganaleka iwawa ahisi embere sy’enzighu, kundi oMungu ali n’obutoki bw’eriwatikya omundu kutse erileka iniawa ahisi.”
9 Neryo Amazia mwabulya omundu w’oMungu w’ekwenene ati: “Ibwa bikendibya biti oko syotalanta 100 esyo niryaha abasuda be Israeli?” Omundu w’oMungu w’ekwenene mwamusubirya ati: “Yehova anawite obutoki bw’erikuha ebinene okw’aho.”
10 Neryo Amazia mwabwira abasuda be Efraimu abasa eyo ali ati basube ewabo, aliwe mubahitana kutsibu oko bandu be Yuda. Neryo mubasuba ewabo ibanahitene kutsibu.
11 Neryo Amazia mwabya n’obutubaha, amatwala abasuda biwe omo Musya w’Omunyu. Mwita abalume 10 000 be Seiri.
12 Abandu be Yuda nabo mubahamba abalume 10 000 ibakineho. Enyuma sy’aho, mubabatwala endata-ndata oko lubwe, bamabatogherya ahisi, neryo emibiri y’abosi abo yamatsutsangika.
13 Abasuda abo Amazia abwira ati isibaghenda naye omo malwa aliwe basubule, mubayalwa n’emiyi ye Yuda, eritsuka e Samaria eriyahika e Bete-horoni; mubita abikalani 3 000 be Yuda n’eriheka ebindu binene ebyo banyegha.
14 Aliwe Amazia mwabya abilua eyo ayita Abaedomu, mwaleta emiungu y’abandu be Seiri, amayimaniryayo mo miungu yiwe. Mwatsuka erikukamirayo n’eritumbiryayo omuki w’amahere.
15 Neryo Yehova mwahitana kutsibu oko Amazia. Mwamutumako omuminyereri, n’omuminyereri oyo mwamubwira ati: “Busanaki ukaramaya emiungu y’abandu aba, emiungu eyatasabula abandu bayo omughulu walwa nabo?”
16 Omughulu omuminyereri oyo abya akakania n’omwami, omwami mwabugha ati: “Twabirikuha omubiiri w’erihana omwami kwe? Lekeraho! Bite biya, itukendikwita.” Neryo omuminyereri oyo mwaluaho. Aliwe embere alueho, mwabugha ati: “Ninasi ngoko oMungu abiriyisogha erikubughaho, kundi mukakola ekyo kandi siwetahulikirira erihano ryaghe.”
17 Neryo omwami Amazia we Yuda mwakania n’abahani biwe. Enyuma sy’aho, mwatuma omulaghe w’oko Yehoashi mughala wa Yehoahazi, mughala wa Yehu, omwami we Israeli. Mwamulayirako ati: “Asa, ingye naghu tulwe.”*
18 Omwami Yehoashi we Israeli mwatumira omwami Amazia we Yuda ekisubiryo kino: “Ekiti ekiriko amahwa kye Lebanoni mukyatumira omuti w’omuerezi we Lebanoni omulaghe ono, ‘Uhe mughala waghe y’omwali waghu abye mukali wiwe.’ Aliwe, enyama y’omoli ye Lebanoni muyalaba hakuhi n’aho, yamalyatangira ekiti ekiriko amahwa ekyo.
19 Wabiribugha uti, ‘Mulangire, nabirisinga* e Edomu.’ N’ekyo kyabirileka omutima waghu iniayiheka, kandi abiryanza eripipwa. Aliwe usighale omo nyumba yaghu.* Busanaki ukasonda eriyiletera obuhanya n’erikola ekikendileka iwatera, n’erileka e Yuda iyawa ahisi haghuma naghu?”
20 Aliwe Amazia mwatowa, kundi oMungu w’ekwenene abya anzire emyatsi iyabya yitya. OMungu abya iniabiriyisogha erihira Amazia n’abandu biwe omo byala by’esyonzighu, kundi mubaramya emiungu ye Edomu.
21 Neryo omwami Yehoashi we Israeli mwayalwa n’omwami Amazia we Yuda e Bete-shemeshi, eyiri omo kiharo kye Yuda.
22 Abandu be Israeli mubasinga abandu be Yuda. Abandu be Yuda mubatibitira ewabo.*
23 Omwami Yehoashi we Israeli mwahamba Amazia, omwami we Yuda, mughala wa Yehoashi, mughala wa Yehoahazi.* Mwamuhambira e Bete-shemeshi. Enyuma sy’aho, mwamutwala e Yerusalema. Mwabya abihikayo, amatobola ekitobo ky’omo luhimbo lweYerusalema, ekitobo ky’amaboko 400.* Kyabya ikitsukire oko Lukyo lwa Efraimu ikyayahika oko Lukyo l’oko Ngonde.*
24 Omwami we Israeli mwimya ehoro n’efeza* yosi n’ebindu byosi ebyabya omo hekalu y’oMungu w’ekwenene ebyabya ewa Obedi-edomu, n’ebyabya omo byumba by’eribikamo ebindu by’obughuli by’oko nyumba y’omwami, mwaheka n’abanyewa. Enyuma sy’aho, amasuba e Samaria.
25 Omwami Amazia we Yuda, mughala wa Yehoashi, mwabugha eyindi myaka 15 omwami Yehoashi we Israeli, mughala wa Yehoahazi, abihola.
26 Eyindi myatsi eyilebirye Amazia, eritsuka oko mwanzo erihika oko mwiso, eyosi eyo yinahandikire omo Kitabu ky’abami be Yuda n’abe Israeli.
27 Eritsuka omughulu Amazia aloleraya oko Yehova k’omughongo, abandu mubatsuka erimuhotera e Yerusalema, neryo mwatibitira e Lakishi. Aliwe mubatuma abandu bamukwamirire e Lakishi, n’abandu abo mubamwitira eyo.
28 Mubasubulya ekinda kiwe oko syosabayiri,* neryo mubamuta omo muyi we Yuda, aho bata abotata-kulu wiwe.
Amaelezo awehikwa
^ Kinywa kwa kinywa, “abasombwere.”
^ Etalanta nguma ini bilo 34,2. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “tuhindane busu kwa busu.”
^ Kinywa kwa kinywa, “wabirisinga.”
^ Kutse “enyumba yaghu y’obwami.”
^ Kinywa kwa kinywa, “omo mahema wabo.”
^ Kandi akahulawa mo Ahazia.
^ Hakuhi esyometre 178. Ulebaye Endomeko B14.
^ Kutse “Sonda; Coin.”
^ Ni kindu ky’obughuli ekikalua omo kitaka.
^ Kutse “syofarasi; syoshevale.”
