Emyatsi y’Emighulu y’Akabiri 26:1-23
26 Neryo abandu bosi be Yuda mubayira Uzia mo mwami omo mwanya wa baba wiwe Amazia. Uzia abya n’emyaka 16 omughulu abya mwami.
2 Mwatasyahimba omuyi we Eloti, amatasyasubyagho oko kiharo kye Yuda omwami* abihola ngoko abotata-kulu wiwe bahola.
3 Uzia abya n’emyaka 16 omughulu abya mwami. Mwatabala oko myaka 52 iniane e Yerusalema. Mama wiwe abya iniakahulawa mo Yekolia; abya we Yerusalema.
4 Mwabya akakola ebyuwene omo meso wa Yehova ngoko baba wiwe Amazia akola.
5 Mwasondya-sondya oMungu omo biro byosi ebyo Zekaria abya inianeho. Zekaria mwamukangirirya erisagha oMungu w’ekwenene. Omughulu abya akasondya-sondya Yehova, oMungu w’ekwenene mwamutsumula.
6 Uzia mwayalwa n’Abafilistini. Mwatobola ebitobo omo luhimbo lwe Gati, omo luhimbo lwe Yabne, n’omo luhimbo lwe Ashdodi. Enyuma sy’aho, mwahimba emiyi omo kiharo kye Ashdodi n’ew’Abafilistini.
7 OMungu w’ekwenene mwabya akamuwatikya akalwa n’Abafilistini n’Abaarabu ababya bikere e Guru-baali, kandi mwabya akamuwatikya akalwa n’abandu be Meunimu.
8 Abaamoni mubatsuka eribya bakaliha Uzia y’engemo. Neryo Uzia mwaminywa kutsibu eriyahika ne Misri, kundi abya n’akaghala kanene.
9 Kandi Uzia mwahimba ehileberyo e Yerusalema hakuhi n’Olukyo l’oko Ngonde,* hakuhi n’Olukyo l’Omusya, kandi hakuhi n’Enzegho Eyikahambirira Oluhimbo, kandi mwawatyahyo.
10 Kandi mwahimba ehileberyo omo mbwarara, amatakulamo n’ebyuna binene by’amaghetse (kundi abya n’esyonyama nene); mwakola atya n’omo Shefela n’omo ribanda. Abya n’abalimi n’abakalima emizabibu omo bitwa ne Karmeli, kundi abya inianzire obulime.
11 Kandi Uzia mwayira abasuda abali n’ebindu by’amalwa. Ibakaya oko mwalwa ibanapangire mo bikuto-bikuto. Omusekretere Yeieli n’omukulu Maaseya mubaghanzabo n’erihandikabo bakasondolwa na Hanania, omughuma w’oko bakulu b’omo butabali b’omwami.
12 Abakulu bosi b’ebitunga ababya bimanire abasuda abo b’amaka babya 2 600.
13 Babya bimanire abasuda 307 500 abane tayari erilwa, babya basuda b’amaka abakawatikaya omwami erilwa n’esyonzighu siwe.
14 Uzia mwaha abasuda bosi b’esyongabo, amatumo, ebikeke by’ekyuma, amakoti w’ekyuma, obuta,* n’emijeledi.
15 Kandi, mwakokoterya e Yerusalema amasini w’amalwa, awakokotibawa n’abafundi. Mubahiragho oko hileberyo n’oko syongonde* sy’esyombimbo; amasini ayo w’amalwa abya iniakaghusa emisali n’amabwe manene-manene. Ekyo kyo kyaleka Uzia iniakumayira eriyahika omo biharo by’ehali, kundi mwabana obuwatikya bunene neryo amabya n’akaghala.
16 Aliwe Uzia mwabya abibya n’akaghala, omutima wiwe mwabyamo emiyiheko, n’ekyo mukyamukolya oko buhanya, kandi mwaleghula oko Yehova oMungu wiwe. Mwingira omo hekalu ya Yehova akayahisirya obukwa oko kiherero ky’obukwa.
17 Aho n’aho omuhereri Azaria n’abandi bahereri 80 ba Yehova abatyubaha mubingira omo hekalu abingiramo.
18 Mubayihanda oko mwami Uzia n’erimubwira bati: “Uzia, s’iwe utolere erihisirirya obukwa bo Yehova! Abahereri basa bo batolere ibahisyabo, kundi ni bitsikulu ba Haruni, abayirawa mo babuyirire. Ulua omo hekalu, kundi wabirileghula, na Yehova Mungu syendikuha olukengerwa busana n’ekyo wamakola.”
19 Aliwe Uzia mwahitana kutsibu, abya iniane n’ekindu ky’erihisiryako obukwa omo byala biwe. Iniakinahitene oko bahereri, ebihagha mubyasa oko mbumo yiwe, embere sy’abahereri, omo nyumba ya Yehova, hakuhi n’ekiherero ky’obukwa.
20 Azaria, omukulu w’abahereri, n’abandi bahereri bosi babere babibindukira eyo ali, mubalangira iniamabibyako ebihagha oko mbumo! Neryo mubamulusya aho ho luba-luba, naye iyuwene-wene mwalw’inialuaho luba-luba, amatibitira ehihya, kundi Yehova abya iniabirimuha amalipizi.
21 Omwami Uzia mwahika okw’ihola ini muhagha; mwikala omo nyumba mw’iyuwene kundi ini muhagha, abya isyangasyahika omo nyumba ya Yehova. Mughala wiwe Yotamu yo wabya akasondola enyumba y’omwami, kandi yo wabya akasoha esyombanza sy’abandu b’omo kihugho.
22 Eyindi myatsi eyilebirye Uzia, eritsuka oko mwanzo erihika oko mwiso, eyosi eyo yahandikawa n’omuminyereri Isaya mughala wa Amozi.
23 Uzia mwahola ngoko abotata-kulu wiwe bahola. Mubamuta aho bata abotata-kulu wiwe, aliwe iye mubamuta omo mahero w’abami, kundi mubabugha bati: ”Ni muhagha.” Neryo mughala wiwe Yotamu mwabya mwami omo mwanya wiwe.
Amaelezo awehikwa
^ Ni bugha ambu, baba wiwe ye Amazia.
^ Kutse “Sonda; Coin.”
^ Ni kindu ky’erilasamo emisali.
^ Kutse “syosonda; coins.”
