Emyatsi y’Emighulu y’Akabiri 28:1-27
28 Ahazi abya n’emyaka 20 omughulu abya mwami. Mwatabala oko myaka 16 iniane e Yerusalema. Mwatakola ebyuwene omo meso wa Yehova, iye syabya nga Daudi tata-kulu wiwe.
2 Aliwe, mwakwama emibere mibi y’abami be Israeli. Nibya mwakokotya n’esyosanamu sya Baali esy’emetale eyo balyayeyukaya.
3 Kandi, mwabya akatumbya omuki w’amahere omo Musya w’Omughala wa Hinomu.* Mwatimya abaghala biwe omo muliro akakwama emyatsi mibi y’ebihanda ebyo Yehova atibitako bilue embere sy’Abaisraeli.
4 Kandi mwabya akaherera amahera n’eritumbya omuki w’amahere omo myanya y’endata, oko hitwa, n’omo ndina sy’obuli muti owaboghire.
5 Neryo Yehova oMungu wiwe mwamuhira omo byala by’omwami we Siria, neryo Abasiria mubamusinga, bamaheka abandu banene mo banyewa, n’eribatwala e Damasko. Kandi oMungu mwahira Ahazi omo byala by’omwami we Israeli, neryo omwami we Israeli mwita abasuda banene ba Ahazi.
6 Kundi Peka mughala wa Remalia mwita abalume 120 000 omo kiharo kye Yuda omo kiro kighuma, abosi babya balume abatesagha, kusangwa abandu be Yuda mubaleka Yehova oMungu w’abotata-kulu wabo.
7 Na Zikri, omusuda Muefraimu, mwita Maaseya mughala w’omwami, na Azrikamu oyo wabya imanire enyumba y’omwami, na Elkana oyo wabya asubukire omwami.
8 Kandi Abaisraeli mubaheka abalikyabo 200 000 mo banyewa; mwabya abakali, abana b’obulume n’ab’obukali. Mubaheka n’ebindu binene, bamatwalabyo e Samaria.
9 Aliwe e Samaria yabya omuminyereri mughuma wa Yehova oyo wabya akahulwa mo Odedi. Mwayasungana n’abasuda abasa e Samaria, amababwira ati: ”Muhulikirire! Yehova, oMungu w’abotata-kulu wenyu, alue iniahitene oko bandu be Yuda, kyo kiryaleka iniabahira omo byala byenyu, neryo mumukitabo omo buhitane obulyahika n’elubula.
10 Neryo lino, mwanzire imwayira abandu be Yuda n’abe Yerusalema mo baghombe benyu b’obulume n’ab’obukali. Mwabiribirirwa ngoko nenyu muneko olubanza embere sya Yehova oMungu wenyu?
11 Neryo munihulikirire: Musubulaye abanyewa abo mulyalusaya eyiri abalikyenyu be Yuda, kundi Yehova abiribahitanako kutsibu.”
12 Neryo abakulu balebe b’Abaefraimu, ye Azaria mughala wa Yehohanani, Berekia mughala wa Meshilomoti, Yehizkia mughala wa Shalumu, na Amasa mughala wa Hadlai, mubayihanda oko bandu ababya bakalua oko malwa.
13 Mubababwira bati: “Isimwaleta abanyewa bo hano, kundi ekyo kikendileka itwabyako olubanza embere sya Yehova. Ekyo mwanzire erikola kikenditasyatomeka oko malolo wetu kw’awandi n’eritomeka oko kosa yetu kw’eyindi, kundi kwanza tuliko olubanza lunene kandi oMungu ahitene kutsibu oko Israeli.”
14 Neryo abasuda ababya n’ebindu by’amalwa mubimya abanyewa n’ebindu ebyo banyegha, bamahabyo abakulu n’Abaisraeli bosi ababya bahindene.
15 Enyuma sy’aho, abalume abasombolawa erikwamana n’amena wabo mubimya abanyewa abo, bamaha abosi b’amubo ababya ndumbu b’esyongyimba esyo bimaya oko bindu ebiryanyeghawa, neryo mubambalyabo, bamahabo ebiryato, akalyo n’eby’erinywa, n’amaghuta w’erihakaba. Kandi mubaheka abaleghetsene oko syopunda, bamatwalirabo abalikyabo e Yeriko, omuyi w’emiti y’etende. Enyuma sy’aho, bamasuba e Samaria.
16 Oko mughulu oyo, omwami Ahazi mwasaba abami be Asiria b’obuwatikya.
17 Kandi Abaedomu mubalwa ne Yuda, bamatimba oko kiharo kye Yuda n’eriheka abandu mo banyewa.
18 N’Abafilistini mubayalwa n’emiyi ye Shefela n’eye Negebu eyiri omo kiharo kye Yuda, mubahamba n’omuyi we Bete-shemeshi, Aiyaloni, Gederoti, Soko n’emilongo eyabya yitimbire kuyo, mubahamba n’omuyi wa Timna n’emilongo eyabya yitimbire kugho, Gimzo n’emilongo eyabya yitimbire kuyo; neryo bamikalamo.
19 Yehova mwasubya Yuda y’ahisi busana n’omwami Ahazi we Israeli, kundi mwaleka abandu be Yuda ibatabya bakayikakirya, neryo mubaleghula kutsibu oko Yehova.
20 Oko mughulu mulebe, omwami Tilgati-pilneseri owe Asiria mwasyalwa na Ahazi. Mwamwaghalya omo mwanya w’erimuwatikya.
21 Ahazi mwaheka ebindu ebyabya omo hekalu ya Yehova, omo nyumba y’omwami, n’omo manyuma w’abakulu, amatwalirabyo omwami we Asiria mo kihembo; aliwe ekyo mukitaleka iniabala.
22 Omughulu omwami Ahazi abya akaghalwa, mwatasyaleghula kutsibu oko Yehova.
23 Mwatsuka eriherera amahere w’emiungu ye Damasko eyamusinga, kandi mwabugha ati: “Kundi emiungu y’abami be Siria inemuwatikyabo, ngendihererayo amahere naghe itoke eriniwatikya.” Aliwe muyaleka iye n’Abaisraeli bosi ibahikirwa n’obuhanya.
24 Kandi Ahazi mwakuma-kuma ebindu by’omo hekalu y’oMungu w’ekwenene; enyuma sy’aho, amatsutsanga ebindu by’omo hekalu y’oMungu w’ekwenene mo bihande-bihande, amakinga emilango y’ehekalu ya Yehova, amayihimbira n’ebiherero omo buli ngonde* ye Yerusalema.
25 N’omo miyi yosi ye Yuda, mwahiramo emyanya y’endata atoke eribya akatumbirya eyindi miungu omuki w’amahere, kandi mwahitania Yehova, oMungu w’abotata-kulu wiwe.
26 Eyindi myatsi eyilebirye Ahazi, ebyosi ebyo akola, ebyosi ebyo binahandikire eritsuka oko mwanzo erihika oko mwiso omo Kitabu ky’abami be Yuda n’abe Israeli.
27 Ahazi mwahola ngoko abotata-kulu wiwe bahola, Mubamuta omo muyi, e Yerusalema. Aliwe mubatamuta omo mahero w’abami be Israeli. Neryo mughala wiwe Hezekia mwabya mwami omo mwanya wiwe.
