Emyatsi y’Emighulu y’Akabiri 29:1-36
29 Hezekia mwabya mwami iniawite oko myaka 25. Mwatabala oko myaka 29 iniane e Yerusalema. Mama wiwe abya iniakahulawa mo Abia; abya mwali wa Zekaria.
2 Hezekia mwabya akakola ebyuwene omo meso wa Yehova, ngoko tata-kulu wiwe Daudi akola.
3 Oko mwisi w’erimbere w’omwaka w’erimbre w’obutabali bwiwe, mwakingula emilango y’enyumba ya Yehova n’erikokotyayo.
4 Enyuma sy’aho, mwaleta abahereri n’Abalawi, amahindaniabo omo mwanya owabya oko luhande lw’eyo ryuba rikasira.
5 Neryo mwababwira ati: “Inywe Balawi, munihulikirire. Lino muyeraye, mweraye n’enyumba ya Yehova oMungu w’abotata-kulu wenyu. Mulusaye omo mwanya owabuyirire mw’ekindu ekiterire.
6 Kundi abobaba wetu mubaleghula oko Mungu, kandi mubakola ebituwene omo meso wa Yehova oMungu wetu. Mubamuleka, bamalolerya oko hema ya Yehova k’omughongo, naye bamamuleleryako omughongo.
7 Kandi mubakinga n’emilango y’ebaraza, bamalimya n’esyotala. Mubaleka erihisirya oMungu we Israeli y’obukwa omo mwanya owabuyirire, kandi bamaleka n’erimuherera amahere w’eryokererya.
8 Neryo Yehova mwahitana kutsibu oko bandu be Yuda n’abe Yerusalema, neryo ababya bakabalangira mubabya bakasagha n’erikukubala n’erisughunda,* ngoko mwanganayilangirirakyo.
9 Ekyo mukyaleka abotata-kulu wetu ibitibwa omo muyali, n’abana betu b’obulume n’abana betu b’obukali, n’abakali betu mubatwalwa omo bunyewa.
10 Neryo lino, nanzire erikola endaghane haghuma na Yehova, oMungu we Israeli, kusudi ekinigha kiwe kitulueko.
11 Baghala baghe, eno s’iye ndambi y’eribya balundu,* kundi Yehova abiribasombola mutoke eribya mukimana embere siwe, erikola omubiiri, n’eritumbya omuki w’amahere wiwe.”
12 Abalawi mubabya babyowa ebinywa ebyo, bamayakola omubiiri. Omo Bakohati mwabya: Mahati mughala wa Amasai na Yoeli mughala wa Azaria. Omo Bamerari mwabya: Kishi mughala wa Abdi na Azaria mughala wa Yehaleleli. Omo Bagershoni mwabya: Yoa mughala wa Zima na Edeni mughala wa Yoa.
13 Omo baghala ba Elizafani mwabya: Shimri na Yeueli. Omo baghala ba Asafu mwabya: Zekaria na Matania.
14 Omo baghala ba Hemani mwabya: Yehieli na Shimei. Omo baghala ba Yedutuni mwabya: Shemaya na Uzieli.
15 Neryo mubahindania abaghala babo, bamayerya n’eryasa, ngoko Yehova anabwira omwami ati ababwire, batoke eryerya ehekalu ya Yehova.
16 Neryo abahereri mubingira omo nyumba ya Yehova batoke eryeryayo, kandi mubalusya omutsafu wosi ogho basunga omo nyumba ya Yehova, bamatwalagho omo kibugha ky’enyumba ya Yehova. Enyuma sy’aho, Abalawi mubimyagho, bamatwalagho ehihya, omo Musya we Kidroni.
17 Ko batsuka batya eryerya ehekalu omo kiro ky’erimbere ky’omwisi w’erimbere. Omo kiro kye 8 ky’omwisi, mubahika oko baraza ya Yehova. Muberya ehekalu ya Yehova omo biro 8, n’omo kiro kye 16 ky’omwisi w’erimbere mubabugha eryeryayo.
18 Enyuma sy’aho, mubaya ew’omwami Hezekia, bamabugha bati: “Twabiryerya enyumba yosi ya Yehova, ekiherero ky’amahere w’eryokererya n’ebindu byosi by’omo nyumba eyo, n’emesa y’erihirako emikati eyitomengekene,* n’ebindi bindu byosi.
19 N’ebindu byosi ebyo omwami Ahazi ahighula omughulu w’obutabli bwiwe, omughulu aleghula oko Mungu, twabiriteghekaniabyo n’eryeryabyo, bine embere sy’ekiherero kya Yehova.”
20 Neryo omwami Hezekia mwabuka omo tututu, amahindania abakulu b’omuyi, bamerukira eyiri ehekalu ya Yehova.
21 Mubaghenda n’esyonume sy’esyonde 7, esyombangale 7, ebyana by’esyombuli by’obulume 7, n’esyombaya 7 ebikendibya buhere bw’erilolo busana n’ekihanda ky’omwami, ehekalu, n’abandu be Yuda. Enyuma sy’aho, omwami mwabwira abahereri, abitsikulu ba Haruni, ati bahererebyo oko kiherero kya Yehova.
22 Mubakera esyonume sy’esyonde esyo, neryo abahereri mubimya oko musasi wasyo, bamatsatsangagho oko kiherero. N’enyuma sy’aho, mubakera esyombangale, bamatsatsanga omusasi wasyo oko kiherero, kandi mubakera ebyana by’esyombuli eby’obulume, bamatsatsanga omusasi wabyo oko kiherero.
23 Enyuma sy’aho, mubaleta esyombaya esikendibya buhehere bw’erilolo embere sy’omwami n’embere sy’Abaisraeli ababya bahindene, neryo bamahira ebyala byabo byo kusyo.
24 N’abahereri mubakerasyo, bamahererasyo mo buhere bw’erilolo. Mubatsatsanga omusasi wasyo oko kiherero, Abaisraeli bosi batoke erighanyirwa, kundi omwami mwabugha ati obuhere bw’eryokererya n’obuhere bw’erilolo bitolere ibyahererwa busana n’Abaisraeli bosi.
25 Oko mughulu oyo, omwami mwahira Abalawi omo myanya yabo omo hekalu ya Yehova ibane n’amasengo,* ebyombo by’omuziki by’esyosinga, n’esyonanga, erikwamana n’ebyalayiro bya Daudi, Gadi omulangiri w’omwami, n’omuminyereri Natani, kundi Yehova mwateka ebyalayiro ebyo erilabira abaminyereri biwe.
26 Neryo Abalawi mubimana aho ibanawite oko byombo by’omuziki bya Daudi, n’abahereri ibanawite oko syongunga.
27 Enyuma sy’aho, Hezekia mwabugha ati baherere obuhere bw’eryokererya oko kiherero. Omughulu batsuka eriherera obuhere bw’eryokererya oko kiherero, ‘olwimbo lw’eripipa Yehova nalo mulwatsuka. Mubatsuka eriwata n’esyongunga, ibanemusondolwa n’ebyombo by’omuziki bya Daudi, omwami we Israeli.
28 Abaisraeli bosi ababya bahindene mubakukama olwimbo lukimbwa n’engunga ikawatwa. Mubakola batya erihika omughulu obuhere bw’eryokererya bwahwa erihererwa.
29 Mubabya babinabugha eriherera obuhere bw’eryokererya, omwami n’abosi ababya haghuma naye mubakukama n’erihira obusu bwabo oko kitaka.
30 Enyuma sy’aho, omwami Hezekia n’abakulu mubabwira Abalawi bati bapipe Yehova omw’isubirira omo binywa bya Daudi n’eby’omulangiri Asafu. Neryo mubapipa oMungu n’obutseme bunene, kandi mubakukama n’erihira obusu bwabo oko kitaka.
31 Neryo Hezekia mwabugha ati: “Neryo lino, kundi mwabirilusibwa omo bandi busana n’erikolera Yehova, mwase, mulete eyiri enyumba ya Yehova y’amahere n’ebihembo by’eriha ewasingya.” Neryo Abaisraeli ababya bahindene mubatsuka erileta amahere n’ebihembo by’eriha ewasingya, abosi ababya n’omutima w’erihitya mubaleta esyonyama esikendibya buhere bw’eryokererya.
32 Esyonyama esikendibya buhere bw’eryokererya esyo Abaisraeli baleta syabya esyonde 70, esyombangale 100, n’ebyana by’esyombuli eby’obulume 200. Esyonyama syosi esyo syabya sy’eriherera Yehova mo buhere bw’eryokererya.
33 N’ebihembo bibuyirire mubyabya esyonde 600 n’esyombuli 3 000.
34 Aliwe sihabya abahereri abatosire abangalusya oko syonyama syosi esyo sy’obuhere bw’eryokererya kw’engobi. Neryo abalikyabo Balawi mubawatikyabo erihika omughulu omubiiri oyo ahwa n’erihika omughulu abahereri babugha eriyerya, kundi Abalawi babya n’omuhwa* kulenga abahereri oko mwatsi owalebirye eriyerya.
35 Kandi, habya esyonyama nyingi esikendibya buhere bw’eryokererya, habya n’ebisabu by’amahere w’obuholo n’ebihembo by’obwabu by’oko mahere w’eryokererya. Omubiiri w’oko hekalu ya Yehova kw’atasyatsukisibawa* atya.
36 Neryo Hezekia n’abandu bosi mubatsema busana n’emyatsi eyo Mungu w’ekwenene akolera abandu, kundi ebyosi ebyo mubyahika kitsumbukirania.
Amaelezo awehikwa
^ Kutse “n’eribasekererya.”
^ Kutse “y’eriluhuka; y’eriyiteka.”
^ Ni bugha ambu, emikati y’erikangania.
^ Kutse “n’esyosembale.”
^ Kinywa kwa kinywa, “babya n’omutima owalungukere.”
^ Kutse “kw’atasyateghekanibawa.”
