Emyatsi y’Emighulu y’Akabiri 3:1-17
3 Neryo Solomona mwatsuka erihimba enyumba ya Yehova e Yerusalema oko Kitwa kye Moria, aho Yehova ahulukira baba wiwe ye Daudi. Mwahimbayo omo mwanya ogho Daudi ateghekanaya omo kihumbiro kya Ornani Omuyebusi.
2 Mwatsuka erihimbayo omo kiro ky’akabiri ky’oko mwisi w’akabiri, oko mwaka w’akani w’obutabali bwiwe.
3 Esyofondasyo sy’enyumba y’oMungu w’ekwenene esyo Solomona ahimba syabya sy’amaboko 60 oko buli, n’esy’amaboko 20 oko bughali, erikwamana n’ebipimo bya kera.*
4 Ebaraza eyabya embere sy’enyumba yabya y’amaboko 20 oko buli; obuli bwayo bwabya bulingirirene n’obughali bw’enyumba, n’obuli bwabyo eriya endata bwabya bw’amaboko 20;* mwahaka emwisi wayo y’ehoro eyerire.
5 Mwahira omo kyumba kinene* mw’esyombagho sy’omuti w’ekilaghu; enyuma sy’aho, amahakamo ehoro eyuwene; n’enyuma sy’aho, amadesa omo kyumba ekyo mw’emiti y’etende n’eminyororo.
6 Kandi mwapamba enyumba omo mabwe aghuwene kandi aw’obughuli; n’ehoro eyo akolesaya yabya ye Parvaimu.
7 Mwahaka ehoro oko nyumba, oko makomba, omo myanya y’eyikwa y’oko milango, oko syombimbo, n’oko milango. Mwadesa oko syombimbo kw’abakerubi.
8 Neryo mwahimba Ahabuyirire Kutsibu,* habya n’obuli obulingene n’obughali bw’enyumba, ni bugha ambu, amaboko 20, n’obughali bwaho bwabya bw’amaboko 20. Mwahaka omo kyumba ekyo mw’esyotalanta* 600 sy’ehoro eyuwene.
9 Ehoro eyo bakokotaya mw’emisumari yabya esyosyekeli* 50; mwahaka n’omo byumba by’oko lutwe mw’ehoro.
10 Enyuma sy’aho, mwakokoterya omo Ahabuyirire Kutsibu* mw’abakerubi babiri, mwahaka kubo kw’ehoro.
11 Obuli bosi bw’ebipupa by’abakerubi bwabya bw’amaboko 20; ekipupa kighuma ky’omukerubi w’erimbere kyabya ky’obuli bw’amaboko atano kandi kyabya kitulirye oko luhimbo lw’enyumba, n’ekindi kipupa ky’omukerubi oyo kyabya ky’obuli bw’amaboko atano kandi kyabya kitulirye oko kindi kipupa ky’oghundi mukerubi.
12 Ekipupa kighuma ky’oghundi mukerubi kyabya ky’obuli bw’amaboko atano kandi kyabya kitulirye oko lundi luhimbo lw’enyumba, n’ekindi kipupa kiwe kyabya ky’obuli bw’amaboko atano kandi kyabya kitulirye oko kipupa kighuma ky’oko bipupa by’omukerubi w’erimbrere.
13 Ebipupa by’abakerubi aba byabya biyisanzire omo mwanya owakaluamo amaboko 20; babya bimanire oko bisando byabo n’obusu bwabo bwabya bulolere eyiri Ahabuyirire.*
14 Kandi mwakokotya erido omo syouzi sy’erangyi ye ble,* omo bweya bw’esyombuli bw’erangyi y’olubono-bono,* omo syouzi sy’erangyi y’omusasi, n’omo lukimba oluwene, amadesamo n’abakerubi.
15 Enyuma sy’aho, mwakokotya esyonduyi ibiri, amahirasyo embere sy’enyumba; syabya n’obuli bw’amaboko 35, n’embita y’oko buli nduyi yabya y’amaboko atano.
16 Kandi mwakokotya eminyororo eyiri ng’esyoshenete, amahirayo oko mitwe-mitwe y’esyonduyi; mwakokotya n’amakomamanga 100, amahiragho oko minyororo.
17 Mwimania esyonduyi esyo sy’embere w’ehekalu, mwimania enguma oko luhande lw’amali* n’eyindi oko luhande lw’amalembe.* Mwahula enduyi y’oko luhande lw’amali mo Yakini,* mwahula n’ey’oko luhande lw’amalembe mo Boazi.*
Amaelezo awehikwa
^ Oko kawaida, okuboko kughuma ini santimetre 44,5. Aliwe abandi bakalengekanaya bati ebinywa “ebipimo bya kera” bikamaanisaya okuboko kuli okwabya kw’esyosantimetre 51,8. Ulebaye Endomeko B14.
^ Ebindi bitabu bya kera bikahiraho amaboko 120. Ebindi bitabu bya kera n’esindi mbindula sy’eBiblia sikahiraho amaboko 20.
^ Kinywa kwa kinywa, “enyumba nene.’ Alinga ni Habuyirire.
^ Kinywa kwa kinywa, “enyumba.”
^ Etalanta nguma ini bilo 34,2. Ulebaye Endomeko B14.
^ Eshekeli nguma ini syograme 11,4. Ulebaye Endomeko B14.
^ Kinywa kwa kinywa, “enyumba.”
^ Kinywa kwa kinywa, “bwabya ibunalolere emwisi.”
^ Kutse “y’akaniki; y’omuteghule.”
^ Kutse “y’omunyama; ye pourpre.”
^ Kutse “oko luhande lw’eyikwa.”
^ Kutse “oko luhande lw’endata.”
^ Ni bugha ambu “awataye [ni bugha ambu, Yehova].”
^ Alinga ni bugha ambu “omo kaghala.”
