Emyatsi y’Emighulu y’Akabiri 30:1-27
-
Hezekia amakola Epasaka (1-27)
30 Hezekia mwatuma omulaghe oko bandu bosi be Israeli ne Yuda. Mwahandikira n’esyobaruha sy’abandu be Efraimu n’abe Manase ati base eyiri enyumba ya Yehova e Yerusalema batoke erikola Epasaka ya Yehova, oMungu we Israeli.
2 Aliwe, omwami, abakulu b’omo butabali bwiwe, n’Abaisraeli bosi ababya bahindene e Yerusalema babya ibabiriyisogha erikola Epasaka oko mwisi w’akabiri,
3 kundi mubatatoka erikolayo omo kiro ekyo ibeghere erikolwamo, kusangwa sihabya abahereri abatosire ababya ibabiriyerya n’abandu babya isibetayahindana e Yerusalema.
4 Neryo omwami n’abandu bosi ababya bahindene mubalangira endegheka* eyo iyamuwana.
5 Neryo mubayisogha erituma omulaghe omo Israeli yosi, eritsuka e Beeri-sheba eriyahika e Dani, bamabwira abandu bati base e Yerusalema erisyakola Epasaka ya Yehova oMungu we Israeli, kusangwa ebiro byabya ibyamabilaba isibetakolerayo haghuma ngoko kihandikire omo Mighambo.
6 Neryo erikwamana n’ekyo omwami abasaba erikola, abatumwa* mubalaba omo Israeli yosi ne Yuda ibane n’esyobaruha esyo omwami n’abakulu b’omo butabali bwiwe bahandika. Mubabya bakabwira abandu bati: “Inywe bandu be Israeli, musubire Yehova, oMungu wa Abrahamu, Isaka, na Israeli, naye atoke erisuba oko bandu betu abasaka, ababala omo byala by’abami be Asiria.
7 Isimwabya ng’abotata-kulu wenyu n’abaghala benyu abaleghula oko Yehova, oMungu w’abotata-kulu wabo, n’ekyo mukyaleka iniayirabo mo kindu ekikita obuba, ngoko munalangire.
8 Neryo lino, isimwakala-kalaya emitima yenyu ng’abotata-kulu wenyu. Mukwame obusondoli bwa Yehova, neryo mwase oko hekalu yiwe eyo abiryerya kera na kera kandi mukolere Yehova oMungu wenyu, ekinigha kiwe kitoke eribaluako.
9 Omughulu mukendisuba oko Yehova, ababiriyira abaghala benyu n’abana benyu b’obulume mo banyewa bakendikwirabo obulighe n’erilekabo basube omo kihugho kino, kundi Yehova oMungu wenyu ni w’obughanyiri kandi ni w’obullighe, kandi syendibalolyako omughongo mwamamusubira.”
10 Neryo abatumwa* mubalaba omo buli muyi w’omo kihugho kya Efraimu n’ekya Manase, eriyahika omo kihugho kya Zabuloni, aliwe abandu mubabya bakabaseka n’eribasekererya.
11 Nomo bine bitya, abandu balebe b’omo kihanda kya Asheri, ekya Manase, n’ekya Zabuloni mubayikehya, neryo bamasa e Yerusalema.
12 Ebyala by’oMungu w’ekwenene mubyabya n’oko bandu be Yuda, neryo mubabya omo bughuma, neryo mubakwama ebyalayiro ebyo omwami n’abakulu babaha erikwamana n’ekinywa kya Yehova.
13 Abandu bangyi mubahindana e Yerusalema batoke erikola Ekiro Kikulu ky’Emikati Eyitemo Levire* oko mwisi w’akabiri; babya bandu banene kutsibu.
14 Mubatsuka omubiiri, bamalusyaho ebiherero ebyabya e Yerusalema. Mubalusyaho ebiherero byosi by’obukwa, bamaghusabyo omo Musya we Kidroni.
15 Enyuma sy’aho, ekiro kye 14 ky’omwisi w’akabiri, mubakera esyonyama sy’Epasaka. Abahereri n’Abalawi mubakwa esisoni, neryo mubayerya, bamaleta eyiri ehekalu ya Yehova y’esyonyama esikendibya mahere w’eryokererya.
16 Mubimana omo myanya yabo ngoko Emighambo ya Musa, omundu w’oMungu w’ekwenene, yibughire. Enyuma sy’aho, abahereri mubatsa-tsanga omusasi oko kiherero ogho Balawi babaha.
17 Kundi omo bandu ababya bahindene mwabya abandu banene abatayeraya, Abalawi mubahabwa omubiiri w’erikera esyonyama sy’Epasaka sy’abandu bosi abatabya berire, abandu banene abo batoke eribya babuyirire embere sya Yehova.
18 Kundi abandu banene, kutsibu-tsibu abalua e Efraimu, e Manase, e Isakari, ne Zabuloni babya isibetayerya, aliwe mubalya oko Pasaka, nomo Emighambo yabya isiyibahamulire erikola batya. Aliwe Hezekia mwasabirabo ati: “Yehova, oMungu mubuya, aghanyire
19 obuli mundu oyulyateghekanaya omutima wiwe erisondya-sondya oMungu w’ekwenene, Yehova, oMungu w’abotata-kulu wiwe, nomo syetayerya erikwamana n’ebyalayiro by’obubuyirire.”
20 Na Yehova mwahulikirira Hezekia, amaghanyira* abandu abo.
21 Neryo Abaisraeli ababya e Yerusalema mubakola Ekiro Kikulu ky’Emikati Eyitemo Levire* omo biro 7 ibanemutsema kutsibu. Abalawi n’abahereri babya bakapipa Yehova obuli kiro ibanemuwatira Yehova ebyombo byabo by’omuziki.
22 Kandi, Abalawi bosi ababya bakakolera Yehova n’amenge, Hezekia mwabwirabo ebinywa by’eribasikya mutima, neryo abandu bosi n’Abalawi mubalya omo biro 7 by’ekiro kikulu ekyo. Babya bakaherera amahere w’obuholo n’erisima Yehova, oMungu w’abotata-kulu wabo.
23 Enyuma sy’aho, Abaisraeli bosi ababya bahindene mubayisogha erikola ekiro kikulu ekyo omo bindi biro 7, neryo mubakola ekiro kikulu ekyo n’obutseme omo bindi biro 7.
24 Omwami Hezekia we Yuda mwaha Abaisraeli ababya bahindene esyonume sy’esyonde 1 000 n’esyombuli 7 000, n’abakulu nabo mubaha Abaisraeli ababya bahindene esyonume sy’esyonde 1 000 n’esyombuli 10 000; n’abahereri banane kutsibu mubayerya.
25 Abandu bosi be Yuda ababya bahindene, abahereri, Abalawi, abandu bosi abalua e Israeli, abandu abatabya Baisraeli abalua omo kihugho kye Israeli n’ababya bikere e Yuda, abosi mubatsema.
26 Neryo omo Yerusalema mumwabya obutseme bunene, kundi eritsuka oko biro bya Solomona mughala wa Daudi, omwami we Israeli, omwatsi owali ng’oyo abya isyalyatabya omo Yerusalema.
27 Oko mwiso, abahereri Abalawi mubimana, bamatsumula abandu; n’oMungu mowa omulenge wabo, n’omusabe wabo mwahika elubula omo bwikalo bwiwe bubuyirire.
Amaelezo awehikwa
^ Kutse “omupango.”
^ Kinywa kwa kinywa, “abatibiti.”
^ Kinywa kwa kinywa, “abatibiti.”
^ Kutse “Kihamya.”
^ Kinywa kwa kinywa, “amalamya.”
^ Kutse “Kihamya.”
