Emyatsi y’Emighulu y’Akabiri 31:1-21
31 Mubabya babibugha ebyosi ebyo, Abaisraeli bosi ababya aho mubaya omo miyi ye Yuda, bamasambula esyonduyi nyibuyirire, bamaterya emiti mibuyirire,* n’erisambula emyanya y’endata n’ebiherero ebyabya omo Yuda yosi n’omo kiharo kyosi kya Benyamini, n’omo kiharo kya Efraimu n’ekya Manase, erihika omughulu batsandayabyo olosi. Enyuma sy’aho, Abaisraeli bosi mubasuba omo miyi yabo, obuli mundu oko kitaka kiwe.
2 Enyuma sy’aho, Hezekia mwahira abahereri omo bikuto byabo, n’Abalawi omo bikuto byabyo, obuli muhereri n’obuli Mulawi erikwamana n’omubiiri wiwe. Mwakola atya batoke eribya bakaherera amahere w’eryokererya n’amahere w’obuholo, batoke eribya bakakola omubiiri w’oMungu, kandi batoke eribya bakasima n’eripipa oMungu oko milango y’ebibugha* bya Yehova.
3 Omwami mwateka ekitswe ky’ebindu biwe kitoke eribya buhere bw’eryokererya, obuhere b’omo tututu n’ob’omw’igholo, obuhere bw’eryokererya bw’ekiro ky’Esabato, bw’ekiro kikulu ky’omughenda muhya-muhya, n’obw’ebindi biro bikulu, erikwamana n’ebyabya bihandikire omo Mighambo ya Yehova.
4 Kandi Hezekia mwabwira abandu be Yerusalema ati babye bakaha abahereri n’Abalawi ekitswe ekyo batolere erihabwa, batoke erikwama ndeke-ndeke emighambo ya Yehova.
5 Hezekia mwabya abibabwira atya, Abaisraeli mubateka engano nene y’erimbere-mbere, edivai nyihya-nyihya nene y’erimbere-mbere, amaghuta manene w’erimbere-mbere, n’obuki bunene bw’erimbere-mbere, n’ebyalya byosi by’erimbere-mbere ebyo balyeraya; mubaleta ekighuma ky’omw’ikumi kinene ky’ebindu byosi.
6 Abandu bosi be Israeli n’abe Yuda ababya bikere omo miyi ye Yuda n’abo mubaleta ekighuma ky’omw’ikumi ky’esyonde, ky’esyombuli, n’ekighuma ky’omw’ikumi ky’ebindu bibuyirire ebyayirawa mo bibuyiririe busana na Yehova, oMungu wabo. Mubaleta ebyosi ebyo, bamayirabyo mo bilundo-bilundo.
7 Mubatsuka erileta ebihembo byabo n’eriyirabyo mo bilundo-bilundo oko mwisi w’akasatu; n’oko mwisi we 7, mubabugha eriletabyo.
8 Hezekia n’abakulu mubasa, bamalangira ebilundo-bilundo ebyo. Mubabya babilangirabyo, mubapipa Yehova n’eritsumula abandu biwe Abaisraeli.
9 Hezekia mwabulya abahereri n’Abalawi oko bilundo-bilundo ebyo,
10 neryo Azaria omukulu w’abahereri w’omo kihanda kya Zadoki mwamusubirya ati: “Eritsuka omughulu batsuka erileta ebihembo omo nyumba ya Yehova, abandu banemulya n’eryughuta, aliwe ebyalya bikine bingyi, kundi Yehova abiritsumula abandu biwe. Lebaya ebyosi ebi ebiryasaka.”
11 Neryo Hezekia mwababwira ati bateghekanaye amadepo* omo nyumba ya Yehova, neryo mubateghekaniagho.
12 Abandu mubaendelea butsir’ileghula erileta ebihembo, ebighuma by’omw’ikumi, n’ebindu bibuyirire. Omulawi Konania na Shimei omughala wabo oyo wabya amusubukire bo babya bakimanira ebindu ebyo.
13 Ababya bakawatikya Konania n’omughala wabo Shimei, ngoko omwami Hezekia anabugha, babya: Yehieli, Azazia, Nahati, Asaheli, Yerimoti, Yozabadi, Elieli, Ismakia, Mahati, na Benaya. Ye Azaria iye abya mwimaniri w’ehekalu y’oMungu w’ekwenene.
14 Kore mughala wa Imna, Omulawi oyo wabya akatsunga omulango oko luhande lw’eyo ryuba rikasira, abya imanire ebihembo ebyo bandu bakaherera oMungu w’ekwenene omw’anza. Iniakaghabira abahereri b’ebihembo ebyo bandu balyaletera Yehova, iniakabaghabira n’ebindu bibuyirire kutsibu.
15 Abya akimanira Edeni, Miniamini, Yeshua, Shemaya, Amaria, na Shekania, omo miyi y’abahereri, omo mibiiri yabo eyikasaba omundu eribya w’eriyiketerwa, ibakaghabira abalikyabyo b’omo bikuto mbiriri-mbiriri olulengo lughumerera; omukulu n’omuke ibakahabawa olulengo lughumerera.
16 Ibakahabawa akalyo erilusyako ababya bahandikire omo bitabu ebirimo amena w’abosi ababya bakasa buli kiro oko hekalu ya Yehova erikola emibiiri eyo bikuto byabo byabya bisabirwe erikola. Omo bitabu ebyo mwabya n’amena w’abana b’obulume ab’emyaka eyitsukire okw’isatu.
17 Abahereri mubahandikwa erikwamaana n’ebitunga byabo. Abahereri kutya n’Abalawi ab’emyaka eritsuka oko 20 mubahandikwa erikwamana n’ebitunga byabo n’erikwamana n’emibiiri eyo bikuto byabo byahabawa.
18 Babya bakahandika amena w’abakali babo bosi, abana babo bosi b’obulume, abana babo bosi b’obukali, n’aw’abana balere, Abalawi n’ebihanda byabo byosi, kundi babya bakakola emibiiri eyisabire eribya mundu w’eriyiketerwa. Ibakayikasa eribya ibane babuyirire batoke erikola emibiiri yabo mibuyirire.
19 Ibakahandika n’abitsikulu ba Haruni, abahereri ababya bikere omo biharo by’erilisiryamo ebitimbire oko miyi yabo. Omo miyi yosi, abalume mubasombolwa erikwamana n’amena wabo batoke eribya bakaghabira akalyo abalume bosi b’omo bahereri n’abosi ababya ibahandikire omo bitabu ebirimo amena w’Abalawi.
20 Hezekia mwakola atya omo Yuda yosi; mwaendelea erikola ebyuwene n’ebitunganene embere sya Yehova oMungu wiwe. Kandi mwabya mutaleghula oko Mungu.
21 Ebyosi ebyo atsuka erikola akasondya-sondya oMungu wiwe, byangabya ebilebirye omubiiri w’oko h’ekalu y’oMungu w’ekwenene kutse ebilebirye Emighambo kutse ebyalayiro, mwakolabyo n’omutima wosi, n’ebyosi mwatokabyo.
Amaelezo awehikwa
^ Ulebaye Amaana w’ebinywa.
^ Kinywa kwa kinywa, “y’ebibugha.”
^ Kutse “ebyumba by’eriliramo.”
