Emyatsi y’Emighulu y’Akabiri 32:1-33
32 Enyuma sy’emyatsi eyo n’enyuma sya Hezekia eriyighendya atya omo butaleghula, omwami Senakeribu we Asiria mwasyalwa ne Yuda. Mwatimba oko miyi eyiwatire atoke erilwa nayo, abya anzire eritobola ebitobo by’omo syombimbo sy’emiyi eyo atoke erihambayo.
2 Hezekia mwabya abiminya ngoko Senakeribu abiryasa kandi ngoko anzire erilwa ne Yerusalema,
3 mwakola akasyakulu n’abakulu b’omo butabali bwiwe n’abasuda biwe. Mwabya abikola akasyakulu ako, mwayisogha eriliba esyongununuko sy’amaghetse esiri ehihya w’omuyi; abakulu b’omo butabali bwiwe n’abasuda biwe mubamuwatikya erikola ekyo.
4 Abandu banene mubahindanibwa, neryo mubaliba esyongununuko syosi sy’amaghetse n’esyonyusi esyabya sikalaba omo kihugho kundi babya bakayibwira bati: “Siritolere abami be Asiria bakasa neryo ibasunga amaghetse manene.”
5 Kandi mwatasyahimba n’omuhwa oluhimbo losi olwabya ilwabiritera, mwahira kulo kw’ehileberyo, mwahimba n’olundi luhimbo lw’ehihya. Kandi mwakokotya n’Akatwa* k’omo muyi wa Daudi, amakokotya n’ebindu binene by’amalwa n’esyongabo.
6 Neryo mwasombola abakulu b’abasuda abakendibya bakasondola abandu, amahindania abandu bosi omo kibugha ky’abandu bosi ekyabya oko mulango w’omuyi, mwabasikya mutima* omw’ibabwira ati:
7 “Musike kandi mubye n’akaghala. Isimwasagha kutse erititimana busana n’omwami we Asiria n’abandu bosi abali haghuma naye, kundi abali haghuma netu ni banene kulenga abali haghuma naye.
8 Iye akayiketera akaghala k’abandu,* aliwe itwe tukayiketera Yehova oMungu wetu atoke erituwatikya n’erilwa n’esyonzighu syetu.” Ebinywa ebyo by’omwami Hezekia we Yuda mubyasikya abandu b’omutima.
9 Enyuma sy’aho, omwami Senakeribu we Asiria oyo wabya iniane e Lakishi haghuma n’abasuda biwe bosi n’olukengerwa lwiwe losi mwatuma abaghombe biwe e Yerusalema ati bayabwire omwami Hezekia we Yuda n’abandu bosi be Yuda ababya e Yerusalema bati:
10 “Omwami Senakeribu we Asiria ati, ‘Mukayiketerandi kyo kyabirileka imwasighala omo muyi we Yerusalema omughulu abasuda babiritimba kugho batoke erilwa nagho?
11 Simwasi ngoko Hezekia anemubateba mutoke erihola busana n’enzala n’enyota omughulu anemubabwira ati: “Yehova oMungu wetu akenditulusya omo byala by’omwami we Asiria?”
12 Hezekia oyu s’iye walusaya omo kihugho emyanya y’endata n’ebiherero by’oMungu wenyu, kandi Hezekia mughumerera oyu si yo wabwira abandu be Yuda n’abe Yerusalema ati: “Litolere imwakukama embere sy’ekiherero kighuma kisa, kandi kyo mutolere imwatumbiryako omuki w’amahere wenyu?”
13 Simwasi ekyo ingye n’abotata-kulu waghe twakolera ebihanda byosi by’omo bindi bihugho? Emiungu y’ebihanda by’ebihugho ebyo muyanatoka erilusya ebihugho byabo omo byala byaghe?
14 Ni mungu wahi omo miungu yosi y’ebihanda ebyo abotata-kulu waghe batsandaya oyo watoka erilusya ekihanda kiwe omo byala byaghe, neryo ibwa inywe mukalengekanaya muti oMungu wenyu yukenditoka eribalusya omo byala byaghe?
15 Hezekia isyabateba kutse eribaherya atya! Isimwayiketera iye, kundi sihali oMungu w’ekihanda kutse w’obwami bosi-bosi oyo watoka erilusya abandu biwe omo byala byaghe n’omo byala by’abotata-kulu waghe. Neryo ibwa oMungu wenyu yukenditoka eribalusya omo byala byaghe?’”
16 Abaghombe ba Senakeribu mubaendelea eribugha muhanda oko Yehova oMungu w’ekwenene n’oko Hezekia omughombe wiwe.
17 Senakeribu mwahandika n’esyobaruha sy’eritsamba Yehova oMungu we Israeli n’erimubughako muhanda. Esyobaruha esyo syabya sikabugha siti: “Kundi emiungu y’ebihanda by’ebindi bihugho muyitatoka erilusya abandu babo omo byala byaghe, kutya n’oMungu wa Hezekia syendisyatoka erilusya abandu biwe omo byala byaghe.”
18 Abaghombe ba Senakeribu babya bakabugha omo mulenge muli n’abandu be Yerusalema ababya oko luhimbo, babya bakabugha nabo omo mubughe w’Abayahudi; babya bakasonda eribasaghisya n’eribahiramo obuba batoke erihamba omuyi oyo.
19 Mubabya bakabugha muhanda oko Mungu we Yerusalema ngoko banabugha muhanda oko miungu y’ebihanda by’ekihugho eyakokotibawa omo byala by’abandu.
20 Aliwe omwami Hezekia n’omuminyereri Isaya mughala wa Amozi mubataleka erisabira omwatsi oyo, kandi mubataleka erilakira olubula bati lubawatikaye.
21 Neryo Yehova mwatuma omumalaika, amita obuli musuda w’amaka, obuli musondoli, n’obuli mukulu w’omo kambi y’omwami we Asiria, neryo omwami we Asiria mwasuba omo kihugho kiwe iniabirihemuka. Habere habilaba mughulu mulebe, mwingira omo hekalu* y’omungu wiwe. Iniane omo, abaghala biwe mubamwita omo muyali.
22 Yehova kw’alusaya atya Hezekia n’abandu be Yerusalema omo byala bya Senakeribu omwami we Asiria n’omo byala by’abandi bosi, neryo amikalya abandu biwe omo buholo oko syombande syosi.
23 Neryo abandu banene mubaletera Yehova y’ebihembo e Yerusalema, mubaletera n’omwami Hezekia we Yuda ebindu by’obughuli. Enyuma sy’aho, abandu b’omo bihanda byosi mubasikya omwami yo kutsibu.
24 Oko mughulu oyo, Hezekia mwalwala, abya inianganahola. Neryo mwasaba Yehova, naye mwamusubirya, amamukangania ekikendileka iniaminya ngoko akendilama.
25 Aliwe Hezekia mwatakangania erisima busana n’ebibuya ebyo bamukolera kundi omutima wiwe mwayiheka, n’ekyo mukyaleka oMungu iniamuhitanako kutsibu, kandi iniahitana kutsibu oko Yuda n’oko Yerusalema.
26 Aliwe Hezekia mwayikehya, amaleka eribya n’emiyiheko, n’abandu be Yerusalema nabo mubayikehya nga ye, neryo Yehova mwatabaha amalipizi omo biro bya Hezekia.
27 Hezekia mwabya n’obuteke bunene n’olukengerwa lunene; mwayihimbira amadepo w’eribikamo efeza,* ehoro, amabwe w’obughuli, amaghuta w’ezeri, esyongabo, n’ebindu byosi by’obughuli.
28 Mwahimba n’amadepo w’eribikamo engano, edivai nyihya-nyihya, n’amaghuta; mwahimbira emihanda mbiriri-mbiriri y’esyonyama siwe sy’ebibanda, amahimbira n’esyombuli siwe sy’ehiluba.
29 Mwahimba n’emiyi, amabya n’esyonde nene, esyombuli nene, kundi oMungu mwamuha ebindu binene.
30 Hezekia yo waliba engununuko y’amaghetse y’endata e Gihoni, kandi yo walabaya amaghetse omo yindi nzira akandaghaliryagho eyikwa oko luhande lw’eyo ryuba rikalengera lw’Omuyi wa Daudi. Hezekia abya akatoka ebyosi ebyo abya akakola.
31 Aliwe omughulu abakulu be Babiloni batuma omutumwa wabo ewa Hezekia batoke erimubulya oko mwatsi owahuluka omo kihugho, oMungu w’ekwenene mwaleka Hezekia akole ekyo anzire atoke erimulengako, kusudi aminye ebyosi ebyabya omo mutima wiwe.
32 Eyindi myatsi eyilebirye Hezekia, ngoko akanganaya olwanzo oluteleghula, ebyosi ebyo binahandikire omo nzoli y’omuminyereri Isaya mughala wa Amozi, omo Kitabu ky’abami be Yuda n’abe Israeli.
33 Neryo Hezekia mwahola ngoko abotata-kulu wiwe bahola, mubamuta omo bweruka obuli omo mahero w’abaghala ba Daudi; mwabya abihola, abandu bosi be Yuda n’abandu bosi be Yerusalema mubamuta n’olukengerwa. Neryo mughala wiwe Manase mwabya mwami omo mwanya wiwe.
Amaelezo awehikwa
^ Kutse “e Milo.” Ni kinywa ky’Ekiebrania ekikamanisaya “eryusulya.”
^ Kinywa kwa kinywa, “mwakania n’omutima wabo.”
^ Kinywa kwa kinywa, “okuboko okuliko omunyoku.”
^ Kutse “nyumba.”
^ Ni kindu ky’obughuli ekikalua omo kitaka.
