Emyatsi y’Emighulu y’Akabiri 33:1-25
33 Manase abya n’emyaka 12 omughulu abya mwami, mwatabala oko myaka 55 iniane e Yerusalema.
2 Mwakola ebituwene omo meso wa Yehova, mwakola emyatsi eyikita esyonye y’ebihanda ebyo Yehova atibitako omo kihugho atoke erihakyo Abaisraeli.
3 Mwatasyahimba emyanya y’endata eyo baba wiwe Hezekia ahimbula, amahimbira Esyobaali sy’ebiherero, amakokotya n’emiti mibuyirire;* mwakukamira n’ebindu byosi ebiri elubula, amakolerabyo.
4 Mwahimba n’ebiherero omo hekalu ya Yehova, eyo Yehova abughako ati: “E Yerusalema yo yikendisyabya erina ryaghe kera na kera.”
5 Omo bibugha bibiri by’ehekalu ya Yehova, mwahimbiramo ebindu ebiri elubula ebiherero.
6 Mwahisya abana biwe-biwe omo muliro omo musya w’Omughala wa Hinomu. Mwakola obukumu, obulaghuli, mwakola emyatsi y’obuloyi, amahiraho abakumu n’abalaghuli; mwakola oko lulengo lunene kutsibu emyatsi mibi omo meso wa Yehova atoke erimuhitania.
7 Mwahira omo hekalu y’oMungu w’ekwenene mw’esanamu eyibatsire eyo akokotaya, ehekalu eyo Mungu abwirako Daudi na mughala wiwe Solomona ati: “Ngendisyahira erina ryaghe ryo kera na kera omo nyumba eyi ne Yerusalema, omuyi ogho nasombola omo biharo byosi by’ebihanda bye Israeli.
8 Sinendisyasyalusya Abaisraeli omo kihugho ekyo naha abotata-kulu wabo, bamabikwama ndeke-ndeke ebyosi ebyo nabwirabo, emighambo yosi, n’ebihano, n’ebyalayiro ebyo nabaha erilabira Musa.”
9 Manase mwaherya abandu be Yuda n’abe Yerusalema. Mwaleka ibakola emyatsi mibi kulenga abandu b’ebihanda ebyo Yehova atoghotaya bilue embere sy’Abaisraeli.
10 Yehova mwabya akakania na Manase n’abandu biwe, aliwe mubatatsomana.
11 Neryo Yehova mwahira omo bakulu b’abasuda b’omwami we Asiria m’omutima w’erilwa nabo, neryo mubahamba Manase omo syokroshe,* bamamuboha omo minyororo* ibiri y’ekwivre,* bamamutwala e Babiloni.
12 Omughulu abya akaghalwa, mwalemba-lemba Yehova oMungu wiwe ati amukanganaye olukogho,* kandi mwayikehya kutsibu embere sy’oMungu w’abotata-kulu wiwe.
13 Manase mwabya akasaba oMungu, n’omusabe wiwe w’erilemba-lemba mwatula oko mutima w’oMungu. Neryo oMungu mwahulikirira omusabe wiwe w’erimusaba ati amukanganaye olukogho. Neryo oMungu mwamusubya e Yerusalema, amamusubulirya obwami bwiwe. Manase kw’aminya atya ngoko Yehova y’oMungu w’ekwenene.
14 Enyuma sy’aho, Manase mwahimbira Omuyi wa Daudi oluhimbo luli ehihya. Mwahimbalo oko luhande lw’eyo ryuba rikalengera lwe Gihoni eyiri omo musya,* oluhimbo olo lwabya luhikire ahali Olukyo lw’Esyosamaki, n’erilua aho ilutimbire eriyahika e Ofeli. Kandi Manase mwahira abakulu b’abasuda omo miyi yosi eyiwatire ye Yuda.
15 Enyuma sy’aho, mwalusya n’omo hekalu ya Yehova mw’eyindi miungu n’esanamu, mwalusya oko kitwa ky’enyumba ya Yehova n’omo Yerusalema mw’ebiherero byosi ebyo akokotaya, mwabugha ati baghusebyo ehihya w’omuyi.
16 Mwakokotya n’ekiherero kya Yehova, amatsuka eriherera kukyo kw’amahere w’obuholo n’amahere w’erisima. Mwabwira n’abandu be Yuda ati bakolere Yehova oMungu we Israeli.
17 Abandu babya bakaherera amahere wo Yehova oMungu wabo musa, aliwe babya bakinamuhereragho omo mwanya w’endata.
18 Eyindi myatsi eyilebirye Manase, omusabe ogho asaba oMungu, n’ebinywa by’abalangiri ababya bakakania naye omo rina rya Yehova oMungu we Israeli, ebyosi ebyo binahandikire omo kitabu ekikakanaya oko bami be Israeli.
19 Kandi omusabe wiwe, kandi ngoko oMungu asubaya oko musabe wiwe w’erimulemba-lemba, amalolo wiwe wosi ngoko aleghula, ngoko ahimba emyanya y’endata, n’aho ahira emiti mibuyirire* n’esyosanamu, ebyosi ebyo akola embere sy’eriyikehya, ebyosi ebyo binahandikire omo bitabu by’abalangiri.
20 Neryo Manase mwahola ngoko abotata-kulu wiwe bahola, mubamuta hakuhi n’enyumba yiwe, neryo mughala wiwe Amoni mwabya mwami omo mwanya wiwe.
21 Amoni abya n’emyaka 22 omughulu abya omwami, mwatabala oko myaka ibiri iniane e Yerusalema.
22 Amoni mwabya akakola ebituwene omo meso wa Yehova ngoko baba wiwe Manase akola. Mwabya akaherera amahere w’esyosanamu syosi esibatsire esyo baba wiwe Manase akokotaya, kandi mwabya akakolerasyo.
23 Aliwe mwatayikehya embere sya Yehova ngoko baba wiwe Manase ayikehaya, nikwa obubi bwiwe mubwabya bunene n’okw’aho.
24 Kiro kighuma, abaghombe biwe mubamuhotera, bamamwitira omo nyumba yiwe.
25 Aliwe abandu b’omo kihugho ekyo mubita abandu bosi abahotera omwami Amoni, neryo mubayira Yosia mughala wiwe mo mwami omo mwanya wiwe.
Amaelezo awehikwa
^ Ulebaye Amaana w’ebinywa.
^ Kutse alinga, “omo hyuma.”
^ Kutse “mahulula.”
^ Kutse “y’omulinga.”
^ Kutse “mwatulerya obusu bwa Yehova, oMungu wiwe.”
^ Kutse “omusya owakumamo amaghetse.”
^ Ulebaye Amaana w’ebinywa.
