Emyatsi y’Emighulu y’Akabiri 34:1-33
34 Yosia abya n’emyaka 8 omughulu abya mwami. Mwatabala oko myaka 31 iniane e Yerusalema.
2 Mwakola ebyuwene omo meso wa Yehova. Mwakwama emibere ya Daudi, tata-kulu wiwe. Mwatakitira oko luhande lw’amali kutse lw’amalembe.
3 Omo mwaka we 8 w’obutabali bwiwe, iniakine mulere, mwatsuka erisondya-sondya oMungu wa Daudi, tata-kulu wiwe. Omo mwaka we 12 w’obutabali bwiwe, mwatsuka erilusya omo Yuda ne Yerusalema mw’emyanya y’endata, emiti mibuyirire,* esyosanamu esibatsire, esyosanamu sy’emetale eyo balyayeyukaya.
4 Kandi mubahimbula ebiherero bya Baali embere siwe, mwahimbula n’ebiherero by’erihisiryako obukwa ebyabya endata oko biherero bya Baali; mwatwa emiti mibuyirire,* esyosanamu esibatsire, esyosanamu sy’emetale eyo balyayeyukaya mo bihande-bihande. Mwaponda-pondabyo, byamabya ng’olututu, neryo amatsatsanga olututu olo oko masinda w’ababya bakahererabyo amahere.
5 Kandi mwahisirya amakuha w’abahereri oko biherero byabo. Yosia kw’eraya atya e Yuda ne Yerusalema.
6 Omo miyi ya Manase, ya Efraimu, ya Simeoni n’erihika e Naftali, omo bisambukalirya ebyabya bitimbere kuyo,
7 mwahimbula ebiherero, amaponda-ponda emiti mibuyirire* n’esyosanamu esibatsire, amayirasyo mo lututu. Mwahimbula n’ebiherero byosi by’obukwa ebyabya omo kihugho kyosi kye Israeli; n’enyuma sy’aho, amasuba e Yerusalema.
8 Omo mwaka we 18 w’obutabali bwiwe, mwabya abibugha eryerya ekihugho n’ehekalu, mwatuma Shafani mughala wa Azalia, Maaseya omukulu w’omuyi, na Yoa mughala wa Yoahazi oyo wabya akahandika emyatsi eyikalaba* ati bayakokotaye ehekalu* ya Yehova oMungu wiwe.
9 Mubayasungana n’omuhereri mukulu Hilkia, bamamuha esyofranga esyaletawa omo nyumba y’oMungu. Abalawi abakatsunga emilango bo bakuma-kumasyo oko bandu be Manase, be Efraimu, n’oko bandi Baisraeli bosi, n’oko bandu be Yuda, be Benyamini n’oko bandu be Yerusalema.
10 Neryo mubahasyo abasombolawa batoke erimanira omubiiri w’enyumba ya Yehova; n’ababya bakakola omubiiri omo nyumba ya Yehova mubakolesya esyofranga esyo eryuwania n’erikokotya enyumba eyo.
11 Mubaha abahimbi n’abafundi b’esyofranga batoke erighula amabwe awabiribatswa n’esyombagho sy’erikokotyamo ebindu by’eriwatyamo olutwe n’erihira esindi mbagho* oko manyumba ogho bami be Yuda baleka inyatsanda.
12 Abalume abo mubakola omubiri wo ndeke-ndeke. Mubabugha ambu Abalawi bo bimanire omubiri ogho bakakola. Omo Balawi abo mwabya: Yohati na Obadia, Abamerari; Zekaria na Meshulamu, Abakohati. Mubasombolwa batoke eribya bimaniri. Abandi Balawi bosi ababya ibasi omuziki wo ndeke,
13 babya bimaniri b’abakaheka emizigo kandi babya bimaniri b’abosi ababya bakakola emibiiri mbiriri-mbiriri. N’abandi Balawi babya basekretere, abakulu, n’abandi babya bakateya emilango.
14 Omughulu babya bakayenda esyofranga esiryaletewa omo nyumba ya Yehova, omuhereri Hilkia mwasunga ekitabu ky’Emighambo ya Yehova eyo aha Abaisraeli erilabira* Musa.
15 Neryo Hilkia mwabwira omusekretere Shafani ati: “Namabisunga ekitabu ky’Emighambo omo nyumba ya Yehova.” Neryo Hilkia mwaha ekitabu ekyo kyo Shafani.
16 Enyuma sy’aho, Shafani mwatwalira omwami y’ekitabu ekyo, amamubwira ati: “Abaghombe baghu banemukola emibiiri yosi eyo balyahabawa.
17 Babiriyimya esyofranga esilue omo nyumba ya Yehova, babirihasyo abimaniri n’abakakola emibiiri.”
18 Kandi omusekretere Shafani mwabwira omwami ati: “Omuhereri Hilkia mwakamba ekitabu, kya kino. Neryo Shafani mwatsuka erisomakyo embere sy’omwami.
19 Omwami mwabya abyowa ebinywa ebiri omo Mighambo, mwalw’iniatula esyongyimba siwe.
20 Enyuma sy’aho, omwami mwakania na Hilkia, Ahikamu mughala wa Shafani, Abdoni mughala wa Mika, Shafani omusekretere, na Asaya omughombe w’omwami, amababwira ati:
21 “Muyanibuliraye Yehova n’abandu abakisiya omo Israeli ne Yuda, mumubulaye emyatsi eyikendituhulukira nga ni yahi erikwamana n’ebinywa ebiri omo kitabu ekiryasungawa; kundi Yehova abirihitana kutsibu, neryo amalipizi agho akendituha ni manene kundi abotata-kulu wetu mubatakwama ekinywa kya Yehova omw’isikya ebyosi ebihandikire omo kitabu eki.”
22 Neryo Hilkia haghuma n’abandu abo mwami atuma mubaghenda ew’omumiyereri mukali ye Hulda. Hulda abya mukali wa Shalumu mughala wa Tikva, mughala wa Harasi, yo wabya imanire ekyumba ky’eribikamo esyongyimba. Abya ikere omo Kartye k’Akabiri ke Yerusalema. Mubayakanirya naye eyo.
23 Mwababwira ati: “Yehova oMungu we Israeli ati, ‘Mubwire omulume oyulyabatuma okw’ingye muti:
24 “Yehova akabugha ati, ‘Ngendileta omo mwanya ono n’eriletera abikalani ba mugho b’obuhanya, eritakira ryosi erihandikire omo kitabu ekyo balyasoma embere sy’omwami we Yuda.
25 Ngendyuta ekinigha kyaghe omo mwanya ono kandi sikyendisyalima, kundi babirinilekerania kandi bakatumbiraya eyindi miungu y’omuki w’amahere wabo busana n’erinihitania omo byosi ebyo bakakola.’”
26 Aliwe muyabwire omwami we Yuda oyulyabatuma ati musyamubuliraye Yehova muti: “Bino byo Yehova oMungu we Israeli akabugha oko binywa ebyo ulyowa,
27 kundi siwetakalyakalya omutima waghu kandi kundi mukayikehaya embere sy’oMungu omughulu ulyowa ebyo niryabugha niti bikendihikira omwanya ono n’abandu b’omo mwanya ono, kandi kundi mukayikehaya embere syaghe n’eritula esyongyimba syaghu n’erilira embere syaghe, naghe nabirikowa, Yehova atya.
28 Busana n’ekyo, ngendikuhindania n’abotata-kulu waghu* kandi ukendisyatabwa omo yisinda yaghu mo buholo, n’ameso waghu syendisyalangira obuhanya bosi obo ngendisyaleta omo mwanya ono n’oko bikalani bamo.’”’”
Neryo mubayabwira omwami y’ebinywa ebyo.
29 Neryo omwami mwabirikira abasyakulu bosi be Yuda n’abe Yerusalema.
30 Enyuma sy’aho, mwaya oko hekalu ya Yehova haghuma n’abalume bosi be Yuda, abikalani be Yerusalema, abahereri, Abalawi, ni bugha ambu, abandu bosi, bangabya bakulu kutse balere. Mwasomerabo ebinywa byosi ebyabya omo kitabu ky’endaghane ekyasungawa omo hekalu ya Yehova.
31 Neryo omwami mwimana omo mwanya wiwe, amakola endaghane* embere sya Yehova. Mwayilagha erikwama Yehova, erisikya emighambo yiwe, ebibukyo biwe, n’ebyalayiro biwe n’omutima wiwe wosi, n’enafsi* yiwe yosi omw’ikwama ebinywa byosi by’endaghane ebyabya bihandikire omo kitabu ekyo.
32 Kandi mwabwira abosi ababya e Yerusalema ne Benyamini ati basikaye endaghane eyo. Abikalani be Yerusalema mubasikya endaghane y’oMungu, oMungu w’abotata-kulu wabo.
33 Neryo Yosia mwalusya ebindu byosi ebikita esyonye* omo biharo byosi by’Abaisraeli, kandi mwabwira abandu bosi be Israeli ati bakolere Yehova oMungu wabo. Mubataleka erikwama Yehova oMungu w’abotata-kulu wabo omo biro byosi bya Yosia.
Amaelezo awehikwa
^ Ulebaye Amaana w’ebinywa.
^ Ulebaye Amaana w’ebinywa.
^ Ulebaye Amaana w’ebinywa.
^ Kutse “omuntombe.”
^ Kinywa kwa kinywa, “enyumba.”
^ Kutse “esyoputre.”
^ Kinywa kwa kinywa “omo byala bya.”
^ Ebi ni binywa by’ekisosekanio ebikamaanisya erihola.
^ Kutse “mwatasyakola endaghane.”
^ Ulebaye Amaana w’ebinywa.
^ Kutse “esyosanamu.”
