Emyatsi y’Emighulu y’Akabiri 35:1-27
35 Yosia mwakolera Yehova y’Epasaka e Yerusalema. Mubakera esyonyama sy’Epasaka ekiro 14 omwisi w’erimbere.
2 Mwahira abahereri omo mibiiri yabo, kandi mwabahiramo muhwa w’erikola omubiiri wabo owalebirye ehekalu ya Yehova.
3 Enyuma sy’aho, mwabwira Abalawi, abakangirirya be Israeli yosi, ababya babuyirire embere sya Yehova ati: “Muhire Erisanduku ribuyirire omo nyumba eyo Solomona mughala wa Daudi omwami we Israeli ahimba. Simwendisyasyabya mukahekaryo oko bitigho, neryo lino mukolere Yehova oMungu wenyu n’abandu biwe Abaisraeli.
4 Kandi muyiteghekanaye erikwamana n’ebitunga byenyu, erikwamana n’ebikuto byenyu, erikwamana n’ebyahandikawa n’omwami Daudi we Israeli, n’omughala wiwe Solomona.
5 Muyimane omo mwanya mubuyirire. Muyighabe erikwamana n’ebitunga by’abandu, ni bugha ambu, abaghala benyu, mutoke erikolera obuli kikuto ky’abandu.*
6 Mukere esyonyama sy’Epasaka, kandi muyeraye n’eriteghekanirya abaghala benyu batoke erikwama ekinywa kya Yehova ekyo abugha erilabira Musa.”
7 Yosia mwaha abandu ebyana by’esyombuli by’obulume, ebyana by’esyombene by’obulume bitoke eribya mahere w’Epasaka. Ebyosi byabya byana by’esyombuli eby’obululme n’ebyana by’esyombene by’obulume 30 000 n’esyonde 3 000; omwami mwalusyabyo oko bindu biwe-biwe.
8 N’abakulu b’omo butabali bwiwe nabo mubaha abandu, abahereri, n’Abalawi ekihembo ekikendibya buhere obo omundu akateka omw’anza. Hilkia, Zekaria, na Yehieli, abimaniri b’ehekalu y’oMungu w’ekwenene, mubaha abahereri ebyana by’esyombuli by’obulume n’ebyana by’esyombene by’obulume 2 600 ebikendibya mahere w’Epasaka. Mubahabo n’esyonde 300.
9 Konaya n’abaghala babo, ye Shemaya na Netaneli haghuma na Hashabia, Yeieli na Yozabadi, abakulu b’Abalawi, mubaha Abalawi ebyana by’esyombuli by’obulume n’ebyana by’esyombene by’obulume 5 000 ebikendibya mahere w’Epasaka. Mubahabo n’esyonde 500.
10 Mubabya babibugha eriteghekania, abahereri mubimana omo myanya yabo n’Abalawi mubimana erikwamana n’ebikuto byabo, ngoko omwami anabugha.
11 Mubakera esyonyama sy’Epasaka, neryo abahereri mubabya bakimya omusasi ogho Balawi balyabaletera, ibatsatsangagho oko kiherero. Abalawi babya ibanemulusya oko syonyama kw’esyongobi.
12 Enyuma sy’aho, mubateghekania amahere w’eryokererya batoke erighabiragho abandu ababya bahindene erikwamana n’ebitunga byabo, abandu batoke erihereragho Yehova, ngoko bihandikire omo kitabu kya Musa; esyonde nasyo ko banayirasyo batya.
13 Mubahuka* esyonyama sy’Epasaka oko muliro ngoko banabya babeghere erikola; mubahuka n’amahere mabuyirire omo syonyungu, omo syonyungu nene-nene n’omo syopano. N’enyuma sy’aho, mubatwalira enyama y’abandu bosi yo luba-luba.
14 Enyuma sy’aho, mubayiteghekanirya Epasaka, bamateghekaniryayo n’abahereri kundi abahereri, ni bugha ambu, abitsikulu ba Haruni, babya bakaherera amahere w’eryokererya n’ebisabu erihika omughulu omwirimya atsuka eritoghonga. Abalawi ko bayiteghekaniraya batya Epasaka n’eriteghekaniryayo abahereri, abitsikulu ba Haruni.
15 Abimbi, ni bugha ambu, abaghala ba Asafu, babya omo myanya yabo erikwamana n’ebyalayiro bya Daudi, Asafu, Hemani, na Yedutuni omulangiri w’omwami, n’abakateghaya emilango babya ibane oko milango mbiriri-mbiriri; babya isibalaghire okw’ilua omo myanya yabo, kundi abaghala babo, ni bugha ambu, Abalawi babya ibabiribategekanirya Epasaka.
16 Neryo ebyosi ebyo Yehova abya akabasaba eriteghekania batoke erikola Epasaka n’eriherera amahere w’eryokererya oko kiherero kya Yehova, ngoko omwami Yosia abugha, mubyakolwa ekiro ekyo.
17 Abaisraeli ababya aho oko mughulu oyo mubakola Epasaka, mubibuka n’Ekiro Kikulu ky’Emikati Eyitemo Levire* omo biro 7.
18 Omo Israeli mwabya isimulimwatakolwa Epasaka eyiri ng’eyo eritsuka oko biro by’omuminyereri Samweli, kandi omo Israeli isimulimwatabya omwami oyo wakola Epasaka eyiri ng’eyo Yosia, abahereri, Abalawi, abikalani be Yuda n’abe Israeli ababya aho n’abikalani be Yerusalema bakola.
19 Epasaka eyo muyakolwa omo mwaka we 18 omo butabali bwa Yosia.
20 Ebyosi ebyo mubyabya byabilaba na Yosia iniamabikokotya ehekalu,* omwami Neko we Misri mwayalwa na Karkemishi. Mwalwira naye hakuhi ne Efrati, neryo Yosia mwayalwa naye.
21 Neryo Neko mwamutumako abandu ati bayamubwire bati: “Iwe mwami we Yuda, ebi binakulebirye? Munabwire siniryasyalwa naghu, aliwe mungasyalwa n’ekindi kihanda, kandi oMungu mwakabugha ati inayira luba. Wamabya ighunanzire eribya omo buholo, isiwalwa n’oMungu oyuli haghuma naye, akasyakwita.”
22 Aliwe Yosia mwatasuba enyuma. Mwayihindula bakasyamuminya, neryo amayalwa na Neko. Mwatowa ebyo Neko amubwira, aliwe mubyalua omo buno bw’oMungu, neryo mwayalwa na Neko omo ribanda rye Megido.
23 Abakaghusa emisali mubaghusagho oko mwami Yosia, neryo mwabwira abaghombe biwe ati: “Munilusaye hano, kundi namabihutala kutsibu.”
24 Neryo abaghombe biwe mubamulusya omo mutoka, bamamuhira omo mutoka wiwe w’akabiri w’amalwa, bamamutwala e Yerusalema. Yosia kw’ahola atya. Mubamuta omo yisinda y’abotata-kulu wiwe; abandu bosi be Yuda n’abe Yerusalema mubamulira.
25 Neryo Yeremia mwimbira Yosia olwimbo lw’ekiriro. Erihika na munabwire, abimbi bosi b’obulume n’ab’obukali bakinahula Yosia omo syonyimbo syabo sy’ekiriro. Mubasoha ambu esyonyimbo esyo sibye sikimbwa omo Israeli; sinahandikire omo bitabu by’esyonyimbo sy’ekiriro.
26 Eyindi myatsi eyilebirye Yosia, ngoko akanganaya olwanzo oluteleghula omw’ikwama ebihandikire omo Mighambo ya Yehova,
27 ebyo akola, eritsuka oko mwanzo erihika oko mwiso, ebyosi ebyo binahandikire omo Kitabu ky’abami be Israeli n’abe Yuda.
Amaelezo awehikwa
^ Kinywa kwa kinywa, “abaghala b’abandu.”
^ Kutse alinga, “Mubakalanga.”
^ Kutse “Kihamya.”
^ Kinywa kwa kinywa, “enyumba.”
