Emyatsi y’Emighulu y’Akabiri 36:1-23
36 Neryo abandu b’omo kihugho ekyo mubayira Yehoahazi mughala wa Yosia mo mwami e Yerusalema omo mwanya wa baba wiwe.
2 Yehoahazi abya n’emyaka 23 omughulu abya mwami. Mwatabala omo misi isatu iniane e Yerusalema.
3 Aliwe omwami we Misri mwamulusya oko kitumbi kiwe e Yerusalema, amalihisya ekihugho ekyo eamande y’esyotalanta* 100 sy’efeza* n’etalanta nguma y’ehoro.
4 Kandi, omwami we Misri mwayira Eliakimu mughala wabo Yehoahazi mo mwami we Yuda n’owe Yerusalema. Mwamuluka erindi rina, mwamuha erya Yehoyakimu; aliwe Neko mwatwala ye Yehoahazi mughala wabo Eliakimu e Misri.
5 Yehoyakimu abya n’emyaka 25 omughulu abya mwami. Mwatabala oko myaka 11 iniane e Yerusalema. Abya akakola ebituwene omo meso wa Yehova, oMungu wiwe.
6 Omwami Nebukadneza we Babiloni mwasyalwa naye, abya anzire iniamutwala e Babiloni inianabohire omo minyororo* ibiri y’ekwivre.*
7 Kandi Nebukadneza mwatwala e Babiloni ebindu ebyabya omo hekalu ya Yehova, amayahirabyo omo nyumba yiwe e Babiloni.
8 Eyindi myatsi eyilebirye Yehoyakimu, emyatsi mibi eyo akola n’awandi makosa agho bamusanguko, ebyosi ebyo binahandikire omo Kitabu ky’abami be Israeli n’abe Yuda; neryo mughala wiwe Yehoyakini mwabya mwami omo mwanya wiwe.
9 Yehoyakini abya n’emyaka 18 omughulu abya mwami. Mwatabala omo misi isatu n’ebiro 10 iniane e Yerusalema; mwabya akakola ebituwene omo meso wa Yehova.
10 Oko mwanzo w’omwaka,* omwami Nebukadneza mwatuma abandu biwe ati bayarondaye omwami Yehoyakini, bamutwale e Babiloni, n’eriheka ebindu by’obughuli ebyabya omo nyumba ya Yehova. Kandi mwayira Zedekia mughala wabo baba wa Yehoyakini mo mwami we Yuda ne Yerusalema.
11 Zedekia abya n’emyaka 21 omughulu abya mwami, mwatabala oko myaka 11 iniane e Yerusalema.
12 Mwabya akakola ebituwene omo meso wa Yehova, oMungu wiwe. Mwatayikehya embere sy’omuminyereri Yeremia, oyo wabya akabugha ebyo Yehova alyabugha ati abughe.
13 Mwaghana n’erikwama obusondoli bw’omwami Nebukadneza, oyo wamulapisaya embere sy’oMungu. Mwabyamo erighundu, amakalya-kalya omutima wiwe n’erighana erikwama Yehova, oMungu we Israeli.
14 Abakulu bosi b’abahereri n’abandu mubaleghula kutsibu oko Mungu omw’ikola emyatsi yosi eyikita esyonye y’ebihanda, kandi mubatsandya ehekalu ya Yehova eyo ayira mo nyibuyirire e Yerusalema.
15 Yehova, oMungu w’abotata-kulu wabo, iniakabya inianemubatumako abandu batoke eribakunga. Ibakabakunga kangyi-kangyyi, kundi abya akakwira abandu biwe n’ehekalu* yiwe y’obulilghe.
16 Aliwe ibakabya ibanemusekererya abandu abo oMungu w’ekwenene alyatuma, kandi ibakapokaya ebinywa by’oMungu n’erisekererya abaminyereri biwe, erihika oko kika Yehova amahitana oko bandu biwe ko kutsibu, n’erihika oko kika amaha wabo w’erilama amabula.
17 Neryo oMungu mwabatumako omwami w’Abakaldayo ayalwe nabo. Neryo omwami oyo mwita abalwana babo omo muyali, mwitirabo omo hekalu yabo. Mwatakwira abalwana, abambesa abatebataghotsera n’abalume, abasyakulu kutse ebirema b’obulighe. OMungu mwahira ebyosi omo byala biwe.
18 Mwatwala ebindu byosi ebyabya omo nyumba y’oMungu w’ekwenene bye Babiloni, byangabya binene-binene kutse bike-bike. Mwatwalayo n’ebindu by’obughuli by’omo nyumba ya Yehova n’ebindu by’obughuli by’omwami n’eby’abakulu b’omo butabali bwiwe.
19 Mwatimya n’enyumba y’oMungu w’ekwenene, amahimbula esyombimbo sye Yerusalema, amatimya ehileberyo hyamo hyosi ehiwatire, n’eritsandya obuli kindu kyosi ky’obughuli.
20 Abatakwa omo muyali, mwayirabo mo banyewa, amabatwala e Babiloni; neryo mubabya bakamukolera, iye n’abaghala biwe erihika omughulu obwami bwe Persia bwatsuka eritabala.
21 Byabya bitya ebinywa ebyo Yehova abugha erilabira Yeremia bitoke eribererera, erihika omughulu ekihugho kikendisyaliha esyosabato syakyo. Omo biro byosi ebyo, ekihugho kikendisyabya ikine matongo, kikendisyabya omo sabato,* erihika omughulu emyaka 70 ikendisyahwa.
22 Omo mwaka w’erimbere w’omwami Koreshi we Persia, Yehova mwahira omo Koreshi omwami we Persia m’omutima w’erilabya omulaghe omo bwami bwiwe bosi, kusudi ebyo Yehova abugha erilabira Yeremia bibererere. Kandi mwahandika omulaghe oyo. Omulaghe oyo abya akabugha ati:
23 “Ye Koreshi, omwami we Persia akabugha ati, ‘Yehova oMungu w’elubula abirimba amami wosi w’oko kihugho, kandi abirimba omubiiri w’erimuhimbira enyumba e Yerusalema, eyiri omo kiharo kye Yuda. Omw’inywe, nindi yo w’oko bandu biwe? Yehova oMungu wiwe abye haghuma naye, neryo ahetuke.’”
Amaelezo awehikwa
^ Etalanta nguma ini bilo 34, 2. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “mahulula.”
^ Kutse “y’omulinga.”
^ Alinga oko mughulu w’embula y’omwiso-mwiso.
^ Kinywa kwa kinywa, “n’obwikalo.”
^ Kutse “kikendisyaluhuka.”
