Emyatsi y’Emighulu y’Akabiri 4:1-22
4 Enyuma sy’aho, mwakokotya ekiherero ky’ekwivre;* kyabya ky’amaboko 20 oko buli, amaboko 20 oko bughali, n’amaboko 10 oko buli eriya endata.
2 Mwakokotya n’Engetse* omo metale eyabiriyeyukibwa. Engetse eyo yabya y’omuviringo. Erilua oko musike ono erihika oko ghundi musike habya amaboko 10, kandi Engetse eyo yabya n’obuli bw’amaboko atano eriya endata. Omuliki owangatimba kuyo omundu akapimayo abya n’obuli bw’amaboko 30.
3 Oko Ngetse eyo kw’eyikwa-yikwa kwabya amapambo w’amoli, abya iniatimbire kuyo. Omo mwanya w’obuli b’okuboko kughuma mwabya amapambo 10 w’amoli. Amapambo ayo w’amoli abya iniatondekire omo milondo ibiri, neryo Engetse n’amapambo w’amoli mubyayeyukibwa haghuma bitoke eribya kindu kighuma.
4 Engetse eyo iyitekire oko syonde 12 sy’obulume, esisatu isilebirye oko luhande lw’endata, esisatu oko luhande lw’eyo ryuba rikalengera, esisatu oko luhande lw’eyikwa, n’esisatu oko luhande lw’eyo ryubya rikasira; neryo Engetse iyitekire kusyo kw’endata, n’ebitswe by’enyuma by’Engetse eyo byabya bilolere eyiri omwanya w’omo kati-kati.
5 Obunene bw’Engetse bwabya bungaha n’akaghanza* kaghuma; omunywa wayo abya ng’omunywa w’ekikombe, abya ng’eriwa ry’elise. Engetse eyo iyanganahikamo esyobati* 3 000.
6 Kandi, mwakokotya ebibase 10; mwahira ebibase bitano oko luhande lw’amali, n’ebindi bitano oko luhande lw’amalembe. Ibakereraya mubyo mw’ebindu ebyo balyakolesaya bakaherera amahere w’eryokererya. Aliwe abahereri ibo ibakanabira omo Ngetse.
7 Enyuma sy’aho, mwakokotya ebindu 10 by’ehoro by’erihirako esyotala. Mwakokotyabo erikwamana n’ebyalayiro ebyo ahabawa. Mwahirabyo omo hekalu, ebitano oko luhande lw’amali, n’ebitano oko luhande lw’amalembe.
8 Mwakokotya n’esyomesa 10, amahirasyo omo hekalu, esitano oko luhande lw’amali, n’esindi itano oko luhande lw’amalembe. Mwakokotya n’ebibakuli* 100 by’ehoro.
9 Enyuma sy’aho, mwakokotya ekibugha ky’abahereri, n’ekibugha kinene, n’emilango y’oko kibugha kinene. Kandi mwahaka n’oko milango eyo kw’ekwivre.*
10 Mwahira Engetse eyo oko luhande lw’amali, omo mwanya owali omo kati-kati k’oluhande lw’eyikwa n’oluhande lw’eyo ryuba rikasira.
11 Kandi Hiramu mwakokotya esyombegeti sy’erihekamo eribu, ebipagho, n’ebibakuli.*
Neryo Hiramu mwabugha omubiiri ogho omwami Solomona abugha ati akole busana n’erihimba enyumba y’oMungu w’ekwenene. Mwakokotya:
12 esyonduyi ibiri, esyombita ibiri sy’oko syonduyi esiri ng’ebibakuli,* eminyororo ibiri eyiluka-lukene ey’erihira oko syombita ibiri sy’esyonduyi esiri ng’ebibakuli esyabya oko syonduyi,
13 amakomamanga 400 aw’erihira oko minyororo ibiri eyiluka-lukene, emilondo ibiri y’amakomamanga oko buli munyororo owaluka-lukene busana n’eriswika esyombita ibiri sy’oko syonduyi esiri ng’ebibakuli;*
14 esyongurubani* 10 n’ebibase 10 ebyabya oko syongurubani esyo,
15 Engetse n’esyonde sy’obulume 12 esyo babya bahirireko Engetse eyo;
16 esyombegeti sy’erihekamo eribu, ebipagho, esyokanya, n’ebindu byosi ebyo Hiramu-abivu akokoteraya omwami Solomona omo kwivre* eyabiryeribwa, ebyakokotaya bitoke eribya bikakolesibwa omo nyumba ya Yehova.
17 Omwami mwayeyukiryabyo omo ribumba erisikire eriri omo musya we Yordani, omo kati-kati ke Sukoti ne Zereda.
18 Ebindu byosi ebyo, ebyo Solomona akokotaya byabya bingyi kutsibu; mubataminya nga byalua omo kwivre* nyingahi.
19 Solomona mwakokotya ebindu byosi ebikendikolesibwa omo nyumba y’oMungu w’ekwenene, ni bugha ambu, ekiherero ky’ehoro; esyomesa sy’erihirako emikati y’erikakangania;
20 ebindu by’erihirako esyotala n’esyotala syabyo sy’ehoro eyerire, esyotala esyabya sikakolerya Ahabuyirire Kutsibu erikwamana n’ebyalayiro;
21 amawa, esyotala, ebindu by’erihambamo orutambi, ebyosi ebyo byabya by’ehoro, ehoro eyabiryeribwa kutsibu;
22 ebindu by’erilimyamo omuliro, ebibakuli,* ebikombe, n’ebindu by’erihekako omuliro, eby’ehoro eyabiryeribwa; obwingiriro bw’ehekalu, emilango y’emwisi y’Ahabuyirire Kutsibu; n’emilango y’enyumba y’ehekalu, y’ehoro.
Amaelezo awehikwa
^ Kutse “ky’omulinga.”
^ Kutse “n’Erirobe.”
^ Hakuhi esyosantimetre 7,4. Ulebaye Endomeko B14.
^ Ebati nguma ini syolitre 22. Ulebaye Endomeko B14.
^ Kutse “n’ebibindi.”
^ Kutse “kw’omulinga.”
^ Kutse “n’ebibindi.”
^ Kutse “ng’ebibindi.”
^ Kutse “ng’ebibindi.”
^ Kutse “ebindu by’erihekamo amaghetse.”
^ Kutse “mulinga.”
^ Kutse “mulinga.”
^ Kutse “ebibindi.”
