Emyatsi y’Emighulu y’Akabiri 5:1-14
5 Neryo Solomona mwabugha omubiiri wosi ogho abya anzire erikola busana n’enyumba ya Yehova. Enyuma sy’aho, mwaleta ebindu ebyo Daudi baba wiwe ayira mo bibuyirire; amahira e feza, ehoro, n’ebindu byosi omo byumba by’eribikamo ebindu by’obughuli ebiri omo nyumba y’oMungu w’ekwenene.
2 Oko mughulu oyo, Solomona mwahindania abasyakulu be Israeli, abakulu bosi b’ebihanda, abakulu b’ebitunga bye Israeli. Mubasa e Yerusalema batoke eriyalusya erisanduku ry’endaghane ya Yehova omo Muyi wa Daudi, ni bugha ambu, e Sioni.
3 Abandu bosi be Israeli mubahindana embere sy’omwami ekiro ky’efete* eyakolawa oko mwisi we 7.
4 Neryo abasyakulu bosi be Israeli mubasa, n’Abalawi mubasumba Erisanduku.
5 Enyuma sy’aho, mubahetukirya Erisanduku omo hema y’erihindanamo. Mubatwalamo n’ebindu byosi bibuyirire ebyabya omo hema. Abahereri n’Abalawi* bo bahekabyo.
6 Omwami Solomona n’Abaisraeli bosi abo abwira ati basyahindane naye babya ibane embere sy’Erisanduku. Neryo mubaherera esyombuli n’esyonde esyo mundu ateangatoka erighanza.
7 Enyuma sy’aho, abahereri mubahira erisanduku ry’endaghane ya Yehova omo mwanya waryo, omo kyumba ky’emwisi, ni bugha ambu, Ahabuyirire Kutsibu, eyikwa sy’ebipupa by’abakerubi.
8 Ebipupa by’abakerubi byabya ibiyisanzire endata sy’ahabya Erisanduku, neryo abakerubi babya baswikire Erisanduku n’emighamba* eyabya endata oko Risanduku.
9 Emighamba* yabya miri, neryo emitwe-mitwe yayo iyikalangirika iyine Ahabuyirire, ahali embere sy’Ahabuyirire Kutsibu. Aliwe omundu isyalilangirayo iniane ehihya. Yikine aho erihika na munabwire.
10 Omo Risanduku simwabya kindu. Mwabya tu ebibambali bibiri ebyo Musa ahiriramo e Horebu omughulu Yehova akola endaghane haghuma n’Abaisraeli bakalua e Misri.
11 Abahereri mubabya babilua omo mwanya owabuyirire (kundi abahereri bosi ababyaho babya ibabiriyerya nomo bangabya b’omo kikuto kyahi),
12 Abalawi bosi ababya bakimba, ababya bakasondolwa na Asafu, Hemani, Yedutuni n’abana babo b’obulume n’abaghala babo babya ibambite esyongyimba esyuwene. Babya ibane n’amasengo,* ebyombo by’omuziki by’esyosinga, n’esyonanga. Babya ibanimene oko luhande lw’eyo ryuba rikasira lw’ekiherero, kandi babya n’abahereri 120 ababya bakabuha omo syongunga.
13 Omughulu ababya bakabuha omo syongunga n’abimbi babya bakapipa Yehova n’erimusima kughuma, n’omughulu omulenge w’esyongunga, amasengo,* n’ebindi byombo by’omuziki abya akeruka, n’omughulu babya bakapipa Yehova, “kundi ni mubuya, kandi olwanzo lwiwe oluteleghula ni lwa kera na kera,” enyumba, enyumba ya Yehova muyusulamo ekitu.
14 Abahereri babya isibangatoka erikola omubiiri wabo kundi ekitu n’olukengerwa lwa Yehova byabya ibyabiryusula omo nyumba y’oMungu w’ekwenene.
Amaelezo awehikwa
^ Ni bugha ambu efete y’ebibanda
^ Kutse “n’abahereri Balawi.”
^ Kutse “n’emiraba; n’emiti y’erihekerako.”
^ Kutse “Emiraba; Emiti y’erihekerako.”
^ Kutse “n’esyosembale.”
^ Kutse “esyosembale.”
