Emyatsi y’Emighulu y’Akabiri 7:1-22
7 Solomona abere abinabugha erisaba, omuliro mwalua elubula, amatimya obuhere bw’eryokererya n’awandi mahere, n’olukengerwa lwa Yehova mulusula omo hekalu.
2 Abahereri mubatatoka eringira omo hekalu ya Yehova kundi olukengerwa lwa Yehova lwabya ilwabiryusula omo hekalu ya Yehova.
3 Abandu bosi be Israeli mubalangira omuliro akakima, mubalangira n’olukengerwa lwa Yehova endata oko hekalu, neryo mubunama n’erihira obusu bwabo b’oko kitaka ah’asesire amabwe. Mubakukama n’erisima Yehova, “kundi ni mubuya; kandi olwanzo lwiwe oluteleghula ni lwa kera na kera.”
4 Neryo omwami n’Abaisraeli bosi mubaherera amahera embere sya Yehova.
5 Omwami Solomona mwaherera esyonde 22 000 n’esyombuli 120 000. Ebyo by’omwami n’Abaisraeli bosi bakola omughulu baherera oMungu w’ekwenene y’ehekalu yiwe.
6 Abahereri babya ibane omo myanya yabo y’erikoleramo emibiiri. Abalawi babya ibane n’ebyombo by’omuziki ebyo babya bakawata abandu bakimbira Yehova. (Omwami Daudi akokotayabyo busana n’erisima Yehova —“kundi olwanzo lwiwe oluteleghula ni lwa kera na kera”—omughulu abya akapipa oMungu haghuma nabo.)* N’abahereri babya bakawata esyongunga syo kutsibu embere sy’Abalawi, n’Abaisraeli bosi babya ibanimene.
7 Neryo Solomona mwayira omwanya w’omo kati-kati k’ebibugha owabya embere sy’ehekalu ya Yehova mo mubuyirire, kundi aho h’aherera amahere w’eryokererya n’ebisabu by’amahere w’obuholo, kundi ekiherero ky’ekwivre* ekyo Solomona ahimba kyabya isikyangahikako amahere wosi w’eryokererya, amahere wosi w’akalyo, n’ebisabu byosi.
8 Oko mughulu oyo, Solomona mwakola efete haghuma n’Abaisraeli bosi. Mwakolayo omo biro 7. Habya abandu bangyi abalua omo biharo ebitsukire e Lebo-hamati* eriyahika oko musya owakumamo amaghetse* we Misri.
9 Aliwe omo kiro kye 8,* mubakola omuhindano munene, kundi babya ibabiriherera oMungu y’ekiherero omo biro 7 n’erikola efete omo biro 7.
10 Neryo omo kiro kye 23 ky’omwisi we 7, Solomona mwabwira bandu ati basube ewabo. Mubasubula ibanemutsema n’eriyisyandira busana n’obubuya obo Yehova akanganaya Daudi, Solomona, n’abandu biwe Abaisraeli.
11 Solomona kw’abugha atya erihimba ehekalu ya Yehova n’enyumba y’omwami. Mwatoka erikola ebyosi ebyo abya anzire erikola busana n’ehekalu ya Yehova n’enyumba yiwe. Mwakolabyo ngoko anabya anzire.
12 Neryo Yehova mwahulukira Solomona y’omo kiro n’erimubwira ati: “Nabiryowa omusabe waghu, kandi nabirisombola omwanya ono atoke eribya enyumba y’erihereramo amahere.
13 Namabikinga olubula ihatasyawa embula, kandi namabibwira esyongyike niti sitsandaye ekihugho, kandi namatuma ekihunzo omo bandu baghe,
14 neryo abandu baghe abaliko erina ryaghe bamabiyikehya, bamabisaba, ibarondya obusu bwaghe, n’erileka erikola ebibi, ingendyowa omusabe wabo inine e lubula, inaghanyira amalolo wabo, n’erilamya ekihugho kyabo.
15 Eritsuka lino, ameso waghe akendibya inianakingulire, n’amatwi waghe akendibwa inianahulikirire emisabe eyo bakasabira omo mwanya ono.
16 Neryo lino, nabirisombola enyumba eno n’eriyirayo mo nyibuyiririre erina ryaghe ritoke eribya kuyo kera na kera; ameso waghe n’omutima waghe bikendibya bikabya ibine kuyo.
17 “Naghu, wamabinikolera ngoko baba waghu Daudi anikolera, omw’ikola ebyosi ebyo ngakubwira, kandi wamabisikya ebyalayiro byaghe n’emighambo yaghe,
18 ingendiwatya obwami bwaghe, ngoko nalagha omughulu nakola endaghane na baba waghu Daudi. Munamubwira niti: ‘Omo kihanda kyaghu mo mukendisyabya mukalua omulume oyukendisyabya akatabala Abaisraeli.’
19 Aliwe mwamabinilolyako emighongo n’erileka erikwama ebyalayiro byaghe n’emighambo yaghe eyo nabiribaha, kandi mwamabiyakolera eyindi miungu n’erikukamirayo,
20 ingendikula Abaisraeli omo kihugho kyaghe ekyo nabaha, kandi ingendilusya embere sy’ameso waghe enyumba eyi eyo nabiriyira mo nyibuyirire busana n’eriha erina ryaghe ry’olukengerwa, kandi ingendileka abandu bosi ibalangira enyumba eyi mo kindu bule n’erisekereryayo.*
21 Kandi enyumba eyi iyikendibya bisambukalirya. N’obuli mundu oyukendisyabya akalaba hakuhi nayo akendisyabya akasweka akalangirayo n’eribugha ati: ‘Yehova mwakakolera ekihugho eki n’enyumba eyi y’atya busanaki?’
22 Neryo bakendisyababwira bati, ‘Ni kundi mubaleka Yehova oMungu w’abotata-kulu wabo oyo wabalusaya omo kihugho kye Misri. Kandi mubamakirira eyindi miungu, bamakukamirayo, n’erikolerayo. Kyo kiryaleka iniabaletera obuhanya bungaha n’obu.’”
Amaelezo awehikwa
^ Kitokekene Abalawi.
^ Kutse “ky’omulinga.”
^ Kutse “omo bwingiriro bwe Hamati.”
^ Ulebaye Amaana w’ebinywa.
^ Ni bugha ambu, ekiro ekyakwama ekiro ky’efete, kutse ekiro kye 15 ky’omwisi.
^ Kinywa kwa kinywa, “n’eriyirayo mo musyo.”
