Emyatsi y’Emighulu y’Akabiri 9:1-31
9 Omwami-mukali we Sheba mowa oko ngulu ya Solomona. Neryo mwasa e Yerusalema, amasyamubulya amabulyo awakala-kalire.* Abya n’abandu banene kutsibu, kandi abya n’esyongamia esyabya sihekire amaghuta w’ezeri, ehoro nene, n’amabwe w’obughuli. Mwahika embere sya Solomona, amamubwira ebyosi ebyabya oko mutima wiwe.
2 Solomona mwasubirya oko mabulyo wiwe wosi. Muhatabya n’ekindu n’ekighuma ekyo Solomona atalukako.
3 Omwami-mukali we Sheba abere abilangira amenge wa Solomona, enyumba eyo ahimba,
4 akalyo k’oko mesa yiwe, ngoko abaghombe biwe babya bakikala oko mesa, ngoko abandi baghombe biwe babya bakapanga emesa, kandi ngoko babya bakambala, mwabya abilangira abakatengera Solomona y’obwabu kandi ngoko babya bakambala, kandi mwabya abilangira n’amahere w’eryokererya agho Solomona abya akaherera oko hekalu ya Yehova k’obuli kiro, mwahwamo omuka.*
5 Neryo mwabwira omwami ati: “Kwesi ebyosi ebyo wabirikola n’amenge waghu ebyo niryowira omo kihugho kyaghe si mabehi.
6 Aliwe sinditaligha ebyo balyanibwira, namasala naligha nabihika hano n’eriyilangirirabyo omo meso waghe. Kwesi mubatanibwira ata n’enusu y’amenge waghu manene. Uwite amenge manene n’ebindu binene kulenga ebyo niryowa.
7 Abalume baghu n’abaghombe baghu abakabya ibane haghuma naghu mughulu wosi, kandi abakabya ibanemwowa ebinywa byaghu by’amenge batsemire!
8 Yehova oMungu waghu apipawe, oyo wakuhira oko kitumbi kiwe ky’obwami utoke eribya mwami wa Yehova oMungu waghu kundi abya iniakwanzire kutsibu. Kundi oMungu waghu anzire Abaisraeli, kyo kiryaleka iniakuyira mo mwami w’abandu aba utoke eribya ukatswera abandu omo kwenene n’omo ritunganene, abandu aba bakasyahwaho.”
9 Enyuma sy’aho, omwami-mukali we Sheba mwaha Solomona esyotalanta 120 sy’ehoro, amaghuta manene w’ezeri n’amabwe manene w’obughuli. Sihehatabya oyo waletera omwami Solomona amaghuta w’ezeri amangaha n’agho omwami-mukali we Sheba amuletera.
10 Kandi, abaghombe ba Hiramu n’abaghombe ba Solomona ababya bakalusya ehoro e Ofiri babya ibakaleta n’esyombagho sy’omuti w’ealgumimu n’amabwe w’obughuli.
11 Omwami mwakokotya omo syombagho sy’omuti w’ealgumimu mw’emimbari y’oko nyumba ya Yehova n’ey’oko nyumba y’omwami. Mwakokotyamo n’esyonanga, amakokoterya n’abimbi ebyombo by’omuziki by’esyosinga omo syombagho esyo. Abandu babya isibebatalola oko syombagho esiri ng’esyo omo kiharo kye Yuda.
12 Omwami Solomona naye mwaha omwami-mukali we Sheba ebyosi ebyo omukali oyo abya anzire, ebyosi ebyo omukali oyo amusaba. Mwamuha ebindu binene kulenga ebyo omukali oyo amuletera.* Enyuma sy’aho, omukali oyo mwasuba omo kihugho kiwe haghuma n’abaghombe biwe.
13 Obuli mwaka, ibakaletera Solomona esyotalanta 666 sy’ehoro.
14 Isikaongezeka oko horo eyo bakomersa n’abahingania babya bakamuletera, isikaongezeka n’oko ebyo abami bosi b’Abaarabu n’abaguvernere bosi b’ekihugho ababya bakaletera Solomona ehoro n’efeza* babya bakamuletera.
15 Omwami Solomona mwakokotya esyongabo nene-nene 200 esy’ehoro eyitulungene (obuli ngabo iyikahwerako esyoshekeli* 600 sy’ehoro eyitulungene).
16 Mwakokotya n’esyongabo ngengenge* 300 sy’ehoro eyitulungene (obuli ngabo nge iyikahwerako esyomina* isatu sy’ehoro). Enyuma sy’aho, omwami mwahirasyo omo Nyumba y’Omo Musitu we Lebanoni.
17 Omwami mwakokotya n’ekitumbi kinene ky’obwami omo meno w’esyotembo. Neryo mwahaka kukyo kw’ehoro eyabiryeribwa.
18 Omundu iniakahetuka emimbari 6 akaya oko kitumbi ekyo ky’obwami. Ekitumbi ky’obwami ekyo kyabya ikiriko ekindu ky’erihirako ebisandu eky’ehoro. Oko syombande ibiri sy’ekitumbi ekyo ky’obwami kwabya emyanya y’erihirako esyongokola, n’esyosimba ibiri syabya simene hakuhi n’emyanya eyo y’erihirako esyongokola.
19 Habya n’esyosimba 12 esyabya simene oko mimbari 6. Esimba nguma yabya oko mwiso-mwiso w’obuli mumbari. Sihabya obwami obwabya n’ekitumbi ky’obwami ekikokotibwe kitya.
20 Ebindu byosi by’erinywiramo by’omwami Solomona byabya by’ehoro, n’ebindu byosi by’omo Musitu we Lebanoni byabya by’ehoro eyabiryeribwa. Sihabya ekindu ekyakokotibawa omo feza,* kundi oko mughulu wa Solomona, ibakalangira efeza mo kindu bule.
21 Kundi amato w’omwami abya iniakaya e Tarshishi haghuma n’abaghome ba Hiramu. Neryo obuli myaka isatu, amato we Tarshishi iniakasa inianahekire ehoro, efeza,* ameno w’esyotembo, ebisiko, n’esyotausi.
22 Neryo omwami Solomona abya muteke kutsibu kandi abya n’amenge manene kutsibu kulenga abandi bami bosi b’oko kihugho.
23 Abami b’omo kihugho kyosi ibakasaba akanya k’erikania na Solomona batoke eryowa amenge agho oMungu w’ekwenene amuha.
24 Obuli mughuma wa kubo iniakamuletera ekihembo, ni bugha ambu, ebindu ebikokotibwe omo feza,* esyongyimba, ebindu by’amalwa, amaghuta w’ezeri, esyosabayiri,* n’esyonyumbu. Emyatsi iko yikabya yitya obuli mwaka.
25 Solomona abya n’ebibanda 4 000 by’esyosabayiri siwe, abya n’emitoka n’esyosabayiri* 12 000.* Iniakasigha eyindi omo miyi eyikabyamo emitoka n’eyindi iniakasighayo e Yerusalema, hakuhi n’aho abya ikere.
26 Solomona mwatabala amami wosi eritsuka oko Lusi* eriyahika oko kihugho ky’Abafilistini n’eriyahika oko mupaka we Misri.
27 Omwami mwayira efeza* mo nene e Yerusalema ng’amabwe, n’emiti y’emierezi muyabya minene ng’emiti y’emikuyu eyikabya omo Shefela.
28 Ibakalusaya esyosabayiri* sye Misri n’omo bindi bihugho, ibaleterasyo Solomona.
29 Eyindi myatsi eyilebirye Solomona, eritsuka oko mwanzo erihika oko mwiso, inahandikire omo bitabu by’omuminyereri Natani, omo buminyereri bwa Ahiya Omushiloni, n’omo kitabu ekirimo esyonzoli esyo omulangiri Ido alota esilebirye Yeroboamu mughala wa Nebati.
30 Solomona mwatabala Abaisraeli bosi oko myaka 40 iniane e Yerusalema.
31 Enyuma sy’aho, Solomona mwahola ngoko abotata-kulu wiwe bahola. Mubamuta omo Muyi wa Daudi, baba wiwe. Neryo mughala wiwe Rehoboamu mwabya mwami omo mwanya wiwe.
Amaelezo awehikwa
^ Kutse “amasyamughusira esyondekerano.”
^ Kinywa kwa kinywa, “mwatasyabyamo kirimu.”
^ Kutse alinga, “mwamuha ebyo eritomeka oko bihembo ebilingene n’ebindu ebyo omukali oyo amuletera.”
^ Ni kindu ky’obughuli ekikalua omo kitaka.
^ Eshekeli nguma ini syograme 11,4. Ulebaye Endomeko B14.
^ Kangyi-kangyi abakaghusa emisali bo babya bakahekasyo.
^ Omo masako w’Ekiebrania, emina nguma ini syograme 570. Ulebaye Endomeko B14.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Kutse “esyofarasi; esyoshevale.”
^ Kutse “n’esyofarasi; n’esyoshevale.”
^ Kutse “abakaghenda oko syosabayiri 12 000.”
^ Ni bugha ambu, Olusi lwe Efrati.
^ Ni kindu ky’obughuli ekikalua omo kitaka.
^ Kutse “esyofarasi; esyoshevale.”
