Abami b’Akabiri 19:1-37
19 Omwami Hezekia mwabya abyowa ebinywa ebyo, mwatulanga esyongyimba siwe, amambala olukimba lw’esaki* n’eringira omo nyumba ya Yehova.
2 Enyuma sy’aho, mwatuma omwimaniri w’enyumba y’omwami ye Eliakimu, Shebna omusekretere, n’abimaniri b’abahereri ati bayasungane n’omuminyereri Isaya mughala wa Amozi. Abosi mubambala esyongyimba sy’esaki.*
3 Mubabwira Isaya bati: “Hezekia ati, ‘Munabwire ni kiro ky’obulighe, ekiro ky’eritsambwa, n’ekiro ky’erihemuka; kundi twabiribya ng’omukali oyukasonda eributa,* neryo omwana akasonda eriluamo, omukali oyo iniabula akaghala.
4 Kwa muhwa Yehova oMungu waghu akendihulikirira ebinywa bya Rabshake, oyo omukama wiwe, ni bugha ambu, omwami we Asiria alyatuma eripuma* oMungu oyuliho, kandi kwa muhwa akendimutswera busana n’ebinywa ebyo Yehova oMungu waghu alyowa. Neryo usabire abandu abalyasaka.’”
5 Neryo abandu abo omwami Hezekia atuma babere babibwira Isaya y’ebinywa ebyo,
6 Isaya mwabasubirya ati: “Muyabwire omukama wenyu muti, ‘Yehova ati: “Isiwasagha busana n’ebinywa ebyo ulyowa, ebitsumi ebyo baghombe bw’omwami we Asiria balyanibughako.
7 Ngendimuhiramo amalengekania malebe. Hane omwatsi ogho akendyowa, neryo iniasuba omo kihugho kiwe. N’enyuma sy’aho, ngendileka iniakwa omo muyali omo kihugho kiwe.”’”
8 Rabshake mwabya abyowa ngoko omwami we Asiria abirilusya abasuda biwe be Lakishi, mwayahindana naye, neryo ameya inianemulwa n’omuyi we Libna.
9 Neryo omwami we Asiria mwowa ngoko omwami Tiraka we Etiopia anemusyalwa naye, neryo kandi mwatuma abandu ati bayabwire Hezekia bati:
10 “Mubwire Hezekia, omwami we Yuda, muti, ‘OMungu waghu, oyo wabiriyiketera, isyakuteba omw’ibugha ati: “Omwami we Asiria syendihamba omuyi we Yerusalema.”
11 Si wabiryowa ebyo abami be Asiria bakolera ebihugho byosi ebyo batoghotaya. Ukalengekanaya uti n’iwe ukendibala?
12 Emiungu y’ebihanda ebyo abotata-kulu waghe batoghotaya muyanatoka erisabulabyo? Gozani, Harani, Rezefu, n’abandu be Edeni ababya e Tel-asari, bali hayi?
13 Omwami we Hamati, omwami we Arpadi, n’omwami w’emiyi ye Sefarvaimu, Hena ne Iva, bali hayi?’”
14 Hezekia mwimya esyobarua esyo abatumwa bamuletera, amasomasyo. Enyuma sy’aho, mwaya eyiri enyumba ya Yehova, amasanza esyobaruha esyo embere sya Yehova.
15 Neryo Hezekia mwasaba Yehova ati: “Yehova, oMungu we Israeli, iwe wikere oko kitumbi kyaghu ky’obwami endata oko* bakerubi, iwe musa iwe Mungu w’ekwenene omo mami wosi w’oko kihugho. Iwe wahangyika olubula n’ekihugho.
16 Yehova, uteghe amatwi n’erihulikiria. Yehova, kingula ameso waghu ulangire. Hulikirira ebinywa ebyo Senakeribu alyabugha erikupuma,* iwe Mungu oyuliho.
17 Yehova, ni kwenene abami be Asiria babiritoghotya ebihanda n’ebihugho by’ebihanda ebyo.
18 Mubaghusa emiungu y’ebihanda ebyo omo muliro, kundi si yabya miungu, aliwe ni bindu ebyo bandu bakokotaya omo miti n’amabwe. Ekyo kyo kyaleka ibatoka eritoghotyayo.
19 Neryo lino Yehova, oMungu wetu, kisi utusabule omo byalya by’omwami we Asiria, neryo amami wosi w’oko kihugho akendiminya ngoko iwe musa, Yehova, iwe Mungu.”
20 Isaya mughala wa Amozi mwalayira oko Hezekia ati: “Yehova, oMungu we Israeli, ati, ‘Nabiryowa omusabe waghu, ogho ulyasaba busana n’omwami Senakeribu we Asiria.
21 Yehova akabugha oko mwami oyo ati:
“Mwali we Sioni ni mubikira, akakupokaya, n’akandi akakusekereraya.
Mwali we Yerusalema akakutsingiraya omutwe akakupokya.
22 Nindi yo ulyapuma* n’eritsuma?
Ulyasumbira omulenge waghu wondi?
Nindi yulyasumbira ameso waghu awatemo erikenga?
Omubuyirire we Israeli yo ulyakolera utya!
23 Wabiripuma* Yehova erilabira abandu abo ulyatuma, kandi wabiribugha uti,‘Ngendisambira oko syosingyi sy’ebitwaN’emitoka yaghe minene,Ngendiya omo biharo by’ehali-hali bye Lebanoni.
Ngendikonda emiti minene-minene y’emierezi, emiti eyuwene-wene y’ekilaghu ye Lebanoni.
Ngendingira omo myanya y’eribisamamo ye Lebanoni eyiri hali-hali.
Ngendingira omo misitu ye Lebanoni eyihata-tene.
24 Ngenditakula amabulu n’erinywa amaghetse w’omo bindi biharo;Ngendilyatanga oko syonyusi syosi* sye Misri, neryo isyuma.’
25 Siwewatowa? Nabirisoha* omwatsi oyo wo kera.
Nabiriteghekania omwatsi oyo wo kera.
Neryo lino, ngendikolagho.
Emiyi eyo mundu ateangahikamo bweghu-bweghu, ukendiyirayo mo bilundo by’ebisambukalirya.
26 Abandu b’omo miyi eyo sibendisyabya n’akaghala.
Bakendisyatitimana n’erihemuka.
Bakendisyabya ng’ebiti by’omwirima, ng’ebiti bibisi,Bakendisyabya ng’ebiti ebiri oko lutwe ebikuma busana n’ekihunga ekikaluira oko luhande lw’eyo ryuba rikasira.
27 Aliwe ngabya ininasi omughulu ukikala, omughulu ukahuluka, omughulu ukingira,N’omughulu ukanihitanako kutsibu.
28 Kundi nabiryowa ngoko wabirinihitanako kutsibu kandi ngoko wabirinirurumira.
Neryo ngendihira entobani omo nindo yaghu, ngendihira n’oko minywa yaghu kw’akuma k’erisondolamo esabayiri,*Kandi ngendikusubulya omo nzira eyo ulyasiramo.”
29 “‘Kino kyo kikendikukangania* ngoko emyatsi eyo yikendibya: Oko mwaka ono, mukendirya ebiryayilasira; n’oko mwaka owakasa, mukendisyalya ebikendisyera oko syombuto esiryayitoghongera oko mwaka ono; aliwe oko mwaka w’akasatu, mukendisyahera embuto n’erihulula, mukendisyahera amalima w’emizabibu n’erirya amatunda wagho.
30 Abandu be Yuda abakendisyabala, ni bugha ambu, abakendisyasaka bakendisyingirya emirihi yabo emwisi sy’ekitaka n’eriheterya amatunda w’endata.
31 Kundi abakendisyasaka bakendisyalua e Yerusalema, n’abakendisyasabuka bakendisyalua oko Kitwa kye Sioni. Omuhwa wa Yehova w’emilondo akendisyakola omwatsi oyo.
32 “‘Neryo bino byo Yehova akabugha oko mwami we Asiria:
“Syendingira omo muyi onoSyendighusamo n’omusali n’omughumaSyendilwa nagho omo ngaboSyenditimbya kugho kw’oluba atoke erilwa nagho.
33 Akendisubula omo nzira eyo alyasiramo;Syendingira omo muyi ono,” Yehova atya.
34 “Ngendilwira oko muyi oyu n’erisabulagho busana n’erina ryagheKandi busana n’omughombe waghe Daudi.”’”
35 Omo kiro ky’ekiro ekyo kisa-kisa, omumalaika wa Yehova mwasa omo kambi y’Abaasiria, amitamo abasuda 185 000. Abandu mubabya babibuka omo tututu, mubalangira ebinda byosi.
36 Neryo Senakeribu, omwami we Asiria, mwasubula. Mwaya e Ninawi, amasighala eyo.
37 Kiro kighuma, inianemukukama omo hekalu ya Nisroki omungu wiwe, abaghala biwe ye Adrameleki na Sharezeri mubamwita omo muyali, neryo mubatibitira omo kihugho kye Ararati. Enyuma sy’aho, mughala wiwe ye Esar-hadoni mwabya mwami omo mwanya wiwe.
Amaelezo awehikwa
^ Kutse “epiri; olukimba lw’ekiriro.”
^ Kutse “esyopiri; esyongyimba sy’ekiriro.”
^ Kinywa kwa kinywa, “oyo abana babirihika oko mulango w’enda.”
^ Kutse “erikara.”
^ Kutse alinga, “omo kati-kati.”
^ Kutse “erikukara.”
^ Kutse “ulyakara.”
^ Kutse “Wabirikara.”
^ Kutse “mighende ye Nile.”
^ Kinywa kwa kinywa, “Nabirikola.”
^ Kutse “efarasi; eshevale.”
^ Ni bugha ambu, erikangania Hezekia.
