Ebaruha y’akabiri oko Abanya Korinto 10:1-18
10 Ingye Paulo, ngabalemba-lemba omo bolo n’obubuya bwa Kristo, ingye mundu oyukayikehaya omughulu niri embere syenyu, aliwe oyutebasagha omughulu nite haghuma nenyu.
2 Ekyo ngabasaba kya kino: Muyikase omughulu ngendihika isinatsuka eritsumanga abakalengekanaya bati tukayighendaya omo nzira y’ekinya-mubiri.
3 Kundi nomo tuli n’amaisa awali ng’aw’abandi, situlilwa ng’abandu.
4 Ebindu byetu by’amalwa si by’ekinya-mubiri, aliwe oMungu yukahabyo akaghala bitoke eriterya ebindu ebyabirihanda emirihi.
5 Tukateraya amalengekania w’amabehi n’obuli kindu ekyangakakirya abandu eriminya oMungu. Kandi tukakinda amalengekania wosi atoke erikwama Kristo.
6 Kandi tuli tayari eriha amalipizi obuli mundu oyutyowa. Tukendimuha amalipizi mwabikangania ndeke-ndeke ngoko mukowa.
7 Mukasoha emyatsi ngoko ikalangirika. Omundu amabya inikirirye ngoko ni wa Kristo, atasyalengekania oko kino: Netu tuli bandu ba Kristo, ngoko naye ni mundu wa Kristo.
8 Nomo nanganayihalamba kutsibu hake busana n’obutoki obo Mukama abirituha, busana n’eribahimba butsir’iribahimbula, sinangakwa esisoni busana n’ekyo.
9 Kundi sinanzire kikalangirika nga nilue ngasondya eribita obuba omo syobaruha syaghe.
10 Abandu bakabugha bati: “Esyobaruha siwe siri n’obulito kandi sikalire, aliwe omughulu ali aho siwangamusagha; n’omughulu akatsuka eribugha, siwanganza n’erimuhulikirira.”
11 Abakabugha batya baminye ngoko ebyo tukabugha omo syobaruha syetu omughulu tute haghuma nenyu, bye n’ebyo tukendisyakola omughulu tukendisyabya haghuma nenyu.
12 Situlisondaya eriyihira oko bandu abakayihalamba kutse eriyilingirirania nabo. Bakayitswera erikwamana n’ebyo ib’ibene-bene bakabugha bati byuwene. Bakayilingiriranaya nabo ib’ibene-bene. N’ekyo kikakanganaya ngoko sibawite obwenge.
13 Nikwa sitwendiyihalamba kulenga ngoko kitolere. Aliwe, tukendiyihalamba busana n’ebyo twabiritoka erikola omo kati-kati k’ekiharo eky’oMungu abiritughabira n’ekyo mwikeremo.
14 Oko kwenene, situlinenehaya ekiharo kyetu, ikyabya nga sikihikire eyo muli, kundi n’itwe twatsuka erihika ewenyu busana n’eribatulira engulu mbuya ya Kristo.
15 Iyehe, situliyihalamba busana n’omubiiri w’oghundi mundu. Omwikola tutya, situliyihira omo biharo ebite byetu. Aliwe, twikirirye ngoko obwikirirya bwetu bukendikanyirira, n’omubiiri ogho twabirikola nagho akendikanyirira omo kiharo kyetu. Neryo tukendibya n’obutoki bw’eritasyakola ebingyi,
16 tutoke eritula engulu mbuya omo bihugho ebiri hali erilaba okw’inywe. Twamakola tutya, isitwendiyihalamba busana n’omubiiri owabirikolwa omo kiharo ky’oghundi mundu.
17 “Aliwe oyukayihalamba, ayihalambe omo Yehova.”*
18 Kusangwa Yehova* syaliligha omundu oyukayihalamba, aliwe akaligha oyo iyuwene-wene akapipa.
