Ebaruha y’akabiri oko Abanya Korinto 11:1-33
11 Nanzire imwanighanyira busana n’obukiru bwaghe buke. Oko kwenene, munemunighanyira.
2 Kundi nibatsomene kutsibu ngoko oMungu naye abatsomene, nabiribabwira niti mukendisyalunga n’omulume mughuma, kandi nanzire eribaleta embere sya Kristo ng’omubikira.
3 Aliwe, ngasagha niti, ngoko enzoka yateba Eva omo mayele wayo, obwenge bwenyu bwanganatsanda, neryo imwaleka eryanza Kristo omo kwenene n’omo mibere eyuwene.
4 Kandi omundu amasa n’eribakangirirya oghundi Yesu oyo tutabakangiriraya, kutse mwamabihabwa ekindi kirimu ekyo mutahabawa, kutse imwowa eyindi ngulu mbuya eyo mutaligha, simulighana omundu oyo.
5 Aliwe, ingye ngalangira nga sihali ekindu kyosi-kyosi ekikakanganaya ngoko niri muke oko bakwenda benyu abakabya nga bali endata oko bandi.
6 Nomo nitasi eribugha ndeke, aliwe ninasi emyatsi mingyi. Kandi nibya nabiribakangania ekyo kyo ndeke-ndeke omo nzira syosi, n’omo buli mwatsi.
7 Munatsema eribatulira engulu mbuya y’oMungu butsira eribalihisya. Munakola erilolo omwiyikehya nitya, inywe mutoke erisikibwa?
8 Munaligha obuwatikya bw’esindi ndeko. Omo nzira eyo, nabya nga ngiba ebindu by’esyondeko esyo. Munakola nitya busana n’eribakolera.
9 Aliwe, omughulu nabya nilaghire oko buwatikya inine haghuma nenyu, munitabya muheke oko mundu wosi-wosi, kundi abalikyetu abalua e Makedonia mubaniwatikya kutsibu eribana ebyo nilaghireko. Oko kwenene, omo buli mwatsi, munayikasa eritendibya muheke okw’inywe, kandi sinendisyaleka erikola nitya.
10 Ngoko ekwenene ya Kristo yiri emwisi syaghe, sinendisyaleka eriyihalamba busana n’omwatsi oyu omo biharo bye Akaya.
11 Busanaki? Kundi sinibanzire? OMungu anasi ngoko nibanzire.
12 Aliwe, sinendisyaleka erikola ebyo ngakola, kusudi abakasonda erikangania nga balingirirene netu, n’eriyihalamba busana n’ebyo babirikola, sibabane ekyangaleka ibayipipa.
13 Kundi abandu abo ni bakwenda b’amabehi, ni bandu abakateba abandi, abakabya nga ni bakwenda ba Kristo.
14 Sikiriswekaya kundi Sitani naye akanayiyiramo mumalaika w’ekyakakala.
15 Kwesi sikyangaswekya abaghombe biwe nabo bamabya bakayiyiramo baghombe b’eritunganene. Aliwe oko nduli, bakendisyabana ebyo batolere, erikwamana n’ebyo bakola.
16 Ngasubamo niti: Omundu isyalengekanaya ati niri mukiru. Aliwe, nomo mwanganalengekania mutya, munilangiremo mukiru, imo natoka eriyihalamba hake.
17 Ebyo ngabugha lino, siniribughabyo ngoko Omukama angabughirebyo. Aliwe, ngabughabyo ng’omundu mukiru oyukayihalamba n’eriyipipa.
18 Kundi abandu bangyi bakayihalamba busana n’emyatsi y’ekinya-mubiri, naghe kutya ngendiyihalamba.
19 Kundi muti muli “n’obwenge,” mukavumilia abakiru imunatsemire.
20 Mukavumilia oyukabayiramo bakobe, oyukimaya n’eripura ebindu byenyu, oyukayihira endata syenyu, n’oyukabahunza omo busu.
21 Ngabugha ekyo n’esisoni kundi ekyo kyanganaleka ikyalangirika nga twabya tukasagha omughulu twabya haghuma nenyu.
Aliwe, abandi bamabya isibalisagha, ngabugha ng’omukiru, naghe sinirisagha.
22 Bamabya ini Baebrania, naghe niri Muebrania. Bamabya ini Baisraeli, naghe niri Muisraeli. Bamabya ini bana* ba Abrahamu, naghe niri mwana wa Abrahamu.
23 Bamabya ini baghombe ba Kristo, ngasubiraya ng’omusire. Niri mughombe wa Kristo kubalenga, kundi munakola omubiiri munene kubalenga. Nabiribohwa kangyi-kangyi kubalenga. Nabirihunzwa butaghanzika. Nabiribya hakuhi n’oluholo ngendo nyingyi.
24 Ngendo itano Abayahudi mubamba ebiboko 40 erilusyako kighuma.
25 Ngendo isatu mubanihunza omo syofimbo. Ngendo nguma mubanighusako amabwe. Ngendo isatu obwato bwetu mubwatsutsangika. Munasighala omo ngetse omo kiro n’omwitungyi.
26 Ingaghenda-ghenda. Ingabya omo hatari omo syonyusi. Ingabya omo hatari busana n’ababandi. Ingabya omo hatari busana n’Abayahudi ng’angye. Ingabya omo hatari busana n’abandu b’ebindi bihanda. Ingabya omo hatari omughulu niri omo muyi. Ingabya omo hatari omo mbwarara. Ingabya omo hatari busana n’engetse. Ingabya omo hatari omo kati-kati k’abaghala betu b’amabehi.
27 Ingakola emibiiri eyikala-kalire kandi ingayikasa kutsibu. Kangyi-kangyi, ingabula ehighotseri, ingakwa enzala n’enyota. Kangyi-kangyi, ingabula eky’erirya. Ingakwa embeho, n’eribula eky’eryambala.
28 Erilusyako emyatsi eyo y’ehihya, hane ekikanihanga-hangaya obuli kiro: Ry’erihangya-hangya busana n’esyondeko.
29 Omughulu omundu akabula akaghala, ngamukwira obulighe. Omughulu omundu akatwikala, ngayowa muhanda.
30 Namabiyihalamba, ingendiyihalamba busana n’emyatsi eyikakanganaya ngoko siniwite kaghala.
31 OMungu kandi Tata w’Omukama Yesu, oyutolere eripipwa kera na kera, anasi ngoko siniribugha amabehi.
32 E Damasko, omuguvernere w’omwami Areta abya iniabirihira abateya oko milango y’omuyi batoke erinihamba.
33 Aliwe, mubanihira omo kitiri, neryo bamanilabya omo ridirisa eryabya oko luhimbo lw’omuyi, neryo namabala.
Amaelezo awehikwa
^ Kutse “lubuto.”
