Ebaruha y’akabiri oko Abanya Korinto 12:1-21
12 Ritolere inayihalamba. Ekyo sikyanganiletera endundi, aliwe lino ngasonda erikania oko syonzoli n’emyatsi eyo Mukama anibisulira.
2 Ninasi omundu oyuli omo bughuma na Kristo, oyo hamabilaba emyaka 14, mwatwalwa omo lubula lw’akasatu. Sinasi ngabya omo mubiri kutse iyehe, oMungu yo wasi.
3 Ninasi omundu oyo. Sinasi ngabya omo mubiri kutse iyehe, oMungu yo wasi.
4 Mwatwalwa omo paradiso, kandi mwowa ebinywa ebyo omundu ate angatoka eribugha, n’ebyo mundu atahamulirwe eribugha.
5 Ngendiyihalamba busana n’omundu oyo, aliwe sinendiyihalamba busana naghe. Nikwa ngendiyihalamba busana n’emyatsi eyikanilema.
6 Nomo nangananza eriyihalamba, sinendibya mukiru kundi ingendibugha tu ekwenene. Aliwe, ngayikasa eritendiyihalamba. Kundi namayihalamba, ikyanganaleka omundu inianiha olukengerwa olulengire ebyo ngakola kutse ebyo ngabugha,
7 busana n’eribisulirwa risa emyatsi eyikaswekaya.
Ngasyayiheka, munahabwa erihwa ry’omo mubiri, omumalaika wa Sitani, abya akanimatangula* isinayiheka kutsibu.
8 Ngendo isatu munalemba-lemba Omukama niti anilusayemo erihwa eryo.
9 Aliwe, mwanibwira ati: “Olukogho lwaghe lukutosire, ngabya ininemukuha akaghala kanene omughulu wamabula kaghala.” Neryo ngendiyihalamba n’obutseme busana n’obulema bwaghe kusudi akaghala ka Kristo kabye ikananiswikire ng’ehema.
10 Neryo ngatsema busana n’eribya n’obulema, busana n’eritsambwa, busana n’eribulirwa, busana n’eryaghalibwa,* busana n’amaligho, ebyosi ebyo busana na Kristo, kundi omughulu ngabula akaghala, m’omughulu ngabya n’akaghala kanene.
11 Nabiribya mukiru. N’inywe mwaleka inabya nitya, kundi n’inywe mwabya mutolere eribugha ebyuwene okw’ingye. Nomo niri mundu bule, sihali ekindu kyosi-kyosi ekikakanganaya ngoko niri muke oko bakwenda benyu abakabya nga bali endata oko bandi.
12 Oko kwenene, omw’iyiyinia rinene, munakola omo kati-kati kenyu mw’emyatsi eyikakanganaya ngoko niri mukwenda. Munakola ebitiko-tiko n’emyatsi eyikaswekaya.
13 Niki kyo kikakanganaya ngoko munitabakolera ndeke ng’esindi ndeko? Indi alinga ry’eritendibya muheke okw’inywe. Munganyire busana n’omwatsi oyo.
14 Eno yo ngendo y’akasatu ininemubya tayari eryasa ewenyu. Kandi sinendibya muheke okw’inywe. Ekikanileta si by’ebindu byenyu, aliwe ngasa busana nenyu, kundi abana bo batetundira ababuti babo b’ebindu, aliwe ababuti bo bakatundira abana babo.
15 Naghe ngenditsema erikolesya ebindu byosi ebyo niwiteko, n’eriyiherera busana nenyu.* Namabya inibanzire kutsibu, nenyu isimwanganianza kutsibu kwe?
16 Aliwe, munitabya muheke okw’inywe. Nikwa mukabugha muti munabya “n’amayele” kandi muti “munabateba.”
17 Munitabarondyamo endundi erilabira abandu abo natuma ewenyu, ko bite bitya?
18 Munalemba-lemba Tito niti aye ewenyu. Munamutuma n’oghundi mughala wetu. Tito mwatabarondyamo endundi n’ahake, ko bite bitya? Twabya n’amalengekania maghumerera, ko bite bitya? Twabya n’emikolere mighumerera, ko bite bitya?
19 Mwabere mukalengekania muti tukayilwirako kwe? Tukabugha embere sy’oMungu kandi omo bughuma na Kristo. Aliwe banzwa betu, ebyosi ebyo tukakola, tukakolabyo busana n’eribahimba.
20 Ekyo ngasaghira kya kino: Ngabula omughulu ngendisyahika, nga ninemwendisyabeya ngoko nanzire imwabya, kutse naghe nga ninemwendisyabya ngoko mwanzire inabya. Aliwe alinga, nanganeyayo obuhaka, eritsuro, emipuro, amalwa, olutongo, ebwebwebwe, erighundu, n’eputsu-putsu.
21 Aliwe alinga, kandi omughulu ngendisyahikeyo, oMungu waghe akendisyanihemula embere syenyu. Kandi alinga ngendisyalira busana n’abandu bangyi abakola malolo aho mbere halya, aliwe abatayisubako busana n’emyatsi eyiterire, oburaghane,* n’obutakw’isoni.*
Amaelezo awehikwa
^ Kutse “akanihunza.”
^ Kutse “n’eryendereribwa.”
^ Kutse “busana n’esyonafsi syenyu.”
^ Omo Kigiriki ni por·neiʹa. Ulebaye amaana w’ebinywa.
^ Kutse “omubere w’eritendikw’isoni.” Omo Kigiriki, a·selʹgei·a. Ulebaye amaana w’ebinywa.
