Ebaruha y’akabiri oko Abanya Korinto 13:1-14
13 Eno ni ngendo y’akasatu ininemwasa ewenyu. Eriminya omwatsi nga ni w’ekwenene kutse iyehe, ritolere ihabya abimiri* babiri kutse basatu.
2 Nomo nite haghuma nenyu, lino ngabya nga nine haghuma nenyu engendo y’akabiri. Kandi ngalunatsuka erikunga abakola amalolo oho mbere halya, n’abandi bosi ngoko namasyahika eyo, isihali n’omughuma oyukendibala.
3 Kundi mukarondaya ekikakanganaya ndeke-ndeke ngoko Kristo, oyutebakolera ng’omundu oyutawite akaghala, aliwe ng’omundu oyuwite akaghala, yukabugha erilabira ingye.
4 Kundi mubamukongomerera oko muti busana n’eribula akaghala, aliwe aliho busana n’obutoki bw’oMungu. Oko kwenene, netu tukabula akaghala ngoko naye abulako, aliwe tukendisyabyaho haghuma naye busana n’obutoki bw’oMungu, oyukakola omo kati-kati kenyu.
5 Mubye mukalebya nga munemukola erikwamana n’obwikirirya bwenyu. Mubye mukalebya nga muli bandu abali bati. Simwasi ngoko Yesu Kristo ali omo bughuma nenyu? Bite bitya, imwabirighanwa.
6 Nikirirye kundu ngoko mukendiminya ko situlitwaghanwa.
7 Lino tukasaba oMungu tuti isimwakola emyatsi mibi. Si bugha ambu twanzire imwatulangiramo bandu abalighirwe. Aliwe, twanzire imwakola ebyuwene nomo twangalangirika nga situlighirwe.
8 Kundi sitwangatoka erilwa n’ekwenene, aliwe tukalwira oko kwenene.
9 Eribugha ekwenene, tukatsema omughulu tukabula akaghala, aliwe inywe imune n’akaghala. Kandi tukabya itunemusaba tuti musube oko mibere yenyu.
10 Ekyo kyo kikaleka inabahandikira emyatsi eyi isindi haghuma nenyu, neryo omughulu ngendibya haghuma nenyu, isinakala omughulu ngakolesaya obutoki obo Mukama aniha. Aliwe kumbe, inakolesya obutoki obo busana n’erihimba, butsira busana n’erihimbula.
11 Oko nduli, baghala betu, isimwaleka eritsema, erisuba oko mibere, erikiranibwa, eribya n’amalengekania maghuma, eribya omo buholo n’abandi, neryo oMungu w’olwanzo n’ow’obuholo iniakendibya haghuma nenyu.
12 Muramukanaye omo lwanzo.*
13 Ababuyirire bosi bamabaramukya.
14 Olukogho lw’Omukama Yesu Kristo, n’olwanzo lw’oMungu, n’ekirimu kibuyirire, ekyo itwe bosi twabirihabwa, bibye haghuma nenyu.
