Ebaruha y’akabiri oko Abanya Korinto 2:1-17
2 Neryo nabiriyisogha niti omughulu ngendihika ewenyu, rero sinanzire eribita obulighe.
2 Namabibita obulighe, ni bahi abangaleka inatsema bate inywe nirita obulighe?
3 Munahandika ebyo nahandika, kusudi omughulu ngendisyasa abangaleka inatsema isibaleka inakwa obulighe. Kundi nikirirye ngoko ebikaniletera obutseme byo bikabaletera nenyu obutseme.
4 Nabahandikira inine n’obulighe bunene, n’eryaghalwa omo mutima, kandi ininemulira. Munitakola nitya busana n’eribita obulighe, aliwe busana n’eribakangania ngoko nibanzire kutsibu.
5 Neryo omundu amabya imwakakola omwatsi owakita obulighe, singye alita obulighe, aliwe inywe bosi omo lulengo lulebe. Nikwa sinanzire erikalya omwatsi oyo.
6 Abangyi b’omw’inywe babirikunga omundu oyo, n’ekyo kitosire.
7 Ritolere imwaghanyira omundu oyo n’erimukirania, akasyabunika mutima busana* n’obulighe bunene.
8 Ngabasaba niti mumukanganaye ngoko mumwanzire kutsibu.
9 Ekyo kyo kyaleka inabahandikira, nitoke eriminya nga mukanowa omo myatsi yosi.
10 Mwamabighanyira omundu, naghe inamabimughanyira. Oko kwenene, ekyosi-kyosi ekyo nabirighanyira, hamabya ekosa eyo nabirighanyira, iniryakola nitya busana n’eribawatikya embere sya Kristo.
11 Ngakola nitya Sitani akasyatukinda kundi tunasi amayele wiwe.
12 Neryo omughulu nayatula engulu mbuya ya Kristo e Troa, munabana akanya k’erikolera Omukama.
13 Munitayowa ndeke kundi mundalola oko mughala wetu Tito. Neryo munabalagha n’erilola e Makedonia.
14 Aliwe, ngasima oMungu oyukatusondola haghuma na Kristo ng’abandu abakalwa okw’isinga, kandi oyukatsatsanga ekikumbo ky’erimuminya ehosi-hosi erilabira itwe.
15 Kundi embere sy’oMungu, tuli ekikumbo ekyuwene kya Kristo omo kati-kati k’abandu abanemusabulwa, n’omo kati-kati k’abandu abali okw’iheribwa.
16 Oko bali okw’iheribwa, tuli kikumbo ky’oluholo ekikatwala oko luholo. N’oko banemusabulwa, tuli kikumbo ky’engebe ekikatwala oko ngebe. Neryo nindi yutolere emyatsi eyo?
17 Nitwe, kundi situlighulaya* ekinywa ky’oMungu ngoko abandu bangyi bakakola. Aliwe, kundi tukatumawa n’oMungu, tukabugha ekwenene. Tukakola tutya embere sy’oMungu, kandi haghuma na Kristo.
