Ebaruha y’akabiri oko Abanya Korinto 3:1-18
3 Kandi tutsuke erikangania nga tuli bahi kwe? Kutse ng’abandi bandu, ritolere itwabaha esyobaruha esikakanganaya nga tuli bahi kwe? Kutse sitolere isyalua okw’inywe?
2 N’inywe muli baruha yetu, eyihandikire omo mitima yetu, eyasibwe n’eyikasomawa n’abandu bosi.
3 Kundi mwabirikangania ngoko muli baruha ya Kristo, eyo twahandika erilabira omubiiri wetu. Ebaruha eyo muyatahandikwa omo bwino, aliwe muyahandikwa omo kirimu ky’oMungu oyuliho. Muyatahandikwa oko bihande by’amabwe, aliwe oko mabwe w’ekinya-mubiri, ni bugha ambu, oko mitima yetu.
4 Twikirirye ekyo embere sy’oMungu, erilabira Kristo.
5 Si bugha ambu, tukayitokera ekindu omo kaghala ketu. Aliwe, oMungu yukatutokesaya.
6 Iye yo waleka itwatolera eribya baghombe b’endaghane nyihya-nyihya, butsira abaghombe b’emighambo eyihandikire, aliwe abaghombe b’ekirimu; kundi emighambo eyihandikire ikakolaya oko luholo, aliwe ekirimu kikaha engebe.
7 Neryo emighambo eyikakolaya oko luholo n’eyabya yihandikire oko mabwe, yamabya iyasa omo lukengerwa olwaleka abana be Israeli ibatatoka erilebya obusu bwa Musa kundi bwabya ibwabirikangabasania, erikangabasania eryangahwere,
8 simulangire ngoko olukengerwa lwangabere lunene okw’aho omughulu oMungu angahere abandu b’ekirimu kiwe?
9 Emighambo eyikakolaya oko luholo yamabya imoyasa omo lukengerwa, simulangire ngoko omubiiri w’eriwatikya abandu babye batunganene angabere n’olukengerwa lunene okw’aho?
10 Ekyabya n’olukengerwa mukyalusibwako olukengerwa lwakyo busana n’olukengerwa olulengirelo.
11 Kundi ekyangalusibweho kyamabya imo kyasa omo lukengerwa, ekyangasighere kyangabere n’olukengerwa lunene okw’aho.
12 Kundi tuwite amaha aya, tukabugha butsir’isagha.
13 Kandi situlikola nga Musa oyo wahira akatambara k’oko busu bwiwe, abana be Israeli bakasyasamalira erikangabasania eryangahwere.
14 Aliwe, obwenge bwabo mubutakingukala. Kandi erihika na lino, omughulu erilaghana rya kera rikasomawa, akatambara ako kakabya ikane, kundi kakalusibawaho erilabira Kristo musa.
15 Erihika lino, omughulu emyatsi eyo Musa ahandika ikasomawa, akatambara kakabya ikane oko mitima yabo.
16 Aliwe, omughulu omundu akabindukira Yehova,* akatambara ako kakalusibawaho.
17 Nikwa Yehova* ni Mulimu. N’akandi, ahali ekirimu kya Yehova,* hali obwiranda.
18 Kandi itwe bosi obusu bwetu isibuliko akatambara, tukakanganaya ng’ebiyo olukengerwa lwa Yehova.* Omughulu tukakola tutya, tukasosa oMungu. Neryo tukakanganaya ndeke-ndeke olukengerwa lwiwe, ngoko Yehova,* Omulimu, akakola.*
Amaelezo awehikwa
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Kutse kandi, “erilabira ekirimu kya Yehova.”
