Ebaruha y’akabiri oko Abanya Korinto 4:1-18
4 Neryo kundi tuwite omubiiri oyu busana n’obughanyiri obo Mungu abiritukangania, situlileka.
2 Aliwe, twabirileka erikola emyatsi y’esisoni, eyikakolawa omo bubiso-biso. Situlikola omo bulimba-limba,* kutse situlihengemaya ekinywa ky’oMungu. Aliwe, omw’iminyisya abandu b’ekwenene, tukakanganaya obunya-mutima* bw’obuli mundu, kandi embere sy’oMungu, ngoko tunemuyighendya ndeke.
3 Oko kwenene, engulu mbuya eyo tukatula yamabya iyiswikireko ekitambara, iyiswikireko ekitambara oko bakendisyatsandibwa.
4 Omungu w’ekihugho kino* abiriliba obwenge bw’abandu abatikirirye bakasyalangira ekyakakala ky’engulu mbuya y’olukengerwa ya Kristo, oyuli kisosekanio ky’oMungu.
5 Situlitula emyatsi eyitulebirye. Aliwe, tukatulaghanaya ngoko Yesu ni Mukama, kandi ngoko tuli bakobe benyu busana na Yesu.
6 Kundi oMungu yo wabugha ati: “Ekyakakala kikoleraye omo mwirima.” Kandi abirikolerya omo mitima yetu, yitoke eribyamo ekyakakala ky’eriminya emyatsi eyuwene kundu oko Mungu, erilabira obusu bwa Kristo.
7 Aliwe, tuwite ekindu kino ky’obughuli omo bindu by’eribumba,* obutoki obulengire obw’abandu butoke eribya bw’oMungu, butsira bwetu.
8 Amaligho mbiriri-mbiriri atutimbireko, aliwe syalilu akatuhamba itwataluka eriyilusya mugho. Hane omughulu tukabula nga tuyire tuti, aliwe situlilw’itwabula eky’erikola.*
9 Tunemwaghalibwa,* aliwe situlisighanibawa. Tunemughuswa ahisi, aliwe tukineho.
10 Ebiro byosi bakabya ibanemusonda eritwita nga Yesu. Biri bitya engebe ya Yesu itoke erilangirika n’omo mibiri yetu.
11 Itwe tuliho, bakabya ibanemusonda eritwita busana na Yesu. Biri bitya, engebe ya Yesu itoke erilangirika n’omo mibiri yetu eyikahola.
12 Neryo oluholo lunemukola omubiiri emwisi syetu, aliwe engebe yiri emwisi syenyu.
13 Netu tuwite ekirimu ky’obwikirirya ngoko Amasako akabugha ati: “Munikirirya, ky’ekyaleka inabugha.” Kutya netu twikirirye, kyo kikaleka itwabugha.
14 Kundi tunasi ngoko oyo walubukaya Yesu, akendisyatulubukya netu, tutoke eribya haghuma na Yesu n’erituleta embere siwe.
15 Ebyosi ebi biriho busana nenyu, kusudi olukogho lw’oMungu lutoke erikanyirira kutsibu kundi abandu bangyi banemuha oMungu y’ewasingya, n’ekyo kinemuha oMungu y’olukengerwa.
16 Busana n’ekyo, situlileka. Aliwe, nomo omundu wetu w’ehihya anganatsanda, oko kwenene omundu wetu w’emwisi akabya inianemubya muhya-muhya kiro kwa kiro.
17 Kundi nomo amaligho anganabya w’omughulu muke, kandi isyalitohire, akatuletera olukengerwa lunene kutsibu, kandi lwa kera na kera.
18 Kutya situlihira ameso wetu w’oko bindu ebikalangirika, aliwe tukahiragho oko bindu ebitelangirika. Emyatsi eyikalangirika ni y’omughulu muke, aliwe emyatsi eyitelangirika ni ya kera na kera.
Amaelezo awehikwa
^ Kutse “obunafiki.”
^ Kutse “ezamiri.”
^ Kutse “w’omughulu ono.” Ulebaye amaana w’ebinywa.
^ Kutse “malegha w’eribumba.”
^ Kutse kandi, “situlibula amaha.”
^ Kutse “Tunemwendereribwa.”
