Ebaruha y’akabiri oko Abanya Korinto 5:1-21
5 Kundi tunasi ngoko enyumba yetu y’oko kihugho, ni bugha ambu, ehema eno yamasambulwa,* tukendisyabya n’enyumba eyikalua oko Mungu, eyitendisyahimbwa omo byala, aliwe eyikendisyabya elubula kera na kera.
2 Omo nyumba* eno, tunemusimba. Ekyo kikaleka itwanza kutsibu eryambala enyumba yetu ey’elubula,*
3 kusudi omughulu tukendisyambalayo, sitwendisyasyabya ndumbu.
4 Oko kwenene, itwe tuli omo hema eno, tukasimba, tukaghalawa kutsibu, kundi sitwanzire erilusya ehema eno. Aliwe, twanzire eryambala eyindi, kusudi engebe itoke erimya omwanya w’omubiri owakahola.
5 Oyukatuteghekanaya busana n’emyatsi eyi ni Mungu. Abirituha ekirimu kiwe ekikakanganaya ndeke-ndeke ngoko tukendisyahembwa omo mughulu owakasa.*
6 Neryo, tukabya itunasikire biro byosi, kandi itunasi ngoko ebiro byosi ebyo tukabya itune omo mubiri, situlibya hakuhi n’Omukama.
7 Kundi situlisondolawa n’emyatsi eyo tukalangira, aliwe tukasondolawa n’emyatsi eyo twikirirye.
8 Nikwa tukabya itunasikire, kandi twangananza eritendibya omo mubiri ono tutoke eribya hakuhi n’Omukama.
9 Busana n’ekyo, twangabya hakuhi naye, kutse twamatendibya hakuhi naye, tukayikasa erimutsemesya.
10 Kusangwa, itwe bosi ritolere itwahika* embere sy’ekitumbi ky’eritswera kya Kristo kusudi obuli mundu alihawe erikwamana n’emyatsi eyakola iniakine omo mubiri ono, yangabya eyuwene kutse eyituwene.*
11 Neryo, kundi tunasi ngoko ritolere itwasagha Omukama, tukabya itunemubwira bandu tuti bikiriraye ebyo tukabakangiriraya. Aliwe, twasibwe ndeke embere sy’oMungu. Nikwa nikirirye ngoko obunya-mutima* bwenyu nabo butwasi ndeke.
12 Si bugha ambu kandi tukasondaya eribabwira nga tuli bahi. Aliwe, tukasonda eribaha ebyangaleka imwayipipa busana netu, kundi ekyo kikendileka imwatoka erisubirya abakayihalamba busana n’ebikalangirika omo meso, butsira busana n’ebiri omo mutima.
13 Twamabya ituli basire, ini busana n’oMungu. Twamabya itune n’obwenge bwetu bosi, ini busana nenyu.
14 Kundi olwanzo lwa Kristo lukatukuna, kusangwa twabiriminya omwatsi ono: Omundu mughuma mwahola busana n’abandu bosi, kundi abosi babya ibabirihola.
15 Kandi mwahola busana n’abandu bosi, neryo abaliho isibabyaho busana n’erikola ebyo banzire, aliwe busana n’eritsemesya oyo wahola busana nabo n’erilubukibwa.
16 Neryo eritsuka lino situkilangira omundu wosi-wosi ngoko abandu bakamulangira. Nomo kera twanabya tukalangira Kristo yo tutya, munabwire situkimulangira tutya.
17 Busana n’ekyo, omundu wosi-wosi oyuli omo bughuma na Kristo, iye ni kihangyikwa kihya-kihya. Emyatsi ya kera yabirilaba, neryo emyatsi mihya-mihya yabiribyaho.
18 Aliwe, emyatsi yosi yikalua oko Mungu, oyo wabiritusubya omo bughuma naye erilabira Kristo, n’erituha omubiiri w’eriwatikya abandu eribya omo bughuma naye.
19 Omubiiri oyo ni watikya abandu eriminya ngoko oMungu, erilabira Kristo, abirisubya ekihugho ky’omo bughuma naye. Mwatabya akalebya amakosa wabo. Kandi abirituha omulaghe owakawatikaya abandu erisuba omo bughuma naye.
20 Kwesi, tuli baambasadere omo mwanya wa Kristo. OMungu anemulemba-lemba abandu erilabira itwe. Omo mwanya wa Kristo, tukabalemba-lemba tuti: “Musube omo bughuma n’oMungu.”
21 Oyo wabya isyasi erilolo, oMungu mwamuyiramo erilolo* busana netu. Mwakola atya, tutoke eribya batunganene embere sy’oMungu erilabira Kristo.
Amaelezo awehikwa
^ Kutse “yamatsandibwa.”
^ Kutse “obwikalo.”
^ Kutse “obwikalo bwetu bw’elubula.”
^ Kutse “mo avase.”
^ Kutse “itwakanganibwa.”
^ Kutse “ebibi.”
^ Kutse “ezamiri.”
^ Kutse “obuhere bw’erilolo.”
