Ebaruha y’akabiri oko Abanya Korinto 7:1-16
7 Balikyetu banzwa, kundi oMungu abiritulagha emyatsi eyo, tuyilusayeko obuli mutsafu owangakinia omubiri n’omutima.* Tukole tutya tutoke eribya bandu ababuyirire kutsibu n’abasaghire oMungu.
2 Mutukingulire emitima yenyu. Sihali oyo tulyakolera muhanda, sihali oyo tulyatsandaya, sihali oyo tulyanyegha ekindu kiwe.
3 Siniribugha nitya busana n’eribatswera. Kundi nabiribugha niti, ibye engebe kutse oluholo, sibyangabalusya omo mitima yetu.
4 Ngabugha nenyu butsir’isagha. Ngayihalamba kutsibu busana nenyu. Nabirikiranibwa ndeke; nine n’obutseme bunene nomo tunemulaba omo maligho.
5 Omughulu twahika e Makedonia, mututayowa ndeke. Aliwe, mutwabya tukaghalibwa omo myatsi yosi. Habya malwa eyihya, n’obuba emwisi.
6 Aliwe oMungu, oyukakiranaya ababunikire mutima, mwatukirania erilabira erihika rya Tito.
7 Mwatatukirania erilabira erihika riwe risa, aliwe kandi erilabira erikiranibwa eryabana busana nenyu. Kundi mwatubwirire ngoko mwanzire kutsibu eritasyanisunga, kandi ngoko mumwakwa obulighe bunene, kandi ngoko munitsomene kutsibu, n’ekyo mukyaleka inatsema kutsibu.
8 Nomo nanabita obulighe busana n’ebyo nahandika omo baruha yaghe, siniriyikubaya bomo. Nomo oko mwanzo munanayikubya bomo (erilangira ngoko ebyo nahandika omo baruha mubyabita obulighe, aliwe omo katambi kake),
9 lino nitsemire. Si bugha ambu nitsemire kundi mumwakwa obulighe, aliwe nitsemire kundi erikwa obulighe muryaleka imwabindula emitima yenyu. Kundi mumwakwa obulighe obukalua oko Mungu, neryo mumutaghalwa busana netu.
10 Kundi obulighe obukatsemesaya oMungu bukaleka omundu iniabindula omutima, atoke erisabulwa. Kandi syaliyikubaya bomo, aliwe obulighe bw’abandu b’ekihugho bukatwala oko luholo.
11 Kilangirike ngoko mukakwa obulighe obukatsemesaya oMungu. Busana n’ekyo, mumukayikasa erikola ebyuwene, mumukayikasa eritasyabya n’emibere eyuwene, mumukahitana busana n’amakosa wenyu, mumukubaha oMungu, mumukanza eriyisubako, mumukakolera oMungu n’omuhwa, momukalungula emyatsi mibi eyo mwakola, mumukakola emyatsi yosi yo ndeke mutoke eribughaho olubanza olo.
12 Nomo nanabahandikira, sinakola ekyo busana n’eryaghalya oyo wakola omwatsi mubi, kutse busana n’oyo wakolerawa ekibi. Aliwe, nakola ekyo nitoke erilangira nga munemwendikangania ndeke-ndeke embere sy’oMungu ngoko mwanzire erituhulikirira.
13 Ekyo kyo kyatukiranaya.
Mukitatukirania risa, aliwe kandi mukyaleka itwabya n’obutseme bunene omughulu twalangira ngoko Tito naye ali n’obutseme, kundi inywe bosi mumwamukirania.
14 Nomo nanamubwira emyatsi eyuwene okw’inywe, munatakwa esisoni, kundi emyatsi yosi eyo twababwira yabya kwenene. Neryo n’emyatsi mibuya eyo twabwira Tito okw’inywe, nayo yabya kwenene.
15 Kandi Tito abanzire kutsibu kundi akabya inianemwibuka ngoko inywe bosi mukowa, ngoko mwamukokaya n’obuba, kandi ngoko mwamusikaya kutsibu.*
16 Ngatsema kundi nanganayiketera inywe* omo buli mwatsi.
Amaelezo awehikwa
^ Kutse “n’ekirimu.”
^ Kinywa kwa kinywa, “mumwatitimana.”
^ Kutse kandi, “nanganabya n’obutubaha busana nenyu.”
