Ebaruha y’akabiri oko Abanya Korinto 8:1-24
8 Baghala betu, lino twanzire imwaminya olukogho lw’oMungu olwahabawa esyondeko sye Makedonia.
2 Omughulu babya bakaghalwa busana n’erilengwako rinene, mubahitya n’obutseme bunene nomo babya bera kutsibu. Ekyo mukyakangania ngoko bakahitaya kutsibu.
3 Mubahitya erikwamana n’ebindu ebyo babya bawiteko. Munayilangirirakyo, mubahitya bingyi kulenga n’ebyo babya bawiteko.
4 Ib’ibene-bene mubatuhatikana bati nga banganabana olusunzo lw’eriteka akandu kalebe, olusunzo lw’erikola oko mubiiri w’eriwatikya ababuyirire.
5 Kandi mubatateka ebyo twabya tubalindirireko bisa. Aliwe, busana n’erisonda ry’oMungu, mubayiherera oko Mukama n’okw’itwe.
6 Busana n’ekyo, mutwasaba Tito tuti ayabughirire erikuma-kuma ebihembo ebyo mwateka n’omutima wosi, kundi iye yo watsukisaya omubiiri oyo omo kati-kati kenyu.
7 Munemukola ndeke omo buli mwatsi. Muli n’obwikirya obuwatire, muwite obutoki bw’eribugha, mwasi myatsi mingyi, muli n’omuhwa munene, kandi mutwanzire kutsibu ngoko netu tubanzire. Neryo kutya, mubye mukahitya n’omutima wosi.
8 Si bugha ambu ngasonda eribakasa, aliwe nanzire imwaminya omuhwa ogho abandi bali nagho. Kandi nanzire imwalebya olwanzo lwenyu nga ni lw’ekwenene.
9 Kundi munasi olukogho lw’Omukama wetu Yesu Kristo. Munasi ngoko nomo anabya muteke, mwayiyiramo mwera busana nenyu. Mwakola atya mutoke eribya bateke erilabira obwera bwiwe.
10 Kandi ano w’amalengekania waghe oko mwatsi oyo: Kino kikendibawatikya, kundi hamabilaba omwaka mughuma imwabiritsuka omwatsi ono, kandi mwabirikangania ngoko mwanzire erikolagho.
11 Neryo mubughirire omwatsi ogho mwatsuka, kusudi omutima wenyu owuwene alangirike omo bindu ebyo muwiteko.
12 Omundu amateka n’omutima owuwene, oMungu akalighabyo, kundi anzire omundu oyukateka ebyangabana, butsira ebyo ate angabana.
13 Sinanzire emyatsi ikoloba oko bandi, neryo iyakala okw’inywe.
14 Omo mwanya w’ekyo, nanzire ihabya obulingirirania, ebindu bingyi ebyo muwiteko lino bitoke eriwatikya abandi babane ebyo balaghireko; n’ebindu bingyi ebyo bawiteko bitoke erighonerya ebyo mulyabulirawa, neryo habye obulingirirania.
15 Ngoko Amasako akabugha ati: “Oyo wabya n’ebindu binene mwatabya n’ebindu binene kutsibu, n’oyo wabya n’ebindu bike mwatabya n’ebindu bike kutsibu.”
16 OMungu apipawe kundi mwahira omo Tito m’omutima w’eribatsomana ngoko netu tubatsomene.
17 Kusangwa mwataghana ekyo twamusaba. Aliwe, kundi ali n’omuhwa munene, abiriyihaghura, anemwasa ewenyu.
18 Mutukamutuma n’oghundi mughala wetu oyo esyondeko syosi sikasima busana n’ebyo abirikola busana n’engulu mbuya.
19 Si ky’ekyo kisa. Aliwe kandi, abirisombolwa n’esyondeko atoke eribya akaghenda haghuma netu tukayaghaba ebihembo. Ekyo kikaleka Omukama iniapipwa, kandi kikakanganaya ngoko tuli n’omutima w’eriwatikya abandi.
20 Ekyo kikaleka abandu isibabugha muhanda oko mubiiri ogho tukakola ow’erighaba ebihembo.
21 Kundi tukakola emyatsi yosi y’omo kwenene embere sya Yehova,* n’embere sy’abandu.
22 Tukatasyabahirako n’oghundi mughala wetu. Mutwamulengako kangyi-kangyi, neryo twamalangira ngoko akakola emyatsi mingyi n’omuhwa. Na lino anemukola n’omuhwa munene kutsibu kundi ayiketere inywe.
23 Aliwe, hamabya oyukanza eriminya Tito nga nindi, imwamubwira muti ni mulikyetu. Ngakola naye busana n’endundi yenyu. Kandi hamabya oyukanza eriminya abaghala betu abo nga ni bahi, imwamubwira muti ni bakwenda abalyatumawa n’endeko. Kandi bakapipa Kristo.
24 Neryo mubakanganaye ngoko mubanzire. Kandi mukanganaye esyondeko ekikaleka itwayihalamba busana nenyu.
Amaelezo awehikwa
^ Ulebaye endomeko A5.
