Ebaruha y’akabiri oko Abanya Tesalonika 1:1-12
1 Ebaruha eno ikalua oko Paulo, Silvano* na Timoteo. Ngatumirayo endeko y’Abanya Tesalonika, eyiri omo bughuma n’oMungu Tata wetu n’Omukama Yesu Kristo.
2 Olukogho n’obuholo bw’oMungu Tata n’Omukama Yesu Kristo bibye haghuma nenyu.
3 Baghala betu, tukalangira ikitolere erisima oMungu mughulu wosi busana nenyu. Oko kwenene, ekyo kitolere, kundi obwikirirya bwenyu bunemusika kutsibu, kandi munemukangania ngoko mwanzene kutsibu.
4 Ekyo kikaleka itwayihalamba busana nenyu omo kati-kati k’esyondeko sy’oMungu, kundi munemuyiyinia n’erikangania ngoko mune n’obwikirirya omo maligho wosi n’ebitsibu ebyo munemulabamo.
5 Ekyo kikakanganaya ngoko oMungu abiritswera emyatsi omo ritunganene. Kandi ekyo kikendileka imwatolera erisyingira omo Bwami bw’oMungu obukaleka imwaghalwa.
6 Oko kwenene, oMungu asingene eryaghalya abakabaghalaya.
7 Aliwe inywe mukaghalibawa, mukendisyaluhuka haghuma netu omughulu Omukama Yesu akendisyabisulwa erilua elubula, haghuma n’abamalaika b’amaka
8 omo muliro owakaghulumira omughulu akendisyaha amalipizi abatasi oMungu n’abakaghana engulu mbuya eyilebirye Omukama wetu Yesu.
9 Amalipizi ogho bakendisyahabwa ry’eritoghotibwa kera na kera. Kandi bakendisyabulirana embere sy’Omukama n’embere sy’olukengerwa lw’obutoki bwiwe.
10 Ebyo bikendisyabya omughulu akendisyasa busana n’erihabwa olukengerwa haghuma n’ababuyirire biwe, kandi busana n’erisikibwa omo kiro ekyo, omo kati-kati k’abandu bosi abikiriraya, ngoko nenyu mwikiriraya engulu mbuya eyo twabahubiraya.
11 Ekyo kyo kikaleka itwabya tukabasabira, kusudi oMungu wetu abaghanzemo bandu abatolere eribirikirwa, kandi kusudi omo butoki bwiwe, akole ebibuya byosi ebyo anzire, n’eribawatikya mutoke erikola ebyosi ebyo mukakola busana n’obwikirirya.
12 Ekyo kiri kitya kusudi erina ry’Omukama wetu Yesu ripipawe omo kati-kati kenyu, nenyu mutoke eripipwa omo bughuma naye busana n’olukogho lw’oMungu wetu, n’olw’Omukama Yesu Kristo.
Amaelezo awehikwa
^ Kandi akahulawamo Sila.
