Ebaruha y’akabiri oko Abanya Tesalonika 2:1-17
2 Aliwe baghala betu, oko mwatsi owalebirye eribyaho ry’Omukama wetu Yesu Kristo n’erihindanibwa ryetu haghuma naye, kino kyo tukabasaba:
2 Isimwatebawa luba kutse erisaghisibwa n’ebinywa ebikasondolawa n’ekirimu,* kutse ebinywa ebiryabughawa, kutse n’ebaruha eyikabya nga yikalua okw’itwe, ebikabya nga bikakanganaya ngoko ekiro kya Yehova* kyabirihika.
3 Omundu isyabateba omo nzira yosi-yosi, kundi ekiro ekyo sikyendisyahika hatehatsuka eribya abandu abakaleka obwikirirya, kandi hatehabya omundu oyutekwama emighambo, omundu w’eritsandibwa.
4 Akalwa n’eriyihira endata oko kindu kyosi-kyosi ekikahulawamo mungu kutse ekikaramibawa. Akahika n’oko kika ky’erikala omo hekalu y’oMungu, n’eriyikanganiamo mungu.
5 Mwanamibuka ngoko nabya inibeghere eribabwira emyatsi eyo omughulu nabya inikine ewenyu?
6 Aliwe, munasi ekikamukakiraya lino. Akendisyahuluka oko mughulu owatolere.
7 Oko kwenene, omundu oyo, oyutekwama emighambo, abiritsuka erikola omo bubiso-biso. Aliwe, akendisyahuluka ekikamukakiraya kyabiluaho.
8 Oko mughulu oyo, omundu oyutekwama emighambo akendisyahuluka. Omukama Yesu akendisyamubughaho omo kirimu ky’obuno bwiwe, n’erimutoghotya omughulu eribyaho ry’Omukama rikendisyalangirika.
9 Sitani yukaleka omundu oyutekwama emighambo iniabyaho. Kandi Sitani yukaleka iniakola emyatsi mbiriri-mbiriri y’obutoki, ebitiko-tiko by’amabehi, emyatsi eyikaswekaya,
10 n’amabehi wosi awakalwira omo ritatunganene. Akakola atya busana n’abakandisyaheribwa, kundi mubaghana eryanza ekwenene, batoke erisabulwa.
11 Ekyo kyo kikaleka oMungu inialigha batebawe n’amabehi, batoke erikiriryagho.
12 Kandi akakola atya abosi batoke eritswerwa, kundi mubatikirirya ekwenene, aliwe mubanza erikola ebitatunganene.
13 Aliwe, tukalangira ikitolere eribya tukasima oMungu busana nenyu inywe baghala betu, abo Yehova* anzire, kundi erilua oko mwanzo, oMungu mwabasombola, mutoke erisyalama. Mwakola atya omw’ibayiramo babuyirire erilabira ekirimu kiwe, kandi kundi mumwikirirya ekwenene.
14 Mwababirikirira ekyo erilabira engulu mbuya eyo tukahubiraya, mutoke eribana olukengerwa lw’Omukama wetu Yesu Kristo.
15 Neryo baghala betu, musike, kandi mumakirire amakangirirya agho mwakangiriribawa erilabira ebinywa ebyabughawa kutse erilabira ebaruha erilua okw’itwe.
16 Kandi Omukama wetu Yesu Kristo iyuwene-wene, n’oMungu Tata wetu, oyo watwanza n’oyukatukiranaya kera na kera, n’erituha amaha awuwene busana n’olukogho lwiwe,
17 akiranaye emitima yenyu, n’eribawatikya erisika, kusudi mubye mukakola n’eribugha ebyuwene.
Amaelezo awehikwa
^ Kutse “Isimwatebawa luba kutse erisaghisibwa n’ekirimu.” Ulebaye amaana w’ebinywa, “Ekirimu.”
^ Ulebaye endomeko A5.
^ Ulebaye endomeko A5.
