Ebaruha y’akabiri ya Petro 2:1-22
2 Aliwe, habiribya n’abaminyereri b’amabehi omo kati-kati k’abandu, kandi hakendisyabya abakangirirya b’amabehi omo kati-kati kenyu. Bakendisyatsukisya omo bubiso-biso ehisomo ehyangatsandya obwikirirya bwenyu. Bakendisyahika n’oko kika ky’erighana Omukama oyo wabaghula. Neryo busana n’ekyo, bakendisyalw’ibatsandibwa.
2 Abandu bangyi bakendisyakwama emighendere y’obutakw’isoni* ey’abakangirirya abo. Kandi busana n’abakangirirya abo, abandu bakendisyabugha muhanda oko nzira y’ekwenene.
3 Kandi busana n’omururu wabo, bakendisyasondya eribateba omo binywa byabo by’amabehi. Aliwe, oMungu abiriyisogha kera ati bakendisyahabwa amalipizi. N’amalipizi ayo anemwasa luba-luba, n’eritsandibwa ryabo sirighotsere.
4 Oko kwenene, oMungu mwatabugha ati syendiha amalipizi abamalaika abakola erilolo, aliwe mwabaghusa omo Tartaro.* Mwababoha omo munyororo* omo mwirima munene. Omo mwirima oyo, bakalindirira erisyahabwa amalipizi.
5 Kandi mwatabugha ati syendiha amalipizi ekihugho kya kera. Aliwe, mwateya Noa omuhubiri w’eritunganene haghuma n’abandi bandu irinda (7) omughulu aleta eribwagha ry’amaghetse omo kihugho ky’abandu abatemukenga.
6 Kandi omughulu ayira emiyi ye Sodomo ne Gomora mo ribu, aho mwatswerabo n’erikangania ekikendisyahikira abandu abatekenga oMungu.
7 Kandi mwasabula Loti oyo wabya mundu oyutunganene, oyo wabya akayowa muhanda kutsibu busana n’emibere y’obutwakw’isoni* y’abandu abatekwama emighambo.
8 Kusangwa obuli kiro omutunganene oyu, oyo wabya wikere omo kati-kati kabo, abya akaghalya enafsi* yiwe eyitunganene busana n’emyatsi mibi eyo abya akalangira n’eryowa.
9 Neryo Yehova* anasi erilusya omo maligho* abandu abateleghula, kandi anasi eribikira amalipizi abatatunganene batoke erisyatsandibwa omo kiro ky’eritswerwa,
10 kutsibu-tsibu abakakwama esyongumbu sy’omubiri n’erisonda eritsandya emibiri y’abandi, n’abaghonere abakulu.
Busana n’eriyilabirirya n’erighundu, sibalisagha eribugha muhanda oko bandu b’olukengerwa.
11 Eky’eriswekya abamalaika ibo nomo banawite akaghala n’obutoki bunene, sibalitsongera abakangirirya abo omw’ikolesya ebinywa ebituwene kundi basikirye* Yehova.*
12 Aliwe, kundi abandu aba bali ng’esyonyama esitawite obwenge, kandi esikabutawa busana n’erihambwa n’eritsandibwa, bakabugha muhanda oko myatsi eyo batasi. Neryo bakendisyatsandibwa busana n’emighendere yabo eyikatwala okw’itsandibwa.
13 Omupokero ogho bakendisyahabwa ry’eryaghalibwa busana n’ebibi ebyo bakola.
Banzire kutsibu eriyitsemesya, nibya n’omwitungyi. Abandu abo ni mutsafu n’ebitanga-bitanga. Bakatsemera amakangirirya wabo w’amabehi omughulu bakabya ibane omo fete haghuma nenyu.
14 Ameso wabo aswiremo obusingiri, kandi sibangatoka erileka amalolo. Kandi bakateba abandu abatasikire omo bwikirirya. Omutima wabo aswiremo mururu. Ni bana ababiritakirwa.
15 Babirihera, kundi babirileka erikwama enzira eyilungukere. Babirikwama enzira ya Baalamu, mughala wa Beori, oyo wanza omusahara ogho bamuha busana n’erikola ekibi.
16 Aliwe, mwakungwa busana n’ekosa eyo akola. Enyama eyitebugha eyikaheka emiheke, muyabugha omo mulenge w’omundu, neryo muyakakirya omuminyereri erikola omwatsi w’obukiru.
17 Abandu abo ni ngununuko esiteluamo amaghetse, kandi ni luhohe olukakunawa n’erihunga rinene. Babiribateghekanirya omwirima munene.
18 Bakabugha ebinywa by’eriswekya aliwe ebite n’omughaso. Omw’isonda eryanzisya esyongumbu sy’omubiri n’erikola emyatsi y’obwitakw’isoni,* bakateba abandu abakabulikira babala oko bandu abakakola amalolo.
19 Bakabwirabo bati bakendibya omo bwiranda, nikwa ibo ini bakobe b’eritsanda, kundi omundu amakusinga,* aho iwamabya mukobe wiwe.
20 Oko kwenene, babilua omo myatsi eyikita esyonye y’ekihugho busana n’eriminya emyatsi y’ekwenene y’Omukama n’Omusabuli wetu Yesu Kristo, neryo bakatasyakola emyatsi eyo eyikita esyonye n’erisingwa, bakalw’ibatsanda kutsibu kulenga ngoko babya embere.
21 Kyanguwanire kubo eritendiminya ndeke-ndeke enzira y’eritunganene omo mwanya w’eriminyayo kandi ibatasyaleka erikwama emighambo mibuyirire eyo bahabawa.
22 Omusyo ono kwenene abiribererera kubo: “Embwa yabirisubira ebisalo byayo, n’engulube eyiryanabibawa yabiriyayikumbaghalya omo byondo.”
Amaelezo awehikwa
^ Kutse “emibere yabo y’obutakw’isoni.” Obungyi bw’ekinywa ky’Ekigiriki a·selʹgei·a. Ulebaye amaana w’ebinywa.
^ Ulebaye amaana w’ebinywa.
^ Kutse kandi, “byuna.”
^ Kutse “emibere y’eritendikw’isoni.” Omo Kigiriki ni a·selʹgei·a. Ulebaye amaana w’ebinywa.
^ Ulebaye amaana w’ebinywa.
^ Ulebaye endomeko A5.
^ Kutse “malengwako.”
^ Kutse “embere sya Yehova.”
^ Ulebaye endomeko A5.
^ Kutse “emibere y’eritandikw’isoni.” Obungyi bw’ekinywa ky’Ekigiriki a·selʹgei·a. Ulebaye amaana w’ebinywa.
^ Kutse “ekindu kyamakusinga, aho iwamabya mukobe wakyo.”
