Samweli w’Akabiri 1:1-27
1 Sauli abere abihola, Daudi abya iniabirilua okw’isinga* Abaamaleki. Abya iniamabibugha e Ziklagi y’ebiro bibiri.
2 Ekiro ky’akasatu, omulume mwalua omo kambi ya Sauli iniambite esyongyimba esitulangikire n’olututu ilune oko mutwe wiwe. Mwabya abihika embere sya Daudi, mwakukama n’erihira obusu bwiwe b’oko kitaka.
3 Daudi mwamubulya ati: “Ukaluahi?” Omulume oyo mwamusubirya ati: “Niryatswa omo kambi y’Abaisraeli.”
4 Kandi Daudi mwamubulya ati: “Emyatsi muyikaghenda yiti? Nibwire.” Omulume oyo mwamusubirya ati: “Amalwa mwakakala, neryo abasuda bamatibita, abangyi ba mubo babirihola. Sauli n’omughala wiwe Yonatani, nabo babirihola.”
5 Neryo Daudi mwabulya omulume oyo wasyamubwira omwatsi oyo ati: “Ulyaminya uti ngoko Sauli n’omughala wiwe Yonatani babirihola?”
6 Omulwana oyo mwamusubirya ati: “Mungasisira inamabihika oko Kitwa kye Gilboa, neryo mungalangira Sauli inianaghemere oko ritumo riwe, abakaghendaya emitoka n’esyosabayiri* balue bakasonda erimuhikako.
7 Mwakabya abibinduka, amanilangira, neryo amanibirikira. Neryo mungabugha niti, ‘Ingye y’oyo!’
8 Mwakanibulaya ati, ‘Ulindi?’ Mungamusubiraya niti, ‘Niri Muamaleki.’
9 Enyuma sy’aho, mwakanibwira ati, ‘Kisi seghera hakuhi naghe, unite, kundi nikineho,* aliwe ninemwaghalwa kutsibu.’
10 Neryo mungaseghera hakuhi naye, namamwita. Mungalangira ngoko syendisyabyaho, kundi alw’iniabiriwa ahisi kandi iniabirihutala kutsibu. Enyuma sy’aho, mungimaya embita eyilue oko mutwe wiwe n’ekikomo ekilue oko byala biwe, neryo namakuleterabyo, mukama waghe.”
11 Neryo Daudi mwatula esyongyimba siwe, n’abalume bosi ababya haghuma naye mubatula esyongyimba syabo.
12 Neryo mubalira, bamabya omo bulighe, n’erikola amafungo erihika omw’igholo, kundi Sauli n’omughala wiwe Yonatani, abandu ba Yehova, n’Abaisraeli bangyi babya ibabiritibwa omo muyali.
13 Daudi mwabwira omulwana oyo wasyamubwira omwatsi ati: “Uli wa hayi?” Omulwana oyo mwamusubirya ati: “Baba waghe si Mwisraeli, ni Muamaleki.”
14 Neryo Daudi mwamubulya ati: “Siwetasagha eriita omundu oyo Yehova abirihirako amaghuta?”
15 Neryo Daudi mwabirikira omughuma w’oko basuda biwe, amamubwira ati: “Asa wite omulume oyu.” Neryo mwamwita, amahola.
16 Daudi mwabwira omulume oyo ati: “Omusasi waghu abye oko mutwe waghu, kundi ighuwene-wene mukayitsongera omw’ibugha uti, ‘Ingye ngabiita omundu oyo Yehova abirihirako amaghuta.’”
17 Neryo Daudi mwimba olwimbo lw’ekiriro busana na Sauli n’omughala wiwe Yonatani.
18 Kandi mwabugha ati bighisaye olwimbo olo lw’abandu be Yuda. Omutwe w’olwimbo olo abya “Obuta.”* Lunahandikire omo kitabu kya Yashari.
19 “Obubuya bwaghu, Israeli, bwabiriholera omo myanya yaghu y’endata.
Abalume b’amaka babiriwa ahisi!
20 Isimwakaniraya omwatsi oyo omo kiharo kye Gati;Isimwatulagho omo syonzira sye Ashkeloni;Kundi abambesa Bafilistini ibakenditsema,Kundi abambesa b’abandu abatabanibwe ibakendiyitsangura.
21 Inywe bitwa bye Gilboa,Isimwasako ekimi kutse eriwako embula,N’amalima wenyu isyeraya ebyalya ebikahererawa oMungu,Kundi n’inywe balyatsandirayako esyongabo sy’abandu b’amaka,Engabo ya Sauli siyikiriko amaghuta.
22 Obuta* bwa Yonatani isibulisagha eryuta omusasi w’esyonzighu,Kandi isibulisagha eritobola ebisabu by’abandu b’amaka,N’omuyali wa Sauli isyalisubula isyetasinga.
23 Sauli na Yonatani babya banzirwe n’erisimwa ibakineho,N’oluholo mulutaghababo.
Babya banguhire kulenga amasamba,Ibali n’akaghala kulenga esyosimba.
24 Inywe bambesa be Israeli, mulire Sauli,Oyo wabya akabambalya esyongyimba sy’erangyi y’omusasi eyihenirye,* esipambire ndeke,Oyo wabya akahira oko syongyimba syenyu kw’amapambo w’ehoro.
25 Iyooo! Abandu b’amaka babiriholera omo malwa!
Yonatani abiriholera omo myanya y’endata!
26 Mughala wetu Yonatani, nabiribya omo bulighe busana naghu;Nabya inikwanzire kutsibu.
Olwanzo olo wabya ukanikangania lwabya lulengire olwanzo lw’abakali.
27 Iyooo! Abandu b’amaka babiriwa ahisiN’ebindu by’amalwa byabiritsandibwa!”
Amaelezo awehikwa
^ Kutse “okw’iita.”
^ Kutse “n’esyofarasi; n’esyoshevale.”
^ Kutse “enafsi yaghe yosi ikine omw’ingye.”
^ Ni kindu ky’erilasamo emisali.
^ Ni kindu ky’erilasamo emisali.
^ Kutse “y’olukula-kula; ye écarlate.”
