Samweli w’Akabiri 13:1-39
13 Absalomu mughala wa Daudi abya na mwali wabo oyo wabya mubuya kutsibu. Abya iniakahulawa mo Tamari. Amnoni, oghundi mughala wa Daudi, mwanza Tamari.
2 Amnoni mwahangya-hangya kutsibu erihika oko kika amalwala. Kundi Tamari mwali wabo abya ini mubikira, Amnoni mwalangira ngoko syangatoka erikania naye.
3 Nikwa Amnoni abya n’omwira oyukahulawa mo Yehonadabu. Yehonadabu abya mughala wa Shimea, mughala wabo Daudi. Omulume oyo abya n’amayele manene.
4 Neryo Yehonadabu mwabwira Amnoni ati: “Omo buli tututu wabiribya ukabya omo bulighe mo busanaki? Si uli mughala w’omwami! Nibwire.” Amnoni mwamusubirya ati: “Nanzire Tamari mwali wabo mughala wetu Absalomu.”
5 Yehonadabu mwamusubirya ati: “Iwe uyilambike omo ngyingo yaghu, ukendibya nga ulwere. Baba waghu akendibya abisyakubana, ukendimubwira uti, ‘Kisi ubwire mwali wetu Tamari uti asyambe akalyo, anihukire akalyo ako bakahukira abakoni* ininalangire, neryo ngendiryako.’”
6 Neryo Amnoni mwaya omo ngyingo yiwe, amabya ng’alwere, n’omwami mwasyamubana. Neryo Amnoni mwabwira omwami ati: “Kisi ubwire mwali wetu Tamari uti asyanihukire esyogato ibiri esiri ng’omutima nitoke eriryasyo.”
7 Neryo Daudi mwatuma omundu ayabwire Tamari oyo wabya eka ati: “Kisi ghenda ew’omughala wenyu Amnoni, uyamuhukire akalyo.”*
8 Neryo Tamari mwaya omo nyumba ya mughala wabo, ye Amnoni, omo abya inianaghotsere. Tamari mwimya efarine, amakokotyamo esyogato ibiri Amnoni inianalangire, neryo amahukasyo.
9 Enyuma sy’aho, Tamari mwimya epano, amalusyamo esyogato, amahasyo Amnoni. Aliwe Amnoni mwaghana eriryasyo, neryo mwabugha ati: “Abandu bosi balue muno!” Neryo abandu bosi mubaluamo.
10 Neryo Amnoni mwabwira Tamari ati: “Kisi uniletere akalyo* omo kyumba kyaghe nitoke eriryako.” Neryo Tamari mwimya esyogato esiri ng’omutima esyo alyahuka, amatwalirasyo mughala wabo Amnoni omo kyumba kiwe.
11 Tamari abere abimuletera esyogato esyo, Amnoni mwamuhamba, neryo amamubwira ati: “Mwali wetu, asa ughotsere naghe.”
12 Aliwe Tamari mwamubwira ati: “Koko mughala wetu! Isiwanihemula kundi ekiri ng’ekyo sikirikolawa omo Israeli. Isiwakola omwatsi oyo owakit’isoni.
13 Abandu bakendibya bakanilangira bati? Naghu abandu bakendibya bakakulangira mo kiwere-were omo Israeli. Kisi tsuka wakania n’omwami, syanganighanira iwe.”
14 Aliwe mwatamuhulikirira. Mwabya n’akaghala kanene kulenga Tamari, neryo amamuhemula omw’ighotsera naye kinyanganga.
15 Neryo Amnoni mwamupona kutsibu erihika oko kika amamupona kutsibu kulenga ngoko abya amwanzire. Amnoni mwabwira Tamari ati: “Hangana, ughende!”
16 Tamari mwamusubirya ati: “Iyehe, mughala wetu, wamabinihigha lino, ukendibya iwamabikola ekitsibu kulenga ebyo ulyanikolera.” Aliwe Amnoni mwatamuhulikirira.
17 Neryo Amnoni mwabirikira omughombe wiwe oyukine mulwana n’erimubwira ati: “Asa ulusaye omundu ono omo meso waghe, ukinge n’omulango.”
18 (Tamari abya iniambite eropo eyuwene nga.* Abambesa b’omwami ababya ibakine babikira ko babya bakambala batya.) Neryo omughombe wa Amnoni mwatwala Tamari y’ehihya n’erikinga omulango.
19 Neryo Tamari mwahira omo mutwe wiwe mw’eribu, amatula eropo eyuwene ey’abya ambite. Abya akaghenda iniabirihira ebyala by’oko mutwe, inianemulira.
20 Mughala wabo ye Absalomu mwamubwira ati: “Mughala wenyu ye Amnoni yulyakukolera atya? Mwali wetu, iwe uhune, ni mughala wenyu. Omwatsi oyo isyakukenderaya omo mutima.” Eritsuka ekiro ekyo, Tamari mwayikala ewa mughala wabo ye Absalomu. Mwatasyabya akasungana n’abandi bandu.
21 Omwami Daudi abere abyowa oko mwatsi oyo, mwahitana kutsibu. Aliwe mwatanza erihutalya mughala wiwe Amnoni, kundi abya amwanzire, kusangwa yo wabya kambere kiwe.
22 Absolomu mwatabwira Amnoni yo kindu, kibye kibi kutse kibuya. Absalomu mwapona Amnoni kundi mwahemula mwali wabo ye Tamari.
23 Habere habihwa emyaka ibiri, Absalomu mwabwira abandu ati batwe oko syombuli siwe k’obweya e Baali-hazori, hakuhi ne Efraimu. Neryo oko mughulu oyo, mwabirikira abaghala bosi b’omwami b’oko fete.
24 Absalomu mwayasungana n’omwami, amamubwira ati: “Ingye mughombe waghu ninemutwisya oko syombuli syaghe k’obweya, kisi nanzire iwe mwami n’abaghombe baghu imwasa oko fete.”
25 Aliwe omwami mwabwira Absalomu ati: “Iyehe mughala waghe. Itwe bosi twamabighenda naghu, itukendibya muzigo okw’iwe.” Nomo anahatikana, omwami mwataligha, aliwe mwamutsumula.
26 Neryo Abasolomu mwabugha ati: “Iwe wamatendyasa, mughala wetu Amnoni iniasa.” Omwami mwamusubirya ati: “Wanzire Amnoni iniasa busanaki?”
27 Aliwe Absalomu mwamuhatikana, neryo mwabugha ati Amnoni aghende haghuma n’abandi baghala biwe bosi.
28 Enyuma sy’aho, Absalomu mwabwira abaghombe biwe ati: “Mubye imunemulebya. Mukendibya mwabilangira Amnoni iniabiritsanga-tsanga busana n’edivai, ngendibabwira niti, ‘Mumwite!’ neryo imwamwita. Isimwasagha, n’ingye ngendibabwira niti mukole mutya. Musike, isimwasagha.”
29 Neryo abaghombe ba Absalomu mubakolera Amnoni ngoko Absalomu anababwira. Enyuma sy’aho, abandi baghala bosi b’omwami mubahangana, obuli mundu amasambira oko nyumbu yiwe n’eritibita.
30 Ibakine omo nzira, omundu mwayabwira Daudi ngoko Absalomu abiriita abandi baghala bosi b’omwami kandi ngoko sihali n’omughuma oyulyasaka.
31 Neryo omwami mwahangana amatulanga esyongyimba siwe n’erighotsera ahisi. N’abaghombe biwe bosi mubimana hakuhi naye, nabo ibabiritula esyongyimba syabo.
32 Aliwe Yonadabu mughala wa Shimea, mughala wabo Daudi, mwamubwira ati: “Mukama waghe, isiwalengekanaya uti babiriita abalwana baghu bosi. Amnoni musa y’ulyahola, Absalomu y’ulyabugha ati bamwite. Mwabugha ati akendisyita Amnoni eritsuka ekiro ekyo Amnoni ahemula mwali wabo ye Tamari.
33 Mukama waghe kandi mwami waghe, isiwaligha* ebyo balyakubwira. Sibugha ambu abaghala baghu bosi babirihola, Amnoni musa y’ulyahola.”
34 Oko mughulu oyo, Absalomu abya iniabiritibita. Habere habilaba mughulu mulebe, omuteya w’omuyi mwalangira abandu banene bakasira omo nzira eyiri enyuma siwe hakuhi n’ekitwa.
35 Neryo Yehonadabu mwabwira omwami ati: “Abaghala b’omwami b’abo, banemwasa, ngoko omughombe waghu analyabugha.”
36 Abere abinabugha eribugha, abaghala b’omwami mubahika ibanemulira kutsibu, omwami n’abaghombe biwe bosi nabo mubalira kutsibu.
37 Aliwe Absalomu abya iniabiritibitira ewa Talmai mughala wa Amihudi, omwami we Geshuru. Daudi mwabugha ebiro binene inianemulira mughala wiwe.
38 Absalomu mwabya abitibitira e Geshuru, mwabughayo emyaka isatu.
39 Oko nduli, omwami Daudi mwakwa Absalomu y’olukando, kundi abya iniabirisala aligha* ngoko Amnoni abirihola.
Amaelezo awehikwa
^ Kutse “omukati w’erikirania.”
^ Kutse “omukati w’erikirania.”
^ Kutse “omukati w’erikirania.”
^ Kutse “eyipambire.”
^ Kutse “isiwahira omo mutima.”
^ Kutse “iniabiriyikirania.”
