Samweli w’Akabiri 18:1-33
18 Neryo Daudi mwaghanza abasuda ababya haghuma naye, mwahira oko basuda abo kw’abakulu b’amaelfu n’abakulu b’amamia.
2 Daudi mwaghaba abasuda mo bikuto bisatu. Mwabugha ati Yoabu imanire ekikuto kighuma, na Abishai mughala wabo Yoabu, mughala wa Zeruya imanire ekindi, na Itai Omugiti naye imanire eky’akasatu. Neryo Daudi mwabwira abasuda ati: “Naghe ngendighenda haghuma nenyu.”
3 Aliwe abasuda mubamubwira bati: “Isiwaghenda netu, kundi twamabitibita, abo tukendilwa nabo isibenditsomana, kandi nibya nomo enusu y’abasuda betu bangahola, sihali oyo wangatsomana kundi iwe uli w’omughaso kulenga abasuda 10 000. Kyanguwanire iwe iwasighala omo muyi, neryo iwabya ukatuwatikya ighune omo muyi.”
4 Omwami mwababwira ati: “Ngendikola ekyo mwamalangira mo kibuya.” Neryo omwami mwimana hakuhi n’omulango w’omuyi, n’abasuda bosi mubahuluka omo bikuto by’abandu 100 n’eby’abandu 1 000.
5 Enyuma sy’aho, omwami mwabwira Yoabu, Abishai, na Itai ati: “Kisi munikwire obulighe. Isimwahutalaya mughala waghe Absalomu.” Abasuda bosi mubowa omwami akabwira abakulu b’abasuda ati isibahutalaya Absalomu.
6 Abasuda mubaya omo kisuki bakayalwa na Israeli, mubalwira omo musitu we Efraimu.
7 Abasuda ba Daudi mubasinga abasuda be Israeli. Ekiro ekyo, mubita abasuda be Israeli 20 000.
8 Amalwa mwayahika omo kiharo kyosi ekyo. Abasuda abaholera omo musitu busana n’esyohatari sy’omo musitu mubabya banene kulenga abakwa omo muyali.
9 Absalomu mwayeya iniabirihika embere sy’abasuda ba Daudi. Mwabya abilangirabo, amatibita. Absalomu abya ikere oko nyumbu. Enyumbu eyo muyayamulabya omo ndina sy’ebitahi by’omuti munene, neryo esyonzwiri siwe musyaghoba omo bitahi ebyo, aliwe enyumbu muyitimana. Neryo Absalomu mwasighala inianalelembire omo kyanya.*
10 Neryo omundu mwamulangira, amayabwira Yoabu ati: “Mungalangira Absalomu iniabirilelemba oko muti munene.”
11 Yoabu mwasubirya omulume oyo ati: “Wamabya imughukamulangira, busanaki siwetamwita aho n’aho? Ngambe hano namakuha ebihande 10 by’efeza* n’omutima mughuma kandi niryendikuha n’omukaba.”
12 Aliwe omulume oyo mwasubirya Yoabu ati: “Nomo omundu angamba ebihande 1 000 by’efeza,* sinangahutalya omwana w’omwami kundi mutukowa omwami akakubwira iwe, Abishai, na Itai ati, ‘Nomo angabyandi, isyahutalaya mughala waghe Absalomu.’
13 Nga niryendilaba oko kinywa ky’omwami n’eriita Absalomu, omwami alyendiminya, naghu sighulyendinilwirako.”
14 Neryo Yoabu mwamubwira ati: “Kwanza ngaheraya n’endambi yaghe yo bule ngakania naghu.” Neryo mwimya emisali* isatu, amayakundayo omo mutima wa Absalomu iniakineho, inianalelembire omo muti munene.
15 Neryo abaghombe 10 ababya bahekire ebindu by’amalwa bya Yoabu, mubasyabughiriraho Absalomu, neryo amahola.
16 Neryo Yoabu mwabuha omo rihembe, n’abasuda mubaleka erikwamirira Israeli. Yoabu mwababwira ati balekere aho.
17 Abasuda mubimya ekinda kya Absalomu, bamakighusa omo kyuna kiri, ekyabya omo musitu. Mubalunda mukyo mw’amabwe, aliwe abasuda be Israeli mubatibita, bamasuba ewabo.
18 Omughulu Absalomu abya iniakineho, mwayihimbira enduyi omo Musya* w’Omwami kundi abya akayibwira ati: “Singwite omwana oyukendisyaleka erina ryaghe iritibirirwana.” Neryo mwaha enduyi eyo y’erina riwe. Ikinahulawa mo monima wa Absalomu erihika na munabwire.
19 Ahimaazi mughala wa Zadoki mwabwira Yoabu ati: “Kisi leka nitibite, niyabwire omwami omwatsi oyu, kundi Yehova abirimukolera omo ritunganene, omw’imulusya omo byala by’esyonzighu siwe.”
20 Aliwe Yoabu mwamubwira ati: “Isiwayamubwira munabwire, wanganasyayamubwira kindi kiro. Aliwe munabwire s’iwe ukendiyabwira omwami, kundi mughala wiwe-wiwe yulyahola.”
21 Neryo Yoabu mwabwira Omukushi mughuma ati: “Ghenda uyabwire omwami ebyo ulyalangira.” Omukushi oyo munama embere sya Yoabu, amaghenda akatibita.
22 Ahimaazi mughala wa Zadoki mwatasyabwira Yoabu ati: “Ekikendibya ikyabya. Ingye tu uleke nikwamirire Omukushi.” Aliwe Yoabu mwabugha ati: “Mughala waghe, wabirihumayira busanaki? Ka sihali n’omwatsi ogho ukayatula.”
23 Aliwe tu Ahimaazi mwabugha ati: “Ekikendibya ikyabya, leka nighende.” Neryo Yoabu mwamubwira ati: “Ghenda tahi!” Neryo Ahimaazi mwaghenda akatibita. Mwalaba omo nzira eyikalolera omo kiharo kye Yordani, n’oko mwiso mwayalaba oko Mukushi.
24 Daudi abya ikere omo mwanya owali omo kati-kati k’omulango w’ehihya w’omuyi n’omulango w’emwisi w’omuyi. Oyukateghaya omuyi mwahetukira oko lutwe lw’omulango owahambene n’oluhimbo. Oyukateghaya omuyi mwalangira omulume oyo wabya akasa inianemutibita.
25 Neryo oyukateghaya omuyi mwabirikira omwami, amamubwira ngoko omundu anemwasa. Neryo omwami mwamusubirya ati: “Amabya iniali iyuwene, ni bugha ambu inianawite eky’eribugha.” Omulume oyo wabya akatibita mwahika hakuhi n’omuyi.
26 Oyukateghaya omuyi mwalangira oghundi mulume akasa inianemutibita. Oyukateghaya omuyi mwabirikira oyukateghaya omulango. Mwamubwira ati: “Oghundi mulume yolya, anemwasa akatibita. Naye ane iyuwene.” Omwami mwabugha ati: “Oyo naye akasyakanaya omwatsi.”
27 Oyukateghaya omuyi mwabugha ati: “Ngoko namalangira, ow’erimbere akatibita nga Ahimaazi mughala wa Zadoki.” Neryo omwami mwabugha ati: “Oyo ni mundu oyuwene, akasa n’engulu mbuya.”
28 Ahimaazi abere abihika, mwabwira omwami omo mulenge muli ati: “Emyatsi yosi inuwene!” Ahimaazi munama, amahira obusu bwiwe b’oko kitaka embere sy’omwami. Enyuma sy’aho, mwabugha ati: “Mukama waghe kandi mwami waghe, Yehova oMungu waghe apipawe, kundi abirikuwatikya erisinga abalume abaghana obutabali bwaghu.”*
29 Aliwe omwami mwamubulya ati: “Mughala waghe Absalomu anuwene?” Neryo Ahimaazi mwamusubirya ati: “Yoabu mwakatutuma ingye n’oghundi mughombe. Neryo mungowa efuyo nene, aliwe munitetaminya nga hamabyaki.”
30 Neryo omwami mwamubwira ati: “Imana halya.” Neryo Ahimaazi mwayihengeka hake, amimana aho.
31 Enyuma sy’aho, Omukushi naye mwahika. Omukushi oyo mwabugha ati: “Mukama waghe kandi mwami waghe, ninawite eky’erikubwira. Munabwire Yehova abirikukolera omo butunganene omw’ikulusya omo byala by’abosi abaghana obutabali bwaghu.”
32 Aliwe omwami mwabulya Omukushi ati: “Mughala waghe Absalomu anuwene?” Omukushi oyo mwamusubrya ati: “Mukama waghe kandi mwami waghe, esyonzighu syaghu syosi n’abosi abakaghana obutabali bwaghu kundi ibanzire erikuhutalya, babye ng’omulwana oyo!”
33 Neryo omwami mwabula omutima w’omo nda. Mwahetukira omo kyumba ekiri oko lutwe lw’omulango w’omuyi, neryo amalira. Abya akaghenda inianemubugha ati: “Absalomu mughala waghe, mughala waghe! Absalomu mughala waghe, mughala waghe! Nga niryatahola omo mwanya waghu basi!”
Amaelezo awehikwa
^ Kinywa kwa kinywa, “omo kati-kati k’olubula n’ekihugho.”
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Kutse alinga, “amatumo; ehitumo.” Kinywa kwa kinywa, “emyutso.”
^ Kutse “Ribanda.”
^ Kinywa kwa kinywa, “abakusumbira ebyala byabo.”
