Samweli w’Akabiri 23:1-39
23 Bino by’ebinywa by’omwiso bya Daudi:
“Ebinywa bya Daudi mughala wa Yese,Ebinywa by’omulume oyo wahirawa omo mwanya w’endata,Oyo oMungu wa Yakobo ahirako amaghuta,Omulume oyo bandu babya bakanza eryowa akimba esyonyimbo sye Israeli.
2 Ekirimu kya Yehova mukyabugha erilabira ingye,Ebinywa biwe byabya oko lulimi lwaghe.
3 OMungu we Israeli mwabugha;Olubwe* lwe Israeli mulwambwira luti:
‘Omughulu omutunganene akatabala abandu,Neryo iniatabala inianemusagha oMungu,
4 Bikabya ng’omughulu ekyakakala ky’omo tututu kikahuluka, omughulu eryuba rikaka,Bikabya ng’etututu eyitemo kitu.
Bikabya ng’omughulu bukakya embula yabikya,Neryo ebiti ibyalasa.’
5 OMungu kw’akalangira atya ekihanda kyaghe,
Kundi abirikola endaghane ya kera na kera haghuma naghe,Endaghane eyisikire kandi eyitendisyabula eribererera,
Endaghane eyo yo yikaleka inasabulwa omo byosi n’eritsema omo myatsi yosi,Ebyo byo bikaleka endaghane eyo iyabogha.
6 Aliwe ebiwere-were byosi bikendisyaghuswa ngoko omundu akaghusa amahwa,Amahwa ogho omundu ateangahamba omo byala.
7 Omundu amasonda eritula kugho,Ritolere iniabya n’ekindu ky’ekyuma n’omuti w’eritumo,Akendisyatimibwa aho ali.”
8 Aya w’amena w’abasuda basatu b’amaka ba Daudi: Ow’erimbere abya Bashebeti Omutakemoni, yo wabya mukulu w’abasatu. Kiro kighuma, mwita abandu 800 omo ritumo riwe.
9 Ow’akabiri abya Eleazari, mughala wa Dodo, mughala wa Ahohi. Abya mughuma w’oko basuda basatu b’amaka ba Daudi. Mubaghenda haghuma na Daudi, bamayapuma* Abafilistini ababya ibabirihindana busana n’erilwa n’Abaisraeli. Ekiro ekyo, abasuda be Israeli mubasuba enyuma,
10 aliwe Eleazari mwatasuba enyuma, mwita Abafilistini erihika oko kika okuboko kwiwe kwamaleghetsana, n’ebyala biwe byamabyamo kitingiri busana n’erihamba omuyali. Yehova kw’asinga atya Abafilistini ekiro ekyo. Enyuma sy’aho, abasuda mubakwama Eleazari bakayalusya ebindu by’oko binda by’Abafilistini.
11 Ow’akasatu abya Shama, mughala wa Age Omuharari. Abafilistini mubahindana e Lehi, eyabya eririma eriswiremo elantiye.* Abasuda be Israeli mubatibita bakasagha Abafilistini.
12 Aliwe Shama mwimana omo kati-kati k’eririma eryo, amalwira kuryo. Mwalwa n’Abafilistini, amita Abafilistini banene. Yehova kw’awatikaya atya Abaisraeli erisinga Abafilistini bo kutsibu.
13 Oko mughulu w’erighesa, abakulu basatu b’oko bakulu 30 babya ibabirindaghalira eyiri Daudi omo mwangalu we Adulamu, n’ekikuto* ky’abasuda Bafilistini kyabya ikinapangire omo Musya* we Refaimu.
14 Daudi abya iniane omo mwanya ogho omundu ateangahikamo bweghu-bweghu, n’ekambi y’abasuda Bafilistini yabya e Betlehemu.
15 Kiro kighuma, Daudi mwabugha ngoko analaghire oko kindu kilebe, mwabugha ati: “Alinga namatanywa amaghetse awalyatehawa omo kyuna ky’amaghetse ekiri hakuhi n’omulango we Betlehemu!”
16 Neryo abasuda biwe basatu b’amaka mubakola ekyosi-kyosi batoke eringira omo kambi y’Abafilistini. Mubateha amaghetse omo kyuna ky’amaghetse ekiri hakuhi n’omulango we Betlehemu. Enyuma sy’aho, mubaleteragho Daudi. Aliwe mwaghana erinywagho, amutagho embere sya Yehova.
17 Mwabugha ati: “Yehova, sinanganywa amaghetse aya! Kundi kikendibya nga namanywa omusasi w’abalume aba, abalyahira engebe* yabo y’omo hatari batoke erinileteragho!” Neryo Daudi mwaghana erinywagho. Eyo y’emyatsi eyo basuda basatu ba Daudi b’amaka bakola.
18 Abishai mughala wabo Yoabu kandi mughala wa Zeruya yo wabya mukulu w’abandi basuda basatu. Kiro kighuma, mwita abandu 300 omo ritumo riwe. Abya iniakumayire ng’abasuda basatu b’amaka ba Daudi.
19 Nomo anabya iyo wasibwe kulenga abandi b’omo kikuto kiwe ky’abasuda basatu, kandi nomo anabya mukulu wabo, mwatahika oko basuda basatu b’amaka ba Daudi.
20 Benaya mughala wa Yehoyada abya mulume oyutesagha. Mwakola emyatsi minene eyikaswekaya e Kabzeli. Iye yo wita abaghala babiri ba Arieli we Moabu, kandi iye yo wandaghalira omo kyuna ky’amaghetse atoke eriita esimba omughulu w’amatsuku.
21 Mwita n’Omumisri mughuma oyo wabya muli-muli. Nomo Omumisri oyo anabya n’eritumo, Benaya mwayalwa naye omo mutso. Mwamusaghula eritumo, amamwita omo ritumo eryo.
22 Eyo y’emyatsi eyo Benaya mughala wa Yehoyada akola. Abya akumayire ng’abasuda basatu b’amaka ba Daudi.
23 Nomo anabya asibwe kulenga abandi b’omo kikuto ky’abasuda 30, mwatahika oko basuda basatu b’amaka ba Daudi. Aliwe Daudi mwamuyira mo mukulu w’abasuda abakamuteghaya.
24 Asaheli mughala wabo Yoabu abya mughuma w’oko basuda 30, amena w’abasuda abo w’ano: Elianani mughala wa Dodo owe Betlehemu,
25 Shama Omuharodi, Elika Omuharodi,
26 Helezi Omupalti, Ira mughala wa Ikeshi Omutekoa,
27 Abiezeri Omuanatoti, Mebunai Omushati,
28 Zaalmoni Omuhahohi, Maharai Omunetofati,
29 Helebu mughala wa Baana Omunetofati, Itai mughala wa Ribai owe Gibea y’Ababenyamini,
30 Benaya Omupiratoni, Hidai oyo wikere eyiri ehyusi ehikuma* hye Gashi,
31 Abialboni Omuarbati, Azmaveti Omubarumi,
32 Eliaba Omushalboni, abaghala ba Yasheni, Yonatani,
33 Shama Omuharari, Ahiamu mughala wa Shara Omuharari,
34 Elifeleti mughala wa Ahasbai mughala w’Omumaakati, Eliamu mughala wa Ahitofeli Omugiloni,
35 Hezro Omukarmeli, Paarai Omuarbi,
36 Igali mughala wa Natani, owe Zoba, Bani Omugadi,
37 Zeleki Omuamaoni, Naharai Omubeeroti, oyo wabya akaheka ebindu by’amalwa bya Yoabu mughala wa Zeruya,
38 Ira omuitri, Garebu Omuitri,
39 na Uria Omuhiti, abosi babya 37.
Amaelezo awehikwa
^ Kutse “Olukuka.”
^ Kutse “bamayakara.”
^ Ni buli nga buhoti.
^ Kutse “n’omulongo w’amahema.”
^ Kutse “Ribanda.”
^ Kutse “enafsi.”
^ Ulebaye Amaana w’ebinywa.
