Samweli w’Akabiri 7:1-29
7 Omwami mwikala omo nyumba yiwe, na Yehova mwamuwatikya eribya omo buholo, mwamulusya omo byala by’esyonzighu siwe syosi esyabya simutimbireko.
2 Kiro kighuma, omwami Daudi mwabwira omuminyereri Natani ati: “Ingye nikere omo nyumba eyihimbire omo miti y’emierezi, aliwe Erisanduku ry’oMungu w’ekwenene riri omo hema.”
3 Natani mwasubirya omwami Daudi ati: “Ghenda uyakole ekyosi-kyosi ekyo wanzire erikola, kundi Yehova ane haghuma naghu.”
4 Omo kiro ky’ekiro ekyo kisa-kisa, Yehova mwabwira Natani ati:
5 “Ghenda uyabwire omughombe waghe Daudi uti, ‘Yehova akabugha ati: “Ekikaleka iwabugha uti ukanihimbira enyumba niki?
6 Kundi eritsuka ekiro nalusaya abandu baghe Abaisraeli be Misri, sindinatikala omo nyumba, ingikala omo hema eyikahuma-huma.
7 Omughulu wosi ogho nabya ngaghenda n’Abaisraeli, ninenatabwira omughuma w’oko bakulu b’ebihanda bye Israeli oyo nasombola niti asondole abandu baghe Abaisraeli* niti, ‘Busanaki siwewatanihimbira enyumba omo miti y’emierezi?’”’
8 Neryo ukendibwira omughombe waghe Daudi uti, ‘Yehova w’emilondo ati: “Munakulusya emoli eyo wabya ukalisirya esyombuli nitoke erikuyira mo mukulu w’abandu baghe Abaisraeli.
9 Ahosi-hosi aho ukendisyabya ukaya, ngendisyabya inine haghuma naghu, kandi ngendisyalusya esyonzighu syaghu sy’embere syaghu, ngendisyayira n’erina ryaghu mo rikulu ng’erina ry’abandu abakumayire oko kihugho.
10 Ngendisyasombolera abandu baghe Abaisraeli b’omwanya ogho ngendisyabikalyamo. Bakendisyikalayo, sihendisyabya omundu wosi-wosi oyukabakenderaya; sihendisyabya abandu babi abakendisyabaghalya ngoko banabaghalaya kera,
11 eritsuka ekiro nahiriraho abandu baghe Abaisraeli abatsweri. Ngendisyakwikalya buholo omw’ikulusya omo byala by’esyonzighu syaghu.
“‘“Kandi Yehova mwakubwira ngoko Yehova akendisyayira ekihanda kyaghu mo kihanda ky’abami.*
12 Omughulu ukendisyabya ukasonda erihola n’omughulu ukendisyaghotsera buholo haghuma n’abotata-kulu baghu, omwana waghu oyo wabuta yo ngendisyayira mo mwami, ngendisyaleka obwami bwiwe ibwasika.
13 Iye yukendisyahimba enyumba eyikendisyaletera erina ryaghe ry’olukengerwa, ngendisyaleka ekitumbi kiwe ky’obwami ikyasika kera na kera.
14 Ngendisyabya baba wiwe, naye akendisyabya mughala waghe. Omughulu akendisyabya akakola ekibi, ngendisyabya ngamukunga omo fimbo eyo bandu bakakolesaya, n’erimuha ebikundi ngoko abaghala b’abandu* bakakola.
15 Iye sinendisyaleka erimukangania olwanzo oluteleghula, ngoko naleka erikanganialo Sauli, oyo nalusayaho embere syaghu.
16 Ekihanda kyaghu n’obwami bwaghu bikendisyabyaho kera na kera, n’ekitumbi kyaghu ky’obwami kikendisyabyaho kera na kera.”’”
17 Natani mwabwira Daudi y’ebinywa byosi ebi, n’erimubwira ebyosi ebyo alangira omo nzoli.
18 Neryo omwami Daudi mwayikala ahisi embere sya Yehova, amamubwira ati: “Yehova, iwe Omukama Mukulu oko Bosi, ingye n’ekihanda kyaghe tunatolere erikolerwa ebyosi ebyo wabiritukolera?
19 Yehova, iwe Mukama Mukulu oko Bosi, mukalangira ngoko ebyo sibitosire. Kandi Yehova, iwe Mukama Mukulu oko Bosi, muwatasyanibwira ingye mughombe waghu ngoko ekihanda ky’omughombe waghu kikendisyabyaho oko mughulu muli.
20 Yehova, iwe Mukama Mukulu oko Bosi, uniasi ndeke ingye mughombe waghu Daudi. Nangatasyabugha nitiki?
21 Mukakola emyatsi mikulu yosi eyi, kandi mukabisulirayo omughombe waghu utoke eriberererya ebyo wabirilagha, kandi kundi ryabya risonda ryaghu.*
22 Yehova, iwe Mwami Mukulu oko Bosi, ekyo kyo kikaleka iwabya mukulu. Sihali oyuli nga we, kandi sihali oMungu oyuli nga we. Ebyosi ebyo twabiryowa bikakanganaya ngoko ekyo ni kwenene.
23 Oko kihugho kune kindi kihanda ekiri ng’abandu baghu Abaisraeli? OMungu mwayakombolabo batoke eribya bandu biwe, muwabakolera emyatsi mikulu-mikulu kandi eyikaswekaya, erina ryaghu ritoke erihabwa olukengerwa. Muwatibita oko bihanda n’emiungu yabyo busana n’abandu baghu obo wayikombolera, wamalusyabo omo kihugho kye Misri.
24 Muwayira abandu be Israeli mo baghu kera na kera. Kandi iwe Yehova, muwabya Mungu wabo.
25 “Neryo Mungu waghe Yehova, ebyo ulyabugha uti ukendisyakolera omughombe waghu n’ekihanda kiwe bibererere kera na kera, kandi ukole ngoko wabirilagha.
26 Erina ryaghu rihalambawe kera na kera, abandu batoke eribugha bati, ‘Yehova w’emilondo ni Mungu w’Abaisraeli,’ kandi ekihanda ky’omughombe waghu Daudi kibyeho omo mughulu muli embere syaghu.
27 Kundi iwe Yehova w’emilondo, oMungu we Israeli, wabiribisulira omughombe waghu uti, ‘Ngendisyayira ekihanda kyaghu mo kihanda ky’abami.’* Kyo kyamaleka ingye mughombe waghu inatoka* erikusaba.
28 Yehova, iwe Mukama Mukulu oko Bosi, uli Mungu w’ekwenene, n’ebyo ukabugha ni by’ekwenene. Wabirinilagha ingye mughombe waghu uti ukendisyanikolera emyatsi eyi eyuwene.
29 Neryo kisi, utsumule ekihanda kyaghe ingye mughombe waghu ngoko wanabiribugha, kandi ekihanda kyaghe kibyeho kera na kera embere syaghu, kundi Yehova, iwe Mukama Mukulu oko Bosi, iwe ulyalagha omughombe waghu, kandi utsumule ekihanda kyaghe kera na kera.”
Amaelezo awehikwa
^ Kinywa kwa kinywa, “abaghala ba Israeli.”
^ Kinywa kwa kinywa, “akendisyakuhimbira enyumba.”
^ Kutse alinga, “ba Adamu.”
^ Kutse “erikwamana n’ebyo wanzire.”
^ Kinywa kwa kinywa, “Ngendisyakuhimbira enyumba.”
^ Kinywa kwa kinywa, “abirisunga omutima wiwe.”
