Ebaruha y’akabiri oko Timoteo 1:1-18
1 Ebaruha eno ikalua oko Paulo, omukwenda wa Kristo Yesu busana n’erisonda ry’oMungu, kandi busana n’endaghane y’engebe, eyitokekene busana na Kristo Yesu.
2 Ngahandikirayo Timoteo, omwana waghe mwanzwa.
Olukogho, obughanyiri, n’obuholo bw’oMungu Tata na Kristo Yesu Mukama wetu, bibye haghuma naghu.
3 Ngasima oMungu oyo ngakolera omubiiri mubuyirire, ngoko abotata-kulu wetu bakola. Ngakolagho n’obunya-mutima* obwerire. Ngabya ininemukuhira omo misabe yaghe omughulu ngalemba-lemba oMungu omo musibo n’omo kiro.
4 Ngabya ininemwibuka emisonia yaghu, kandi nanzire erikulolako nitoke eribya n’obutseme bungyi.
5 Kundi ninibukire obwikirirya bwaghu obutemo obulimba-limba.* Mukaka waghu Loisi na mama waghu Onike bo batsuka eribya n’obwikirirya obuli ng’obo. Aliwe, nikirirye ngoko naghu uwite obwikirya obuli ng’obo.
6 Busana n’ekyo, ngakwibukaya niti, ngoko omundu akatunda omuliro, naghu utunde ekihembo ky’oMungu ekiri omw’iwe, ekyo wabana omughulu nakuhirako ebyala,
7 kundi oMungu mwatatuha ekirimu ky’eribya tukasagha, aliwe mwatuha ekirimu ky’obutoki, ky’olwanzo, n’eky’obwenge obuwene.
8 Neryo isiwakwa esisoni sy’erihubirya emyatsi eyilebirye Omukama wetu, kutse isiwakwa esisoni busana naghe, kundi niri omo ngomo busana n’Omukama. Aliwe, ulighe eryaghalwa busana n’eritula engulu mbuya, ighunemuyiketera obutoki bw’oMungu.
9 Mwatusabula n’eritubirikira tutoke eribya babuyirire. Mwatatubirikira busana nebyo twabya tukakola. Aliwe, mwatubirikira busana n’ebyo abya anzire erikola kandi busana n’olukogho lwiwe. Mwatukangania olukogho olo erilua kera, erilabira Kristo Yesu.
10 Aliwe lino, olukogho olo lwabirilangirika ndeke, erilabira erikanganibwa ry’Omusabuli wetu Kristo Yesu, oyo wabughaho oluholo, n’oyo abiritubisulira erilabira engulu mbuya ngoko twangabya n’engebe n’omubiri owate wangatsanda.
11 Munayirwamo muhubiri, mukwenda, kandi mukangirirya busana n’engulu mbuya eyo.
12 Ekyo kyo kikaleka naghe inaghalwa. Aliwe, sinirikwa esisoni, kundi ninasi oMungu oyo nikiriraya, kandi nikirirye ngoko ali n’obutoki bw’eriteya ebyo nabirimubikisya erihika ekiro kirya.
13 Ubye ukakwama eky’erileberyako* ky’ebinywa ebyuwene,* ebyo nakubwira omughulu ukakanganaya obwikirirya n’olwanzo ebyo wabana busana n’eribya omo bughuma na Kristo Yesu.
14 Omo buwatikya bw’ekirimu kibuyirire ekiri omw’itwe, uteghaye obuteke obuwene obo wahabawa.
15 Ngoko unasi, abandu bosi b’omo kiharo kye Azia mubanileka. Abaghuma ba kubo ni Figelo na Hermogene.
16 Omukama aghanyire ekihanda kya Onesiforo, kundi iniakanikiranaya kangyi-kangyi. Kandi mwatakwa esisoni busana n’eribohwa ryaghe.
17 Aliwe, omughulu abya e Roma, mwanirondya kutsibu, neryo amanisunga.
18 Omukama amuwatikaye atoke erisyaghanyirwa na Yehova* ekiro ekyo. Kandi unasi ndeke ebyosi ebyo akola e Efeso.
Amaelezo awehikwa
^ Kutse “ezamiri.”
^ Kutse “obunafiki.”
^ Kutse “omodele.”
^ Kutse “ebiri n’endundi.”
^ Ulebaye endomeko A5.
