Ebaruha y’akabiri oko Timoteo 2:1-26
2 Neryo, iwe mwana waghe, omughulu wosi ubye ukabana akaghala erilabira olukogho oluli omo Kristo Yesu.
2 N’emyatsi eyo nakubwira, eyo bimiri* bangyi babirikangania ngoko ni y’ekwenene, uheyo abandu abataleghula nabo batoke eribya n’obutoki bw’erikangirirya abandi.
3 Ng’omusuda oyuwene wa Kristo Yesu, ulighe eryaghalwa.
4 Omusuda oyo wanzire eryanzisya oyo wamuyiramo musuda, syaliyingiraya* omo myatsi y’ekomerse* y’amaisa ano.
5 Kandi nibya, n’oyukakola oko bitsange, akambalibawa embita amabya imwakasikaya ebyalayiro by’ebitsange ebyo.
6 Omukulima oyukakola kutsibu yukasoloma w’erimbere.
7 Ubye ukalengekania oko ebyo ngabugha. Omukama akendikuwatikya eryowa emyatsi yosi.
8 Wibuke ngoko Yesu Kristo mwalubukibwa, kandi ngoko abya w’omo lubuto lwa Daudi, ngoko engulu mbuya eyo ngahubiraya ikakanganaya.
9 Ngaghalawa kandi nibohirwe ng’omukola-nabi busana n’engulu mbuya eyo. Aliwe, ekinywa ky’oMungu sikibohirwe.
10 Ekyo kikaleka inabya ininemuyiyinia omo myatsi yosi busana n’abasombolawa, kusudi nabo batoke erisabulwa erilabira Kristo Yesu n’eribana olukengerwa lwa kera na kera.
11 Ekinywa kino ni ky’ekwenene: Oko kwenene, twamabya imutwahola haghuma naye, kandi itukendisyabyaho haghuma naye.
12 Twamatendileka eriyiyinia, itukendisyatabala haghuma naye. Twamabimughana, naye iniakendisyatughana.
13 Twamabileghula, iye syangaleghula, kundi syangayighana.
14 Ubye ukibukyabo emyatsi eyi. Ubye ukabwirabo embere sy’oMungu ngoko isibabya bakakuba obuhaka oko binywa. Ekyo sikirilitera endundi, kundi kikatsandaya abakahulikirira.
15 Ukole ekyosi-kyosi ekyo wangatoka erimana embere sy’oMungu ng’omundu oyulighirwe, omukoli oyutawite ekyangaleka iniakwa esisoni, oyukakangiriraya ekinywa ky’ekwenene kyo ndeke-ndeke.
16 Aliwe, ughane emikania mitya-mitya, eyitesikaya emyatsi mibuyirire, kundi kangyi-kangyi yikaleka abandu ibatakenga oMungu.
17 N’ebinywa by’abakakanaya emikania eyo bikayitsatsanga ng’ekironda ekitandire. Himeneo na Fileto ni baghuma ba kubo.
18 Abandu abo babirighana ekwenene kundi bakabugha bati erilubuka ryabiribya. N’ekyo kikatsandaya obwikirirya bw’abandu balebe.
19 Aliwe, efondasyo eyiwatire y’oMungu isikire kandi ikabya iyinimene ndeke. Oko fondasyo eyo kuhandikire ebinywa bino: “Yehova* anasi abandu biwe.” Kandi kuhandikire kuti: “Obuli mundu oyukabirikira erina rya Yehova* aleke ebitatunganene.”
20 Nikwa omo nyumba nene, simulibya ebindu by’ehoro n’ebyefeza* bisa. Aliwe, mukabya n’eby’emiti, n’eby’eribumba. Ebindu bilebe bikakolesibawa omo myatsi y’omughaso, aliwe ebindi bikakolesibawa omo myatsi eyite y’omughaso.
21 Neryo omundu amayihighula oko bindu ebikakolesibawa omo myatsi eyite y’omughaso, iniakendibya ekindu ekikakolesibwa omo myatsi y’omughaso, ekyabiriyirwamo kibuyirire, ekiri n’omughaso oko mwinyekyo, ekiteghekanibwe busana n’erikola obuli mwatsi owuwene.
22 Neryo, usaghe esyongumbu sy’obulwana. Aliwe, ukwamirire emyatsi eyitunganene, obwikirirya, olwanzo, obuholo haghuma n’abakabirikira Omukama n’omutima owerire.
23 Ughane obuhaka butya-butya kandi bw’obukiru, kundi bukaleta amalwa.
24 Kusangwa siritolere omughombe w’Omukama inialwa. Aliwe, ritolere iniabya molo oko bosi, oyo wasi erikangirirya, kandi oyukayikakiraya omughulu bamamukosera.
25 Atolere iniakangirirya omo bolo abateligha ebyo akakangiriraya. Kwamuhwa oMungu anganabawatikya eriyisubako batoke eriminya ekwenene yo ndeke-ndeke.
26 Kandi kwamuhwa banganatasyabya n’obwenge n’erilua omo kitegho ekya Diabolo, oyo wabirihambabo ibaneho, batoke erikola ebyo anzire.
Amaelezo awehikwa
^ Kutse “batemwe.”
^ Kinywa kwa kinywa, “syaliyighoba-ghobanaya.”
^ Kutse kandi, “emyatsi y’obuli kiro.”
^ Ulebaye endomeko A5.
^ Ulebaye endomeko A5.
^ Ni kindu ky’obughuli ekikalua omo kitaka.
