Ebaruha y’akabiri oko Timoteo 3:1-17
3 Aliwe, uminye ngoko omo biro by’enduli, hakendisyabya emighulu eyikalire.
2 Kundi hakendisyabya abandu abayanzire, abanzire esyofranga, abakayihalamba, abakayiheka, abakatsuma oMungu n’abandu, abatyowa ababuti babo, abatesima, abakaleghula,
3 abatanzire abandi,* abatehulikirirana n’abandi, abakatonga abandi, abatasi eriyikakirya, abatsibu, abatanzire kibuya,
4 abakahotera abandi, ab’erighundu, abaswiremo emiyiheko, abanzire eriyitsemesya kulenga kw’eryanza oMungu,
5 abakabya nga basaghire oMungu,* aliwe ebyo bakakola sibirikanganaya ngoko basaghire oMungu. Iwe uyihighule oko bandu abo.
6 Abaghuma ba kubo bakingira omo manyumba omo bubiso-biso n’erihamba abakali abatawite akaghala, abahekire emiheke eyilitohire y’amalolo, abakakwama esyongumbu mbiriri-mbiriri.
7 Bakabya ibanemwigha, aliwe sibebataminya n’ahake ekwenene yo ndeke-ndeke.
8 Nikwa ngoko Yane na Yambre mubapinga Musa, abandu abo nabo bakapinga ekwenene. Obwenge bw’abandu abo butsandire olosi, kandi sibalighire n’oMungu, kundi sibalikwama obwikirirya.
9 Aliwe, sibendisyahika hali, kundi erisire* ryabo rikendisyalangirika n’abandu bosi, ngoko erya Yane na Yambre ryalangirika.
10 Nikwa iwe, wabirikwama ndeke-ndeke amakangirirya waghe, emighendere yaghe, ekyo ngakwamirira, obwikirirya bwaghe, erihanda omutima, olwanzo lwaghe, eriyiyinia ryaghe,
11 eryaghalibwa* n’amaligho awali ng’awo nalabamo e Antiokia, e Ikoniamu ne Listra. Munayiyinia n’Omukama mwanisabula omo maligho wosi ayo.
12 Oko kwenene, abosi abanzire erikolera oMungu omo butaleghula* n’eribya omo bughuma na Kristo Yesu, bakendisyaghalibwa.*
13 Aliwe, ababi n’abatebya bakendisyalola embere eribya babi kulenga. Bakendisyateba abandu, nabo ibatebwa.
14 Aliwe iwe, isiwaleka erikwama emyatsi eyo wabirigha n’eyo bakwighisaya, ighunasi abakwighisayayo,
15 kandi ighunasi ngoko erilua omo bwana bwaghu, unasi amasako abuyirire awakaleka iwabya n’amenge utoke erisyasabulwa kundi wikirirye Kristo Yesu.
16 Amasako wosi asondolawa n’ekirimu ky’oMungu kandi ali n’endundi, kundi akakangiriraya, akakunga, akalungula* emyatsi, akawatikaya omundu erikola ebitunganene,
17 kusudi omundu w’oMungu abye n’obutoki obutosire, n’eribya n’ebindu byosi ebyangamuwatikya erikola ekyosi-kyosi ekyuwene.
Amaelezo awehikwa
^ Kutse “abatanzire ab’omo kihanda kyabo.”
^ Kutse “abakabya nga banamakirire oMungu.”
^ Kutse “obukiru.”
^ Kutse “eryendereribwa.”
^ Kutse “erimakirira oMungu.”
^ Kutse “bakendisyendereribwa.”
^ Kutse “akakokotaya.”
