Ebaruha y’akabiri oko Timoteo 4:1-22
4 Embere sy’oMungu na Kristo Yesu, oyukendisyatswera abaliho n’abaholire, omughulu akendisyakanganibwa, n’omughulu akendisyatabala omo Bwami bwiwe, ngakubwira niti:
2 Uhubiraye ekinywa. Ukole utya butsira lindi-lindi, oko mughulu owuwene, n’oko mughulu owakalire. Ukunge abandu, uhayirebo, uhanebo, ukole utya ighunemuhanda omutima, n’erikangirirya ndeke.*
3 Kundi hakendisyabya omughulu bakendisyaghana erihulikirira amakangirirya awuwene.* Aliwe, busana n’erikwama ebyo banzire, bakendisyayironderya abakangirirya bangyi, abakabugha emyatsi eyo banzire eryowa.
4 Bakendisyaghana erihulikirira ekwenene. Aliwe, bakendisyahulikirira esyohadisi sy’amabehi.
5 Nikwa iwe, uteghaye obwenge bwaghu omo myatsi yosi, uyiyinaye omo maligho, ubye ukahubirya engulu mbuya,* ukole ndeke-ndeke omubiiri w’oMungu.
6 Kundi niri ng’ekihembo ky’obwabu ekikutawa oko kiherero, n’endambi y’eriboholwa ryaghe yiri hakuhi.
7 Nabirilwa amalwa awuwene. Nabiritibita erihika oko nduli y’amasindano w’eritibita. Nabiriteya obwikirirya.
8 Eritsuka lino, babirinibikira embita y’eritunganene, eyo Omukama, omutsweri oyutunganene, akendisyambamo kihembo ekiro ekyo kyahika. Aliwe, syendisyambayo ingye musa. Nikwa akendisyahayo n’abosi ababirilindirira kutsibu omughulu akendisyayikangania.
9 Uyikase erihika eyo niri yo luba.
10 Kundi Dema mwanitswako busana n’eryanza ekihugho kino.* Mwaya e Tesalonika. Kresesi mwaya e Galatia, na Tito amaya e Dalmatia.
11 Luka musa yuli haghuma naghe. Wase na Mariko, kundi akendiniwatikya oko mubiiri w’oMungu.
12 Aliwe ye Tikiko, nabirimutuma e Efeso.
13 Omughulu ukendyasa, uniletere erikoti eryo nasigha e Troa, ewa Karpo. Kandi uniletere ebitabu by’erilinga, kutsibu-tsibu ebikokotibwe omo syongobi sy’esyonyama.
14 Aleksanda, omuhesi w’ekwivre,* mwanikolera muhanda, Yehova* akendisyamuliha busana n’ebyo akola.
15 Naghu usaghe omundu oyo, kundi mwapinga kutsibu ebyo twabya tukabugha.
16 Omughulu natonda ery’erimbere, sihabya oyo waniwatikaya. Aliwe, abosi mubanilekerania. OMungu aghanyirebo.
17 Aliwe, Omukama mwimana hakuhi naghe, n’eriniha akaghala kanene, kusudi erilabira ingye, omubiiri w’erihubirya atoke erikolwa ndeke, n’abandu b’ebihanda byosi batoke eryowa. Kandi munabala oko simba, ikasyanimera.
18 Omukama akendisyanisabula omo myatsi mibi yosi, kandi akendisyaniteya nitoke eryingira omo bwami bwiwe bw’elubula. Ahabawe olukengerwa kera na kera. Amina.
19 Uramukaye Prisila na Akila, n’ekihanda kya Onesiforo.
20 Erasto mwasighere e Korinto, na Trofimo, mungamusigha e Mileto inialwere.
21 Uyikase erihika eno omughulu w’embeho nene isyalyatsuka.
Eubulo, Pude, Lino, Klodia n’abaghala betu bosi bamakutumira obuholo.
22 Omukama abatsumule busana n’omutima ogho mukakanganaya. Olukogho lwiwe lubye haghuma nenyu.
Amaelezo awehikwa
^ Kutse “n’obufundi bw’erikangirirya.”
^ Kutse “awali n’endundi.”
^ Kutse “ukole omubiiri w’eritula engulu mbuya.”
^ Kutse “omughulu ono.” Ulebaye amaana w’ebinywa.
^ Kutse “w’omulinga.”
^ Ulebaye endomeko A5.
