Ebaruha y’akabiri ya Yohana 1:1-13
1 Ebaruha eno ikalua oko musyakulu. Ngahandikirayo omukali oyo wasombolawa n’oMungu haghuma n’abana biwe. Nikwanzire kutsibu, butsira ingye musa, aliwe n’abosi ababiriminya ekwenene nabo bakwanzire.
2 Tubanzire busana n’ekwenene eyiri omo mitima yetu, n’ekwenene eyo ikendisyabya iyinemo kera na kera.
3 OMungu Tata w’elubula n’Omughala wiwe Yesu Kristo bakendisyatuha amakangirirya w’ekwenene n’eritukangania olwanzo. Bakendisyatukangania olukogho, bakendisyatughanyira, n’erituha obuholo.
4 Ngatsema kutsibu kundi munowa ngoko abana baghu balebe banemukwama ekwenene, erikwamana n’ekyalayiro ekyo Tata atuha.
5 Neryo lino, mukali, ekyo ngakusaba kya kino: Twanzane. (Sinirikuhandikira ekyalayiro kihya-kihya, aliwe ekyalayiro ekyo twabya nakyo eritsuka oko nzuko.)
6 Olwanzo ni bugha ambu tubye tukakwama ebyalayiro biwe. Ekyalayiro ekyo mwowa eritsuka oko nzuko kyeki: Mubye mukakangania olwanzo.
7 Muyiteghaye kundi abatebya bangyi babiribya omo kihugho. Babakaghana ngoko Yesu Kristo mwasa omo mubiri. Oyo yo mutebya kandi oyukaghana Kristo.
8 Muyiteghaye, mukasyabula eribana endundi omo ebyo twayikasa erikola omughulu twabya nenyu. Mwamakola mutya, imukendisyabana emiyisa yosi eyo Mungu abiribateghekanirya.
9 Obuli mundu oyutekwama amakangirirya wa Kristo n’erikangirirya ebyo Yesu atakangiriraya syali omo bughuma n’oMungu. Aliwe, oyukakwama amakangirirya wa Kristo ali omo bughuma na Tata n’Omughala wiwe.
10 Omundu amasa ewenyu, neryo iniatasa n’amakangirirya aya, isimwamukokaya omo manyumba wenyu, kutse isimwamuramukaya.
11 Oyukamuramukaya akabya iniamakola oko bibi biwe.
12 Nomo niri n’ebingyi eby’eribahandikira, sinanzire eribahandikirabyo oko kartasi n’omo bwino. Aliwe, nanzire inasa ewenyu n’erikania nenyu busu kwa busu, mutoke eritsema kutsibu.
13 Abana b’omwali wenyu, oyo wasombolawa, bamakuha obuholo.
