Ebaruha y’akasatu ya Yohana 1:1-14
1 Ebaruha eno ikalua oko musyakulu. Ngatumirayo Gayo, omwanzwa waghe, oyo nanzire kutsibu.
2 Mwanzwa waghe, ngakusabira niti emyatsi yosi yibye iyine ndeke omo ngebe yaghu, ngoko emyatsi yosi yinemukughendera ndeke lino kandi niti ubye ighunakalire.
3 Kundi munatsemire kutsibu omughulu abaghala betu basa n’erinibwira bati unemukwama amakangirirya w’ekwenene awali omw’iwe. Ni kwenene, unemukwama ndeke-ndeke ekwenene.
4 Ngatsema kutsibu omughulu ngowa ngoko abana baghe banemukwama ekwenene.
5 Mwanzwa waghe, ukakanganaya ngoko uli mutaleghula omo myatsi eyo ukakolera abaghala benyu. Obutaleghula bwaghu bukalangirika omo myatsi eyo ukakola eriwatikya abaghala benyu abo utasi.
6 Mubakanirye endeko oko lwanzo olo uli nalo. Omughulu bakendighenda, kisi ubawatikaye omo nzira eyikatsemesaya oMungu.*
7 Kundi mubaghenda busana n’eribwira abandu b’erina riwe, abandu b’ebihanda mubatabaha kindu.
8 Neryo ritolere itwabya tukakokya abandu abali ng’abo bo ndeke, tutoke erikola haghuma omubiiri w’eribwira abandi b’ekwenene.
9 Munahandikira endeko y’omwatsi mulebe, aliwe Diotrefe, oyo wanzire eribya w’erimbere omw’ibo, syalikwama n’ekinywa n’ekighuma omo ebyo tukabugha.
10 Busana n’ekyo, namabyasa ewenyu, ingendikangangania ebyo akakola. Akabya inianemubwira abandu b’amabehi okw’itwe n’eritubughako ebinywa ebituwene. Kandi syalilekera aho, syalisikaya abaghala betu, kandi syalikokayabo. Akasonda erikakirya abakanza erikokyabo n’erisonda eribahigha omo ndeko.
11 Mwanzwa waghe, sighukwame emibere y’abandu abakakola ebibi. Aliwe, ukwame emibere y’abandu abakakola ebyuwene. Oyukakola ebyuwene akalua oko Mungu, n’oyukakola ebituwene syalyataminya oMungu.
12 Abaghala betu bosi bakabugha ndeke oko Demetrio. Iye erikwama ekwenene kikakanganaya ngoko ebyo bakamubughako ni by’ekwenene. Netu tukabya itunemumubughako ndeke, kandi munasi ngoko ebyo tukabugha ni by’ekwenene.
13 Nilue n’emyatsi mingyi y’erikuhandikira. Aliwe, sinanzire erikuhandikirayo oko kartasi n’omo bwino.
14 Niri n’amaha ngoko ngendikulolako luba n’erikania naghu busu kwa busu.
Ubye n’obuholo.
Abira betu bamakuha obuholo. Uramukaye abira baghe, obuli mundu omo rina riwe.
Amaelezo awehikwa
^ Ekyo ni bugha ambu, akendibaha ebindu ebikendibawatikya omo lughendo lwabo.
