Emibiiri y’Abakwenda 1:1-26
1 Teofilo, omo mwatsi w’erimbere ogho nakuhandikira, munakukangania emyatsi yosi eyo Yesu akola n’erikangirirya
2 erihika ekiro atwalawa endata, abiha abakwenda abo asombola ebyalayiro erilabira ekirimu kibuyirire.
3 Abere abyaghalwa, mwahulukirabo ngendo nyingyi atoke eribakangania ndeke-ndeke ngoko aneho. Mubamulangira omo biro 40. Abya akakania nabo oko Bwami bw’oMungu.
4 Omughulu abya iniane haghuma nabo, mwababwira ati: “Isimwalua e Yerusalema, kandi simuleke erilindirira ekyo Tata abirilagha, ekyo nabakanirayako.
5 Yohana mwabatisya omo maghetse, aliwe inywe, hakisiya hake imwabatisibwa omo kirimu kibuyirire.”
6 Omughulu babya ibane haghuma, mubamubulya bati: “Mukama, eno y’endambi eyo ukasubuliraya e Israeli y’Obwami?”
7 Mwababwira ati: “Eriminya esyondambi n’ebirimo ebyo Tata abirihiraho, ekyo sikibalebirye. Tata musa yutolere* eriminyabyo.
8 Aliwe, mukendisyabana obutoki omughulu mukendisyahabwa ekirimu kibuyirire. Kandi mukendisyabya bimiri* baghe omo Yerusalema, n’omo Yudea yosi ne Samaria, n’erihika omo biharo by’ehali by’ekihugho.”
9 Mwabya abibugha emyatsi eyo, mwatwalwa endata, ekitu kyamamuswika ibanasamalire.
10 Omughulu babya ibanasamalire elubula inianemweruka, abalume babiri abambite esyongyimba sy’omusohe* mubalw’ibimana hakuhi nabo.
11 Neryo mubabugha bati: “Inywe balume be Galilaya, busanaki mukinimene aho imunemusamalira endata? Yesu oyu, oyulyalusibawa okw’inywe n’eriya elubula, akendisyasa ngoko mwamamulangira akaya elubula.”
12 Neryo mubasuba e Yerusalema, bakalua oko kitwa ekikahulawamo ekitwa ky’Emizeituni, ekiri hakuhi ne Yerusalema. Mubaghenda hakuhi ekilometre kighuma.*
13 Mubabya babihika e Yerusalema, muberukira omo kyumba ky’endata, eyo babya ibapangire. Mubeyayo Petro, Yohana, Yakobo na Andrea, Filipo na Toma, Bartolomayo na Matayo, Yakobo mughala wa Alfayo, na Simoni ow’omuhwa, na Yuda mughala wa Yakobo.
14 Abosi abo, babya bakasaba kutsibu ibane n’ekindu kighuma ekyo bakalandamirira. Hanabya n’abakali balebe na Maria mama wa Yesu. Kandi hanabya n’abaghala babo Yesu.
15 Oko biro ebyo, Petro mwahangana, amimana omo kati-kati k’abaghala babo (abosi babya bandu hakuhi 120) n’eribugha ati:
16 “Balume, baghala betu, kyabya kitolere ebinywa ebiri omo Masako ibyabererera, ebyo ekirimu kibuyirire kyabugha oko Yuda omo nzira y’obuminyereri erilabira Daudi, ye Yuda oyo wasondola abayahamba Yesu.
17 Kundi Yuda abya mughuma w’okw’itwe kandi mwasombolwa atoke erikola oko mubiiri oyu w’oMungu
18 (Omundu oyu mwaghula eririma oko musahara owabana abikola ekitatunganene, kandi mwatogha, amatsuka omutwe w’ahisi, n’omubiri wiwe mwatulika n’amala wiwe amayipanza-panzira ahisi.
19 Abandu bosi be Yerusalema mubowa oko mwatsi oyo. Kyo kyaleka ibahula eririma eryo mo Akeldama, omo mubughe wabo. Ekinywa ekyo ni bugha ambu, “Eririma ry’Omusasi.”)
20 Aliwe, omo kitabu ky’Esyonyimbo muhandikire muti: ‘Obwikalo bwiwe bubye kihuma, kandi isimwabya n’omukalani n’omughuma,’ kandi omo kitabu ekyo muhandikire muti: ‘Omubiiri wiwe w’obwimaniri, oghundi mundu imayegho.’
21 Neryo kwesi, ritolere erisombola omughuma w’oko balume ababya bakaghenda netu omughulu wosi ogho Mukama Yesu abya akakola emibiiri yiwe omo kati-kati ketu,
22 eritsuka omughulu Yesu abatisibawa na Yohana erihika ekiro alusibawa omo kati-kati ketu, kandi ritolere iniakangania ngatwe ngoko Yesu abirilubuka.”
23 Neryo mubahiraho abalume babiri: ye Yozefu oyukahulawamo Barsaba, kandi oyo wasibwemo Yusto. Mubahiraho na Matia.
24 Neryo mubasaba bati: “Yehova,* iwe wasi emitima y’abandu bosi, utukanganaye oyo wamasombola omo kati-kati k’abandu babiri aba
25 atoke erikola omubiiri oyu owabuyirire n’eribya mukwenda, n’erimya omwanya ogho Yuda asigha n’erighenda omo biwe.”
26 Neryo mubakola obukanga, bwamakangania ngoko Matia yo wamasombolwa, neryo mwahirwa oko mighanzo y’abakwenda 11.
Amaelezo awehikwa
^ Kutse “yuli n’obutoki.”
^ Kutse “batemwe.”
^ Kutse “enzeru, blanc.”
^ Kutse “olughendo olo omundu abya ahamulirwe erikola omo kiro kighuma ky’esabato.”
^ Ulebaye endomeko A5.
