Emibiiri y’Abakwenda 10:1-48
10 Omo muyi we Kaisaria mwabya omulume oyukahulawamo Kornelio. Abya mukulu w’abasuda* w’omo kikuto ekikahulawamo kikuto kye Itali.*
2 Kornelio abya akengire n’erisagha oMungu, n’abomo nyumba yiwe bosi babya ibakengire n’erisagha oMungu. Abya iniakawatikaya abera bo kutsibu kandi abya iniakasaba oMungu n’erimulemba-lemba mughulu wosi.
3 Yabya hakuhi saha tisa y’eritungyi,* mwalangira ndeke-ndeke omumalaika w’oMungu omo nzoli akingira omwiwe n’erimubwira ati: “Kornelio!”
4 Busana n’obuba, Kornelio mwamusamalira n’erimubwira ati: “Mukama hamabyaki?” Omumalaika mwamusubirya ati: “Emisabe yaghu yabirihetuka n’erihika embere sy’oMungu. Kandi abirilangira ngoko ukawatikaya abera, kandi abiryibuka ebyosi ebyo.
5 Utume e Yopa y’abalume, bayende Simoni oyukahulawamo Petro.
6 Omulume oyo ane aho wa Simoni, oyukakokotaya esyongobi. Enyumba yiwe yiri hakuhi n’engetse.
7 Omumalaika oyo wabya akakania naye mwabya abinaghenda, Kornelio mwabirikira abaghombe biwe babiri n’omusuda oyukengire oMungu oko basuda ababya bakamukolera.
8 Mwabya abibakanirya ebyosi, mwabatuma e Yopa.
9 Ekiro ekikwamire, ibane omo lughendo, kandi bakasonda erihika oko muyi, Petro mwaya oko nyumba kw’endata akayasaba. Yabya hakuhi medi.*
10 Aliwe, mwakwa enzala yo kutsibu, neryo amanza ati kumbe alyalya. Omughulu babya bakahuka akalyo, mwalangira enzoli.
11 Mwalangira olubula ilwabirikingukala. Mwalangira ekindu ekiri ng’olukimba lunene lw’ekitani, ibanemukimyakyo, ikinahambirirwe oko syongonde* ini syakyo.
12 Omo kindu ekyo mwabya obuli muhanda w’esyonyama sy’amaghulu ani, n’ow’esikakululuka, n’ow’esyonyunyu sy’omo kyanya.
13 Omulenge mwamubwira ati: “Petro, hangana, ukere, ulye.”
14 Aliwe, Petro mwasubirya ati: “Sinangakola ekyo Mukama, kundi sinirinatalya n’ekiro n’ekighuma enyama eyituwene kutse eyiterire.”*
15 Kandi omulenge mwabugha naye engendo y’akabiri ati: “Ebindu ebyo Mungu abiriyiramo bibuyirire, isiwabugha uti sibyuwene.”
16 Omwatsi oyo mwabya engendo y’akasatu, neryo ekindu ekyo mukyalw’ikyatwalwa elubula.
17 Petro iniakinaswekire n’eriyibulya enzoli eyo nga yikamaanisayaki, abalume abatumawa na Kornelio ababulaya enyumba yiwe nga yiri hayi, mubimana oko mulango.
18 Mubabirikira n’eribulya Simoni oyukahulawamo Petro nganikere aho.
19 Petro iniakinalengekanaya oko nzoli eyo, ekirimu mukyamubwira kiti: “Abalume basatu banemukurondya.
20 Hangana, ndaghala, ughende nabo, isiwatika-tika kundi n’ingye niryabatuma.”
21 Neryo Petro mwandaghalira eyiri abalume abo n’eribabwira ati: “Oyo mukarondaya n’ingye. Mukanisondaya busanaki?”
22 Mubamubwira bati: “Kornelio omukulu w’abasuda, omundu oyutunganene kandi oyusaghire oMungu oyo Abayahudi bosi bakamubughako ebyuwene, oMungu mwamutumako omumalaika mubuyirire, ayamubwire ati, wase ewiwe, atoke eryowa emyatsi eyo ukendimubwira.”
23 Neryo Petro mwingiryabo omo nyumba, amabaha aherighotsera.
Bwabere bwabikya mwahangana, amaghenda nabo n’abaghala balebe abe Yopa. Mubaghenda nabo haghuma.
24 Ekiro ekikwamire, Petro mwingira omo muyi we Kaisaria. Oko kwenene, Kornelio abya inyanalindirirebo kandi abya iniabirihindania abatunga biwe, n’abira biwe.
25 Petro akingira, Kornelio mwaseghera hakuhi na Petro, mwawa oko bisandu biwe, n’erikukama embere siwe.
26 Aliwe, Petro mwamuhangania n’erimubwira ati: “Hangana, naghe niri mundu nga we.”
27 Ibanemukania na Kornelio, Petro mwingira omo nyumba, ameyamo abandu bangyi.
28 Mwababwira ati: “Munasi ndeke-ndeke ngoko Omuyahudi syahamulirwe erikola obwira n’omundu w’ekindi kihanda, kutse nibya eriseghera hakuhi naye. Aliwe, oMungu mwakanikanganaya ngoko siritolere ngahula omundu wosi-wosi mo oyutuwene, kutse oyuterire.
29 Ekyo kyo kiryaleka indaghana eryasa omughulu balyanitumako abandu ambu basyaniende. Neryo munibwire ekiryaleka imwanitumako abandu muti basyaniende.”
30 Neryo Kornelio mwabugha ati: “Hamabilaba biro bini, oko ndambi ngumerera ng’eno, hakuhi saha tisa y’eritungyi,* nabya ininemusabira omo nyumba yaghe. Neryo omulume oyumbite esyongyimba esikangabasenie mwimana embere syaghe.
31 Mwanibwira ati: ‘Kornelio, oMungu abiryowa omusabe waghu, kandi anibukire ebyosi ebyo ukakolera abera.*
32 Neryo utume omundu ye Yopa ayende omulume oyukahulawamo Simoni Petro. Omundu oyo ikere ewa Simoni oyukakokotaya esyongobi, oyo enyumba yiwe yiri hakuhi n’engetse.’
33 Neryo munalw’inatuma abandu eriyakwenda. Neryo naghu mukayira ndeke eryasa hano. Neryo lino tuli embere sy’oMungu tutoke erihulikirira emyatsi yosi eyo Yehova* alyakubwira ati ukenditubwira.”
34 Neryo Petro mwabugha ati: “Munamalangira ngoko kwenene-kwenene oMungu syalimo akasololo.
35 Aliwe, akaligha obuli mundu oyukamusagha n’erikola ebitunganene, n’omo angabya w’omo kihanda kyahi.
36 OMungu mwatumira abana be Israeli engulu mbuya y’obuholo, erilabira Yesu Kristo. Yesu oyu y’Omukama w’abosi.
37 Munasi omwatsi ogho bandu babya bakakaniako omo Yudea yosi. Omwatsi oyo mwatsuka omo Galilaya Yohana abibwira abandu oko lubatiso lwiwe.
38 Omwatsi oyo abya akakania oko Yesu owe Nazareti oyo oMungu ahirako amaghuta erilabira ekirimu kibuyirire n’omo butoki kandi omwatsi oyo akakanganaya ngoko alendera omo biharo akakola ebibuya n’erilamia abosi abo Diabolo abya akaghalya kundi oMungu abya inyane haghuma na Yesu.
39 Kandi mutwayilangirira emyatsi yosi eyo akola, omo kihugho ky’Abayahudi n’omo Yerusalema. Aliwe, mubamwita omw’imuhanika oko muti.
40 OMungu mwamulubukya omo kiro ky’akasatu, n’erimutokesya ayikanganaye,
41 butsira oko bandu bosi, aliwe oko bimiri* abo Mungu asombola embere, ni bugha ambu itwe twalya n’erinywa naye abilubuka.
42 Kandi mwatubwira ati, tuhubiraye abandu n’eribakangania ndeke-ndeke ngoko iye y’oMungu abiriyiramo Mutsweri w’abaliho n’abaholire.
43 Abaminyereri bosi mubakania oko Yesu. Mubakangania ngoko erilabira erina riwe, obuli mundu oyukamwikiriraya akaghanyirawa amalolo wiwe.”
44 Omughulu Petro abya iniakinabugha oko myatsi eyo, abosi ababya bakahulikirira ekinywa mubapokera ekirimu kibuyirire.
45 Abataleghula* ababanibwe abasa na Petro mubakukubala bakalangira ngoko abandu b’ebihanda nabo banemupokera ekihembo ky’ekirimu kibuyirire ekyo Mungu akaha abandu bo busa.
46 Neryo mubowabo bakabugha omo yindi mibughe, kandi ibanemupipa oMungu. Neryo Petro mwabulya ati:
47 “Kundi abandu aba babiripokera ekirimu kibuyirire ngatwe, omundu anganatasyaghana ati isibabatisibawa omo maghetse?”
48 Neryo mwabugha ati babatisibawe omo rina rya Yesu Kristo. Enyuma sy’aho, mubamusaba bati asighale haghuma nabo omo biro bilebe.
Amaelezo awehikwa
^ Kutse “omukulu w’abasuda 100.”
^ Kutse “ekikuto ky’abasuda 600 be Roma.”
^ Ni bugha ambu, hakuhi 15:00.
^ Ni bugha ambu, hakuhi 12:00.
^ Kutse “esyosonda, coins.”
^ Ni bugha ambu, ebighanisibwe, ebiterire erikwamana n’Emighambo.
^ Ni bugha ambu, hakuhi 15:00.
^ Kinywa kwa kinywa, “ebihembo ebyo ukaha abera busana n’eribakwira obulighe.”
^ Ulebaye endomeko A5.
^ Kutse “batemwe.”
^ Kutse “abikirirye.”
